ਸ਼ਿਵਸੈਨਾ-ਭਾਜਪਾ ਦੇ ਸਬੰਧ ਆਮਿਰ ਖ਼ਾਨ-ਕਿਰਨ ਰਾਉ ਦੇ ਰਿਸ਼ਤੇ ਵਾਂਗੂ : ਸੰਜੇ ਰਾਊਤ

ਮੁੰਬਈ, 5 ਜੁਲਾਈ : ਸ਼ਿਵ ਸੈਨਾ ਸੰਸਦ ਮੈਂਬਰ ਸੰਜੇ ਰਾਊਤ ਨੇ ਅਦਾਕਾਰ ਆਮਿਰ ਖ਼ਾਨ ਅਤੇ ਕਿਰਨ ਰਾਉ ਵਿਚਾਲੇ ਤਲਾਕ ਤੋਂ ਬਾਅਦ ਉਨ੍ਹਾਂ ਦੇ ਰਿਸ਼ਤੇ ਦਾ ਹਵਾਲਾ ਦਿੰਦੇ ਹੋਏ ਸੋਮਵਾਰ ਨੂੰ ਕਿਹਾ ਕਿ ਉਨ੍ਹਾਂ ਦੀ ਪਾਰਟੀ ਅਤੇ ਭਾਜਪਾ ਦੇ ਸਿਆਸੀ ਰਸਤੇ ਵੱਖ ਹਨ ਪਰ ਇਨ੍ਹਾਂ ਸਾਬਕਾ ਗਠਜੋੜ ਸਹਿਯੋਗੀਆਂ ਵਿਚਾਲੇ ਦੋਸਤੀ ਬਣੀ ਹੋਈ ਹੈ। ਰਾਊਤ ਨੇ ਕਿਹਾ,‘‘ਆਮਿਰ ਖ਼ਾਨ ਅਤੇ ਕਿਰਨ ਰਾਉ ਨੂੰ ਦੇਖੋ। ਉਨ੍ਹਾਂ ਦੇ ਰਸਤੇ ਵੱਖ ਹੋ ਗਏ ਹਨ ਪਰ ਉਹ ਦੋਸਤ ਹਨ। ਇੱਥੇ ਵੀ ਅਜਿਹਾ ਹੀ ਹੈ। ਸਾਡੇ ਰਸਤੇ ਵੱਖ ਹੋ ਗਏ ਪਰ ਦੋਸਤੀ ਬਣੀ ਹੋਈ ਹੈ। ਰਾਜਨੀਤੀ ਵਿਚ ਦੋਸਤੀ ਬਣੀ ਰਹਿੰਦੀ ਹੈ ਪਰ ਇਸ ਦਾ ਮਤਲਬ ਇਹ ਨਹੀਂ ਹੈ ਕਿ ਮਹਾਰਾਸ਼ਟਰ ਵਿਚ ਸਰਕਾਰ ਬਣਾਉਣ ਜਾ ਰਹੇ ਹਨ।’’ 
  ਉਨ੍ਹਾਂ ਕਿਹਾ,‘‘ਮਤਭੇਦ ਹਨ ਪਰ ਜਿਵੇਂ ਕਿ ਮੈਂ ਲੰਬੇ ਸਮੇਂ ਤੋਂ ਕਹਿ ਰਿਹਾ ਹਾਂ, ਸ਼ਿਵ ਸੈਨਾ ਅਤੇ ਭਾਜਪਾ ਭਾਰਤ-ਪਾਕਿਸਤਾਨ ਨਹੀਂ ਹਨ। ਬੈਠਕਾਂ ਅਤੇ ਗੱਲਬਾਤ ਹੁੰਦੀ ਹੈ ਪਰ ਹੁਣ ਸਾਡੇ ਰਸਤੇ ਵੱਖ ਹੋ ਗਏ ਹਨ। ਰਾਜਨੀਤੀ ਵਿਚ ਸਾਡੇ ਰਸਤੇ ਵੱਖ ਹੋਏ ਹਨ।’’ ਦੱਸ ਦੇਈਏ ਕਿ ਆਮਿਰ ਖ਼ਾਨ ਨੇ ਹਾਲ ਹੀ ਵਿਚ ਕਿਹਾ ਸੀ ਕਿ ਉਨ੍ਹਾਂ ਨੇ ਅਤੇ ਉਨ੍ਹਾਂ ਦੀ ਪਤਨੀ ਕਿਰਨ ਰਾਉ ਨੇ 15 ਸਾਲ ਬਾਅਦ ਤਲਾਕ ਲੈ ਲਿਆ ਹੈ। ਖ਼ਾਨ ਨੇ ਕਿਹਾ ਸੀ,‘‘ਸਾਡਾ ਰਿਸ਼ਤਾ ਬਦਲ ਗਿਆ ਹੈ ਪਰ ਅਸੀਂ ਹੁਣ ਵੀ ਨਾਲ ਹਾਂ।’’ (ਪੀਟੀਆਈ)