ਐਸਟੀਐਫ ਨੇ ਪੇਸ਼ ਹੋਣ ਲਈ ਭੇਜਿਆ ਸੀ ਨੋਟਿਸ
ਅੰਮ੍ਰਿਤਸਰ : ਬੀਤੇ ਦਿਨੀਂ ਅੰਮ੍ਰਿਤਸਰ ਦੇ ਕਸਬਾ ਸੁਲਤਾਨਵਿੰਡ ਵਿਖੇ ਫੜੀ ਗਈ ਸੈਂਕੜੇ ਕਰੌੜੀ ਨਸ਼ਾ ਫ਼ੈਕਟਰੀ ਮਾਮਲੇ ਦੀ ਤਹਿ ਤਕ ਪਹੁੰਚਣ ਲਈ ਐਸਟੀਐਫ਼ ਨੂੰ ਖ਼ੂਬ ਪਸੀਨਾ ਵਹਾਉਣਾ ਪੈ ਰਿਹਾ ਹੈ। ਇਸ ਮਾਮਲੇ ਦੇ ਤਾਰ ਵੱਡੇ ਸਿਆਸੀ ਆਗੂਆਂ ਨਾਲ ਜੁੜੇ ਹੋਣ ਦੇ ਸ਼ੰਕਿਆਂ ਦਰਮਿਆਨ ਐਸਟੀਐਫ਼ ਨੂੰ ਵਧੇਰੇ ਸਾਵਧਾਨੀ ਵਰਤਣੀ ਪੈ ਰਹੀ ਹੈ।
Photo
ਸ਼ੁਰੂਆਤੀ ਜਾਂਚ ਦੌਰਾਨ ਇਸ ਮਾਮਲੇ ਦੇ ਤਾਰ ਅਕਾਲੀ ਆਗੂ ਅਨਵਰ ਮਸੀਹ ਨਾਲ ਜੁੜੇ ਹੋਣ ਦੇ ਸੰਕੇਤ ਮਿਲੇ ਸਨ। ਕਿਉਂਕਿ ਜਿਸ ਕੋਠੀ ਵਿਚ ਇਹ ਫ਼ੈਕਟਰੀ ਚੱਲ ਰਹੀ ਸੀ, ਉਹ ਅਨਵਰ ਮਸੀਹ ਨਾਂ ਦੇ ਇਸ ਅਕਾਲੀ ਆਗੂ ਦੀ ਹੈ। ਇਸੇ ਅਧਾਰ 'ਤੇ ਐਸਟੀਐਫ ਵਲੋਂ ਅਨਵਰ ਮਸੀਹ ਨੂੰ ਨੋਟਿਸ ਭੇਜ ਕੇ ਪੇਸ਼ ਹੋਣ ਲਈ ਕਿਹਾ ਗਿਆ। ਭਾਵੇਂ ਸ਼ੁਰੂਆਤ 'ਚ ਅਨਵਰ ਮਸੀਹ ਨੇ ਮੀਡੀਆ ਸਾਹਮਣੇ ਇਹ ਕੋਠੀ ਕਿਰਾਏ 'ਤੇ ਦਿਤੀ ਹੋਣ ਦਾ ਹਵਾਲਾ ਦਿੰਦਿਆਂ ਖੁਦ ਨੂੰ ਬੇਕਸੂਰ ਦਸਿਆ ਸੀ। ਪਰ ਐਸਟੀਐਫ਼ ਦੇ ਨੋਟਿਸ ਤੋਂ ਬਾਅਦ ਉਹ ਅਚਾਨਕ ਰੂਪੋਸ਼ ਹੋ ਗਏ ਸਨ।
Photo
ਐਸਟੀਐਫ਼ ਵਲੋਂ ਅਨਵਰ ਮਸੀਹ ਨਾਲ ਸੰਪਰਕ ਕਰਨ ਲਈ ਵਾਰ ਵਾਰ ਕੋਸ਼ਿਸ਼ ਕੀਤੀ ਜਾ ਰਹੀ ਸੀ। ਹੁਣ ਜਦੋਂ ਐਸਟੀਐਫ਼ ਵਲੋਂ ਅਨਵਰ ਮਸੀਹ ਨੂੰ ਮੁੜ ਨੋਟਿਸ ਭੇਜਣ ਦੀ ਤਿਆਰੀ ਕੀਤੀ ਜਾ ਰਹੀ ਸੀ ਤਾਂ ਉਹ ਅਪਣੇ ਸਮਰਥਕਾਂ ਸਮੇਤ ਅੰਮ੍ਰਿਤਸਰ ਸਥਿਤ ਐਸਟੀਐਫ਼ ਦਫ਼ਤਰ ਵਿਚ ਬਿਆਨ ਦਰਜ ਕਰਵਾਉਣ ਲਈ ਪਹੁੰਚ ਗਿਆ।
Photo
ਕਾਬਲੇਗੌਰ ਹੈ ਕਿ ਅਨਵਰ ਮਸੀਹ ਮਸੀਹ ਲੰਮਾ ਸਮਾਂ ਅਕਾਲੀ ਦਲ ਨਾਲ ਜੁੜੇ ਰਹੇ ਹਨ। ਉਹ ਪੰਜਾਬ ਕ੍ਰਿਸ਼ਚੀਅਨ ਫ਼ਰੰਟ ਦਾ ਆਗੂ ਹੈ। ਪਿਛਲੀ ਅਕਾਲੀ ਸਰਕਾਰ ਵੇਲੇ ਉਹ ਐਸਐਸ ਕੋਰਟ ਦੇ ਮੈਂਬਰ ਵਜੋਂ ਸਰਗਰਮ ਰਿਹਾ ਹੈ। ਹੁਣ ਅਨਵਰ ਮਸੀਹ ਦੀ ਮਾਲਕੀ ਵਾਲੀ ਕੋਠੀ ਵਿਚ ਨਸ਼ਾ ਫੈਕਟਰੀ ਮਿਲਣ ਤੋਂ ਬਾਅਦ ਐਸਟੀਐਫ਼ ਨੇ ਉਨ੍ਹਾਂ ਨੂੰ ਪੁਛਗਿੱਛ ਲਈ ਬੁਲਾਇਆ ਸੀ।
Photo
ਐਸਟੀਐਫ਼ ਅਨਵਰ ਮਸੀਹ ਤੋਂ ਸੁਖਵਿੰਦਰ ਸਿੰਘ ਨੂੰ ਕੋਠੀ ਕਿਰਾਏ 'ਤੇ ਦੇਣ ਅਤੇ ਉਨ੍ਹਾਂ ਵਿਚਾਲੇ ਸੰਪਰਕ ਕਿਸ ਤਰ੍ਹਾਂ ਹੋਇਆ? ਵਰਗੇ ਸਵਾਲਾਂ ਦੇ ਜਵਾਬ ਜਾਨਣਾ ਚਾਹੁੰਦੀ ਹੈ। ਅਨਵਰ ਮਸੀਹ ਵਲੋਂ ਕੋਠੀ ਕਿਰਾਏ 'ਤੇ ਦੇਣ ਸਮੇਂ ਰੈਂਟ ਐਗਰੀਮੈਂਟ ਨਾ ਕਰਨਾ ਅਤੇ ਕੋਠੀ ਵਿਚ ਚੱਲ ਰਹੇ ਇੰਨੇ ਵੱਡੇ ਨਸ਼ਾ ਕਾਰੋਬਾਰ ਬਾਰੇ ਉਸ ਦੀ ਅਨਜਾਣਤਾ ਜਿਹੇ ਸਵਾਲਾਂ ਦੇ ਜਵਾਬ ਜਾਨਣ ਲਈ ਐਸਟੀਐਫ਼ ਵਲੋਂ ਅਨਵਰ ਮਸੀਹ ਨੂੰ ਪੇਸ਼ ਹੋਣ ਲਈ ਕਿਹਾ ਗਿਆ ਸੀ।
