ਘਾਨਾ ਤੋਂ ਆਇਆ ਯਾਤਰੀ ਗਿ੍ਫ਼ਤਾਰ, ਢਿੱਡ 'ਚ ਲੁਕਾ ਕੇ ਰੱਖੇ ਸਨ 13 ਕਰੋੜ ਦੇ 87 ਨਸ਼ੀਲੇ ਕੈਪਸੂਲ
ਮੁੰਬਈ, 3 ਸਤੰਬਰ : ਮੁੰਬਈ ਕਸਟਮ ਵਿਭਾਗ ਨੇ ਇਥੇ ਅੰਤਰਰਾਸ਼ਟਰੀ ਹਵਾਈ ਅੱਡੇ 'ਤੇ ਭਾਰਤ ਵਿਚ ਕੋਕੀਨ ਦੀ ਤਸਕਰੀ ਕਰਨ ਦੀ ਕੋਸ਼ਿਸ਼ ਕਰ ਰਹੇ ਘਾਨਾ ਦੇ ਇਕ ਯਾਤਰੀ ਨੂੰ ਗਿ੍ਫ਼ਤਾਰ ਕੀਤਾ ਹੈ | ਉਸ ਨੇ ਇਹ ਨਸ਼ੀਲਾ ਪਦਾਰਥ 87 ਕੈਪਸੂਲਾਂ ਰਾਹੀਂ ਅਪਣੇ ਢਿੱਡ ਵਿਚ ਲੁਕਾ ਕੇ ਰਖਿਆ ਹੋਇਆ ਸੀ |
ਕਸਟਮ ਵਿਭਾਗ ਨੇ ਦਸਿਆ ਕਿ ਯਾਤਰੀ ਕੋਲੋਂ ਬਰਾਮਦ ਕੀਤੀ ਗਈ 1300 ਗ੍ਰਾਮ ਕੋਕੀਨ ਦੀ ਕੀਮਤ 13 ਕਰੋੜ ਰੁਪਏ ਹੈ | ਇਹ ਘਟਨਾ 28 ਅਗੱਸਤ ਦੀ ਹੈ, ਜਦੋਂ ਮੁੰਬਈ ਅੰਤਰਰਾਸ਼ਟਰੀ ਹਵਾਈ ਅੱਡੇ 'ਤੇ ਯਾਤਰੀ ਨੂੰ ਸ਼ੱਕੀ ਹੋਣ 'ਤੇ ਰੋਕਿਆ ਗਿਆ ਅਤੇ ਸਰਕਾਰੀ ਹਸਪਤਾਲ ਲਿਜਾਇਆ ਗਿਆ |
ਮੁੰਬਈ ਕਸਟਮਸ-3 ਦੇ ਟਵਿੱਟਰ ਹੈਂਡਲ ਤੋਂ ਇਕ ਟਵੀਟ ਵਿਚ ਕਿਹਾ ਗਿਆ ਹੈ,''ਯਾਤਰੀ ਘਾਨਾ ਤੋਂ ਮੁੰਬਈ ਹਵਾਈ ਅੱਡੇ 'ਤੇ ਪਹੁੰਚਿਆ ਅਤੇ ਕਸਟਮ ਅਧਿਕਾਰੀਆਂ ਨੇ ਉਸ ਨੂੰ ਸ਼ੱਕ ਦੇ ਆਧਾਰ 'ਤੇ ਰੋਕ ਲਿਆ | ਤਲਾਸ਼ੀ ਦੌਰਾਨ ਅਧਿਕਾਰੀਆਂ ਨੂੰ ਉਸ ਦੇ ਸਾਮਾਨ 'ਚੋਂ ਕੱੁਝ ਨਹੀਂ ਮਿਲਿਆ ਪਰ ਜਾਂਚ 'ਤੇ ਪਤਾ ਲੱਗਾ ਕਿ ਉਸ ਦੇ ਢਿੱਡ ਵਿਚ 87 ਕੈਪਸੂਲ ਸਨ, ਜਿਨ੍ਹਾਂ 'ਚ ਕੋਕੀਨ ਲੁਕਾਈ ਹੋਈ ਸੀ | ਮੁਲਜ਼ਮ ਨੂੰ ਸਰਕਾਰੀ ਹਸਪਤਾਲ ਵਿਚ ਦਾਖ਼ਲ ਕਰਵਾਇਆ ਗਿਆ, ਜਿਥੇ ਉਸ ਨੇ ਤਿੰਨ ਦਿਨਾਂ ਵਿਚ ਇਹ ਕੈਪਸੂਲ ਉਗਲੇ | ਕਸਟਮ ਵਿਭਾਗ ਨੇ ਕਿਹਾ ਕਿ ਯਾਤਰੀ ਨੂੰ ਨਸ਼ਾ ਵਿਰੋਧੀ ਐਕਟ ਦੇ ਤਹਿਤ ਗਿ੍ਫ਼ਤਾਰ ਕੀਤਾ ਗਿਆ ਹੈ ਅਤੇ ਮਾਮਲੇ ਦੀ ਜਾਂਚ ਜਾਰੀ ਹੈ |
(ਏਜੰਸੀ)
