ਮੁਲਜ਼ਮਾਂ ਨੇ 1.55 ਕਰੋੜ ਵਿਚੋਂ 60 ਲੱਖ ਕੀਤੇ ਵਾਪਸ
ਲੁਧਿਆਣਾ : ਕਾਰੋਬਾਰ ਦੇ ਸਿਲਸਿਲੇ 'ਚ ਬੈਂਕ ਤੋਂ ਕਰੋੜਾਂ ਰੁਪਏ ਦਾ ਕਰਜ਼ਾ ਲੈਣ ਤੋਂ ਬਾਅਦ ਕਾਰੋਬਾਰ ਮੱਠਾ ਪੈ ਗਿਆ ਅਤੇ ਕਾਰੋਬਾਰੀ ਪੈਸੇ ਵਾਪਸ ਕਰਨ 'ਚ ਅਸਮਰੱਥ ਰਿਹਾ। ਖਾਤਾ ਐਨਪੀਏ ਹੋਣ ’ਤੇ ਵਪਾਰੀ ਨੇ ਬੈਂਕ ਮੁਲਾਜ਼ਮਾਂ ਨਾਲ ਗੱਲ ਕਰਨੀ ਸ਼ੁਰੂ ਕੀਤੀ। ਇਸ ਦੌਰਾਨ ਕੁਝ ਨਿੱਜੀ ਲੋਕਾਂ ਨੇ ਐੱਨਪੀਏ ਖਾਤੇ ਦੇ ਨਿਪਟਾਰੇ ਦੇ ਨਾਂ 'ਤੇ ਕਾਰੋਬਾਰੀ ਦੇ ਫਰਜ਼ੀ ਅਸ਼ਟਾਮ ਅਤੇ ਖਾਲੀ ਦਸਤਾਵੇਜ਼ਾਂ 'ਤੇ ਦਸਤਖਤ ਕਰਵਾ ਕੇ ਉਸ ਤੋਂ 1.55 ਕਰੋੜ ਰੁਪਏ ਲੈ ਲਏ।
ਬੈਂਕ ਵਿੱਚ ਸੈਟਲਮੈਂਟ ਨਾ ਹੋਣ ਕਾਰਨ ਉਕਤ ਮੁਲਜ਼ਮਾਂ ਨੇ ਕਾਰੋਬਾਰੀ ਨੂੰ 60 ਲੱਖ ਰੁਪਏ ਵਾਪਸ ਕਰ ਦਿੱਤੇ ਜਦਕਿ ਬਾਕੀ 95 ਲੱਖ ਰੁਪਏ ਵਾਪਸ ਨਹੀਂ ਕੀਤੇ। ਥਾਣਾ ਮੇਹਰਬਾਨ ਦੀ ਪੁਲਿਸ ਨੇ ਵਪਾਰੀ ਸੰਦੀਪ ਕੁਮਾਰ ਗੁਪਤਾ ਵਾਸੀ ਗੁਰੂ ਨਾਨਕ ਦੇਵ ਨਗਰ ਦੇ ਬਿਆਨਾਂ ’ਤੇ ਕੁਲਦੀਪ ਕੁਮਾਰ ਬਾਂਸਲ ਵਾਸੀ ਮਾਡਲ ਗ੍ਰਾਮ ਖ਼ਿਲਾਫ਼ ਕੇਸ ਦਰਜ ਕਰ ਲਿਆ ਹੈ। ਸੰਦੀਪ ਕੁਮਾਰ ਨੇ ਦੱਸਿਆ ਕਿ ਉਸ ਨੇ ਜ਼ਮੀਨ ਗਿਰਵੀ ਰੱਖ ਕੇ ਕਰਜ਼ਾ ਲਿਆ ਸੀ।
ਕੰਮ ਨਾ ਹੋਣ ਕਾਰਨ ਉਹ ਬੈਂਕ ਨੂੰ ਪੈਸੇ ਵਾਪਸ ਨਹੀਂ ਕਰ ਸਕਿਆ। ਇਸ ਕਾਰਨ, 2019 ਵਿੱਚ, ਉਸ ਦੀ ਫਰਮ ਮੈਸਰਜ਼ ਸਾਲਿਕ ਨਿਟਵੇਅਰ ਦਾ ਬੈਂਕ ਖਾਤਾ ਐਨਪੀਏ ਹੋ ਗਿਆ। ਬੈਂਕ ਪ੍ਰਤੀ ਉਸ ਦੀ ਦੇਣਦਾਰੀ 56,04,01,000 ਰੁਪਏ ਸੀ। ਉਸ ਨੇ ਬੈਂਕ ਨਾਲ ਸਮਝੌਤਾ ਕਰਨ ਲਈ ਮੁਲਜ਼ਮ ਨਾਲ ਸੰਪਰਕ ਕੀਤਾ। ਸਮਝੌਤਾ ਕਰਵਾਉਣ 'ਤੇ ਮੁਲਜ਼ਮਾਂ ਨੇ ਖਾਲੀ ਦਸਤਾਵੇਜ਼ਾਂ 'ਤੇ ਦਸਤਖਤ ਕਰਵਾ ਕੇ ਫਰਜ਼ੀ ਐਗਰੀਮੈਂਟ ਤਿਆਰ ਕਰਵਾ ਲਿਆ ਅਤੇ ਜਾਅਲੀ ਸਟੈਂਪ ਪੇਪਰ ਵੀ ਤਿਆਰ ਕਰਵਾ ਲਏ।
