ਬਾਬੇ ਨਾਨਕ ਦੇ ਸੰਦੇਸ਼ 'ਕਿਰਤ ਕਰੋ, ਵੰਡ ਛਕੋ' ਨੂੰ ਅਪਣੇ ਜੀਵਨ ਵਿਚ ਅਪਨਾਇਆ : ਸਰਪੰਚ ਮਦਨ ਸਿੰਘ
''ਮਿਹਨਤ ਕਰਨ ਨਾਲ ਕੋਈ ਨੀਵਾਂ ਨਹੀਂ ਹੁੰਦਾ ਸਗੋਂ ਬੱਚਿਆਂ ਨੂੰ ਵੀ ਮਿਲਦੀ ਸੇਧ''
ਖ਼ੁਦ ਦੇ 4 ਬੱਚੇ ਹੋਣ ਦੇ ਬਾਵਜੂਦ 1 ਹੋਰ ਧੀ ਲਈ ਗੋਦ
ਅੰਮ੍ਰਿਤਸਰ (ਕੋਮਲਜੀਤ ਕੌਰ, ਸਰਵਣ ਸਿੰਘ ਰੰਧਾਵਾ): ਅੱਜ ਦੇ ਸਮੇਂ ਵਿਚ ਅਹੁਦਾ ਮਿਲਦੇ ਹੀ ਲੋਕਾਂ ਦਾ ਰਹਿਣ-ਸਹਿਣ ਅਤੇ ਜ਼ਿੰਦਗੀ ਜਿਊਣ ਦਾ ਢੰਗ ਬਦਲ ਜਾਂਦਾ ਹੈ ਪਰ ਅੰਮ੍ਰਿਤਸਰ ਦੇ ਹਲਕਾ ਅਟਾਰੀ ਅਧੀਨ ਆਉਂਦੇ ਪਿੰਡ ਵਡਾਲਾ ਭਿੱਟੇਵੱਡ ਦਾ ਸਰਪੰਚ ਮਦਨ ਸਿੰਘ ਇਸ ਦੇ ਉਲਟ ਕਿਰਤ ਕਰਨ ਨੂੰ ਤਰਜੀਹ ਦਿੰਦਾ ਹੈ ਅਤੇ ਇਲਾਕੇ ਵਿਚ ਹੋਰਨਾਂ ਲਈ ਮਿਸਾਲ ਬਣਿਆ ਹੋਇਆ ਹੈ।
ਦੱਸ ਦੇਈਏ ਕਿ 2019 ਵਿਚ ਹੋਈਆਂ ਚੋਣਾਂ ਦੌਰਾਨ ਮਦਨ ਸਿੰਘ ਸਰਪੰਚ ਚੁਣੇ ਗਏ ਸਨ। ਉਦੋਂ ਤੋਂ ਹੀ ਉਨ੍ਹਾਂ ਨੇ ਨਾ ਸਿਰਫ਼ ਅਪਣੇ ਪਿੰਡ ਦੇ ਵਿਕਾਸ ਕਾਰਜ ਕਰਵਾਏ ਸਗੋਂ ਹੱਥੀਂ ਕਿਰਤ ਕਰਨੀ ਵੀ ਇਸੇ ਤਰ੍ਹਾਂ ਹੀ ਜਾਰੀ ਰੱਖੀ। ਉਹ ਖਾਲਸਾ ਕਾਲਜ ਅੰਮ੍ਰਿਤਸਰ ਦੇ ਪਿਛਲੇ ਪਾਸੇ ਰਾਮਤੀਰਥ ਰੋਡ 'ਤੇ ਗੰਨੇ ਦੇ ਰਸ ਦੀ ਰੇਹੜੀ ਲਗਾਉਂਦੇ ਹਨ ਅਤੇ ਅਪਣੇ ਪ੍ਰਵਾਰ ਦਾ ਗੁਜ਼ਾਰਾ ਚਲਾਉਂਦੇ ਹਨ।
ਇਹ ਵੀ ਪੜ੍ਹੋ: ਥਾਣੇ 'ਚ ਮੇਰੇ ਕਪੜੇ ਲਾਹ ਕੇ 4 ਪੁਲਿਸ ਵਾਲਿਆਂ ਨੇ ਲਗਾਇਆ ਕਰੰਟ, 2 ਦਿਨ ਕੁੱਟਿਆ-ਮਾਰਿਆ : ਪੀੜਤ ਲੜਕੀ
ਰੋਜ਼ਾਨਾ ਸਪੋਕਸਮੈਨ ਨਾਲ ਗਲਬਾਤ ਕਰਦਿਆਂ ਸਰਪੰਚ ਮਦਨ ਸਿੰਘ ਨੇ ਦਸਿਆ ਕਿ ਉਨ੍ਹਾਂ ਨੇ ਗੁਰੂ ਨਾਨਕ ਸਾਹਿਬ ਦੇ ਸੰਦੇਸ਼ 'ਕਿਰਤ ਕਰੋ, ਵੰਡ ਛਕੋ' ਨੂੰ ਅਪਣੇ ਜੀਵਨ ਵਿਚ ਅਪਣਾਇਆ ਹੈ ਅਤੇ ਉਹ ਕਰੀਬ 30 ਸਾਲ ਤੋਂ ਇਸ ਕਿੱਤੇ ਨਾਲ ਜੁੜੇ ਹੋਏ ਹਨ। ਮਦਨ ਸਿੰਘ ਦਾ ਕਹਿਣਾ ਹੈ ਕਿ ਪਿੰਡ ਲਈ ਮਿਲੀ ਗ੍ਰਾਂਟ ਉਨ੍ਹਾਂ ਨੇ ਇਮਾਨਦਾਰੀ ਨਾਲ ਵਰਤੀ ਹੈ ਅਤੇ ਤਕਰੀਬਨ 75 ਫ਼ੀ ਸਦੀ ਵਿਕਾਸ ਕਾਰਜ ਵੀ ਕਰਵਾ ਚੁੱਕੇ ਹਨ।
ਇਹ ਵੀ ਪੜ੍ਹੋ: ਦੋ ਘੰਟੇ ਪਏ ਮੀਂਹ ਨੇ ਜਲਥਲ ਕੀਤਾ ਲੁਧਿਆਣਾ, ਸੜਕਾਂ 'ਤੇ ਘੁੰਮ ਰਿਹਾ ਕੈਮੀਕਲ ਵਾਲਾ ਪਾਣੀ : ਸਾਂਸਦ ਰਵਨੀਤ ਸਿੰਘ ਬਿੱਟੂ
ਪੁਛੇ ਗਏ ਸਵਾਲ ਦਾ ਜਵਾਬ ਦਿੰਦਿਆਂ ਮਦਨ ਸਿੰਘ ਨੇ ਦਸਿਆ ਕਿ ਅਰਾਮਦਾਇਕ ਜ਼ਿੰਦਗੀ ਜਿਉਣੀ ਹਰ ਕਿਸੇ ਦੀ ਇੱਛਾ ਹੁੰਦੀ ਹੈ ਪਰ ਮੈਂ ਇਹ ਸੱਭ ਅਪਣੀ ਮਿਹਨਤ ਸਦਕਾ ਹੀ ਪ੍ਰਾਪਤ ਕਰਨਾ ਹੈ। ਜੇਕਰ ਪਰਮਾਤਮਾ ਨੇ ਇਥੋਂ ਤਕ ਪਹੁੰਚਾਇਆ ਹੈ ਤਾਂ ਮਿਹਨਤ 'ਤੇ ਬਲ 'ਤੇ ਉਹ ਗੱਡੀ ਵੀ ਖਰੀਦਣਗੇ ਪਰ ਲੋਕਾਂ ਦਾ ਪੈਸਾ ਲੋਕਾਂ ਲਈ ਹੀ ਵਰਤਣਗੇ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਮਿਹਨਤ ਕਰਨ ਨਾਲ ਕੋਈ ਨੀਵਾਂ ਨਹੀਂ ਹੁੰਦਾ ਸਗੋਂ ਸਾਡੇ ਬੱਚੇ ਵੀ ਸਾਨੂੰ ਦੇਖ ਕੇ ਮਿਹਨਤ ਦੇ ਰਾਹ 'ਤੇ ਤੁਰਦੇ ਹਨ। ਦੱਸ ਦੇਈਏ ਕਿ ਮਦਨ ਸਿੰਘ ਦੇ ਚਾਰ ਅਪਣੇ ਬੱਚੇ ਹਨ ਅਤੇ ਇਕ ਧੀ ਨੂੰ ਗੋਦ ਲਿਆ ਹੈ। ਉਨ੍ਹਾਂ ਦੇ ਬੱਚੇ ਪੜ੍ਹਾਈ ਦੇ ਨਾਲ-ਨਾਲ ਅਪਣੇ ਮਾਪਿਆਂ ਦੇ ਕੰਮ ਵਿਚ ਹੱਥ ਵੀ ਵਟਾਉਂਦੇ ਹਨ।
ਸਰਪੰਚ ਮਦਨ ਸਿੰਘ ਦਾ ਕਹਿਣਾ ਹੈ ਕਿ ਉਨ੍ਹਾਂ ਦੀ ਸੋਚ ਮੁਤਾਬਕ ਬਹੁਤ ਸਾਰੇ ਪਿੰਡ ਦੇ ਕੰਮ ਨੇਪਰੇ ਚੜ੍ਹ ਚੁੱਕੇ ਹਨ ਅਤੇ ਹੁਣ ਉਹ ਪਿੰਡ ਵਿਚ ਹੀ ਇਕ ਪੈਲੇਸ ਬਣਵਾਉਣਾ ਚਾਹੁੰਦੇ ਹਨ ਜਿਥੇ ਗ਼ਰੀਬ ਮਾਪੇ ਅਪਣੇ ਬੱਚਿਆਂ ਦਾ ਮੁਫ਼ਤ ਵਿਆਹ ਕਰ ਸਕਣ।
