ਵਟਸਐਪ 'ਤੇ ਚੁਣੇ ਅਪਣੀ ਪਸੰਦ ਦੇ ਡਿਜ਼ਾਈਨ, ਸਮਾਰਟ ਘੜੀਆਂ ਅਤੇ ਦੋ iPhone ਫੋਨ ਵੀ ਲਏ
Punjab News: ਰਿਸ਼ਵਤਖੋਰੀ ਮਾਮਲੇ ਦੀ ਚੱਲ ਰਹੀ ਜਾਂਚ ਤੋਂ ਪਤਾ ਲੱਗਿਆ ਹੈ ਕਿ ਦੋਸ਼ੀ ਮਾਲ ਅਧਿਕਾਰੀ (ਪਟਵਾਰੀ) ਗੁਰਵਿੰਦਰ ਸਿੰਘ ਨੇ ਸ਼ਿਕਾਇਤਕਰਤਾ ਤੋਂ ਸਿਰਫ 27.50 ਲੱਖ ਰੁਪਏ ਦੀ ਨਕਦੀ ਹੀ ਨਹੀਂ ਲਈ ਸੀ ਸਗੋਂ ਪਟਵਾਰੀ ਨੂੰ ਮਿਲੀ ਰਿਸ਼ਵਤ ਵਿਚ ਘੱਟੋ ਘੱਟ 3 ਲੱਖ ਰੁਪਏ ਦੀ ਕੀਮਤ ਦੀਆਂ ਮਹਿੰਗੀਆਂ ਪਾਕਿਸਤਾਨੀ ਜੁੱਤੀਆਂ ਵੀ ਸ਼ਾਮਲ ਸਨ।
ਬਠਿੰਡਾ ਦੇ ਰਾਮਪੁਰਾ ਫੂਲ ਦੇ ਰਹਿਣ ਵਾਲੇ ਬੱਬੂ ਤੰਵਰ ਨੇ ਵਿਜੀਲੈਂਸ ਨੂੰ ਸਬੂਤ ਸੌਂਪੇ ਹਨ ਕਿ ਕਿਵੇਂ ਉਹ ਸਮੇਂ-ਸਮੇਂ 'ਤੇ ਪਟਵਾਰੀ ਨੂੰ ਮਹਿੰਗੀਆਂ ਜੁੱਤੀਆਂ ਦੇ ਕਈ ਜੋੜੇ ਸਪਲਾਈ ਕਰਦਾ ਸੀ, ਇਸ ਦੇ ਲਈ ਉਹ ਵਟਸਐਪ 'ਤੇ ਅਪਣੀ ਪਸੰਦ ਦੇ ਡਿਜ਼ਾਈਨ ਚੁਣਦਾ ਸੀ। ਸ਼ਿਕਾਇਤਕਰਤਾ ਨੇ ਵਿਜੀਲੈਂਸ ਨੂੰ ਦਸਿਆ ਕਿ ਉਸ ਨੇ ਪਟਵਾਰੀ ਨੂੰ ਘੱਟੋ ਘੱਟ 3 ਲੱਖ ਰੁਪਏ ਦੀਆਂ ਜੁੱਤੀਆਂ ਦਿਤੀਆਂ ਪਰ ਫਿਰ ਵੀ ਉਸ ਦਾ ਕੰਮ ਨਹੀਂ ਹੋਇਆ।
ਲੁਧਿਆਣਾ ਵਿਜੀਲੈਂਸ ਦੇ ਐਸਐਸਪੀ ਰਵਿੰਦਰਪਾਲ ਸਿੰਘ ਸੰਧੂ ਨੇ ਦਸਿਆ ਕਿ ਤੰਵਰ ਦੇ ਦੋ ਫੁੱਟਵੇਅਰ ਸ਼ੋਅਰੂਮ ਹਨ, ਜਿਥੇ ਉਹ ਹੱਥੀਂ ਤਿਆਰ ਪਾਕਿਸਤਾਨੀ ਜੁੱਤੀਆਂ ਵੀ ਰੱਖਦਾ ਹੈ। ਸ਼ਿਕਾਇਤਕਰਤਾ ਨੇ ਵਟਸਐਪ ਚੈਟ ਰਿਕਾਰਡ ਜਮ੍ਹਾਂ ਕਰਵਾਏ ਹਨ ਕਿ ਕਿਵੇਂ ਪਟਵਾਰੀ ਅਪਣੀ ਪਸੰਦ ਦੇ ਡਿਜ਼ਾਈਨ ਦੀ ਚੋਣ ਕਰਦਾ ਹੈ ਅਤੇ ਸ਼ਿਕਾਇਤਕਰਤਾ ਨੂੰ ਲੁਧਿਆਣਾ ਆਉਣ 'ਤੇ ਉਨ੍ਹਾਂ ਨੂੰ ਲਿਆਉਣ ਲਈ ਕਹਿੰਦਾ ਹੈ। ਹੁਣ ਤਕ ਦੀ ਜਾਂਚ ਦੇ ਅਨੁਸਾਰ, ਦੋਸ਼ੀ ਅਧਿਕਾਰੀ ਨੇ ਸ਼ਿਕਾਇਤਕਰਤਾ ਤੋਂ ਘੱਟੋ ਘੱਟ 18 ਜੋੜੀਆਂ ਮਹਿੰਗੀਆਂ ਜੁੱਤੀਆਂ ਮੁਫਤ ਲਈਆਂ, ਜਿਸ ਦੀ ਕੀਮਤ ਲਗਭਗ 3 ਲੱਖ ਰੁਪਏ ਹੈ।
ਤਾਜ਼ਾ ਅਪਡੇਟਸ ਲਈ ਸਾਡੇ Whatsapp Broadcast Channel ਨਾਲ ਜੁੜੋ।
ਵਿਜੀਲੈਂਸ ਨੇ ਲੁਧਿਆਣਾ ਦੇ ਪੀਰੂਬੰਦਾ ਵਿਖੇ ਤਾਇਨਾਤ ਪਟਵਾਰੀ ਗੁਰਵਿੰਦਰ ਸਿੰਘ, ਉਸ ਦੇ ਪਿਤਾ ਪਰਮਜੀਤ ਸਿੰਘ, ਭਰਾ ਬਲਵਿੰਦਰ ਸਿੰਘ ਅਤੇ ਇਕ ਨਿੱਜੀ ਏਜੰਟ ਨਿੱਕੂ ਵਿਰੁਧ ਤੰਵਰ ਤੋਂ 34.70 ਲੱਖ ਰੁਪਏ ਦੀ ਰਿਸ਼ਵਤ ਲੈਣ ਦੇ ਦੋਸ਼ ਹੇਠ ਕੇਸ ਦਰਜ ਕੀਤਾ ਸੀ। ਇਸ ਰਕਮ ਵਿਚੋਂ 27.50 ਲੱਖ ਰੁਪਏ ਨਕਦ ਸਨ ਅਤੇ ਬਾਕੀ 3.40 ਲੱਖ ਰੁਪਏ ਨਵੇਂ ਆਈਫੋਨ, 3 ਲੱਖ ਰੁਪਏ ਦੀਆਂ ਜੁੱਤੀਆਂ ਅਤੇ ਹੋਰ ਚੀਜ਼ਾਂ ਖਰੀਦਣ ਲਈ ਸਨ।
ਤੰਵਰ ਨੇ ਪੰਜਾਬ ਸਰਕਾਰ ਦੀ ਭ੍ਰਿਸ਼ਟਾਚਾਰ ਰੋਕੂ ਹੈਲਪਲਾਈਨ 'ਤੇ ਸ਼ਿਕਾਇਤ ਕੀਤੀ ਸੀ ਕਿ ਪਟਵਾਰੀ ਲੁਧਿਆਣਾ 'ਚ ਉਸ ਦੇ ਪਿਤਾ ਦੀ ਜ਼ਮੀਨ ਦੇ ਇੰਤਕਾਲ ਨੂੰ ਮਨਜ਼ੂਰੀ ਦੇਣ ਬਦਲੇ ਘੱਟੋ-ਘੱਟ 30 ਲੱਖ ਰੁਪਏ ਦੀ ਰਿਸ਼ਵਤ ਮੰਗ ਰਿਹਾ ਹੈ ਪਰ 27.50 ਲੱਖ ਰੁਪਏ ਨਕਦ ਅਤੇ ਹੋਰ ਰਿਸ਼ਵਤ ਦੇਣ ਦੇ ਬਾਵਜੂਦ ਇਹ ਕੰਮ ਕਦੇ ਨਹੀਂ ਕੀਤਾ ਗਿਆ। ਪਟਵਾਰੀ 'ਤੇ ਪਿਛਲੇ ਸਾਲ ਨਵੰਬਰ 'ਚ ਮਾਮਲਾ ਦਰਜ ਕੀਤਾ ਗਿਆ ਸੀ ਪਰ ਉਹ ਅਪਣੇ ਨਿੱਜੀ ਏਜੰਟ ਨਿੱਕੂ ਨਾਲ ਫਰਾਰ ਹੈ, ਹਾਲਾਂਕਿ ਸਥਾਨਕ ਅਦਾਲਤ ਨੇ ਉਨ੍ਹਾਂ ਦੀਆਂ ਜ਼ਮਾਨਤ ਅਰਜ਼ੀਆਂ ਖਾਰਜ ਕਰ ਦਿਤੀਆਂ ਸਨ। ਉਸ ਦੇ ਪਿਤਾ ਅਤੇ ਭਰਾ ਹਾਈ ਕੋਰਟ ਤੋਂ ਜ਼ਮਾਨਤ ਪ੍ਰਾਪਤ ਕਰਨ ਵਿਚ ਕਾਮਯਾਬ ਰਹੇ ਸਨ।
(For more Punjabi news apart from Punjab news patwari got expensive Pakistani juttis worth at least Rs 3 lakh as bribe, stay tuned to Rozana Spokesman)
