ਪਾਵਰਕਾਮ ਨੇ ਸਸਤੀ ਬਿਜਲੀ ਮੰਗ ਰਹੇ ਉਦਯੋਗਪਤੀਆਂ ਨੂੰ ਝਟਕਾ ਦਿੰਦਿਆਂ ਬਿਜਲੀ ਮਹਿੰਗੀ ਕਰ ਦਿਤੀ ਹੈ। ਪਾਵਰਕਾਮ ਦੇ ਹੁਕਮਾਂ ਮੁਤਾਬਕ ਜੇ ਫ਼ੈਕਟਰੀ ਮਾਲਕ......
ਲੁਧਿਆਣਾ, 9 ਜੂਨ (ਸੰਦੀਪ ਮਾਹਨਾ) : ਪਾਵਰਕਾਮ ਨੇ ਸਸਤੀ ਬਿਜਲੀ ਮੰਗ ਰਹੇ ਉਦਯੋਗਪਤੀਆਂ ਨੂੰ ਝਟਕਾ ਦਿੰਦਿਆਂ ਬਿਜਲੀ ਮਹਿੰਗੀ ਕਰ ਦਿਤੀ ਹੈ। ਪਾਵਰਕਾਮ ਦੇ ਹੁਕਮਾਂ ਮੁਤਾਬਕ ਜੇ ਫ਼ੈਕਟਰੀ ਮਾਲਕ ਸ਼ਾਮ 6 ਵਜੇ ਤੋਂ ਰਾਤ 10 ਵਜੇ ਤਕ ਫ਼ੈਕਟਰੀ ਚਲਾਉਂਦੇ ਹਨ ਤਾਂ ਉਨ੍ਹਾਂ ਨੂੰ ਪ੍ਰਤੀ ਯੂਨਿਟ 2 ਰੁਪਏ ਵੱਧ ਦੇਣੇ ਪੈਣਗੇ। ਰਾਤ ਨੂੰ ਫ਼ੈਕਟਰੀ ਚਲਾਉਣ ਦੀ ਪਹਿਲਾਂ ਜਿਹੜੀ ਛੋਟ ਦਿਤੀ ਜਾਂਦੀ ਸੀ, ਉਹ ਵੀ ਖ਼ਤਮ ਕਰ ਦਿਤੀ ਗਈ ਹੈ ਜਿਸ ਕਾਰਨ ਕਲ ਸ਼ਾਮ 6 ਵਜੇ ਹੀ ਸ਼ਹਿਰ ਦੇ ਇੰਡਸਟਰੀਅਲ ਏਰੀਆ 'ਚ ਕਰੀਬ ਇਕ ਹਜ਼ਾਰ ਫ਼ੈਕਟਰੀਆਂ 'ਚ ਛੁੱਟੀ ਕਰ ਦਿਤੀ ਗਈ।
ਪਾਵਰਕਾਮ ਦੇ ਇਨ੍ਹਾਂ ਹੁਕਮਾਂ ਦੇ ਵਿਰੋਧ 'ਚ ਚੈਂਬਰ ਆਫ਼ ਇੰਡਸਟਰੀ ਅਤੇ ਕਾਮਰਸ ਨੇ ਪਾਵਰਕਾਮ ਦੇ ਸੀ. ਐਮ. ਡੀ. ਨੂੰ ਪੱਤਰ ਲਿਖ ਕੇ ਪੈਣ ਵਾਲੇ ਘਾਟੇ ਬਾਰੇ ਦਸਿਆ ਹੈ। ਫ਼ੈਕਟਰੀਆਂ ਵਿਚ ਰਾਤ ਦੀਆਂ ਸ਼ਿਫ਼ਟਾਂ ਬੰਦ ਹੋਣ ਨਾਲ ਲਗਭਗ 20 ਫ਼ੀ ਸਦੀ ਉਤਪਾਦਨ ਘਟੇਗਾ। ਪਾਵਰਕਾਮ ਦੇ ਡਾਇਰੈਕਟਰ (ਕਮਰਸ਼ੀਅਲ) ਨੇ ਕਿਹਾ ਕਿ ਰੈਗੂਲੇਰਟਰੀ ਕਮਿਸ਼ਨ ਦੇ ਹੁਕਮਾਂ 'ਤੇ ਹੀ ਟੈਰਿਫ਼ ਸਬੰਧੀ ਨਵੀਂ ਵਿਵਸਥਾ ਲਾਗੂ ਕੀਤੀ ਗਈ ਹੈ। ਦਰਅਸਲ, ਪਹਿਲਾਂ ਪੰਜਾਬ ਵਿਚ ਚਾਰ ਹਜ਼ਾਰ ਮੇਗਾਵਾਟ ਬਿਜਲੀ ਦੀ ਕਮੀ ਸੀ ਜਿਸ ਕਾਰਨ ਰੋਜ਼ਾਨਾ ਸ਼ਾਮ ਇੰਡਸਟਰੀ 'ਤੇ 3 ਘੰਟੇ ਪੀਕ ਲੋਡ ਆਵਰਸ ਲਾਗੂ ਹੁੰਦੇ ਸਨ। ਜਿਹੜਾ ਮਾਲਕ ਫ਼ੈਕਟਰੀ ਚਲਾਏਗਾ, ਉਸ 'ਤੇ ਪੈਨਲਟੀ ਲੱਗੇਗੀ ਯਾਨੀ ਜਿਹੜੀ ਬਿਜਲੀ ਇੰਡਸਟਰੀ ਤੋਂ ਬਚਦੀ ਸੀ, ਉਸ ਨੂੰ ਘਰਾਂ ਨੂੰ ਦਿਤਾ ਜਾਂਦਾ ਸੀ। ਇਨ੍ਹੀਂ ਦਿਨੀਂ ਚਾਰ ਹਜ਼ਾਰ ਮੈਗਾਵਾਟ ਬਿਜਲੀ ਫ਼ਾਲਤੂ ਹੈ। ਇਸ ਕਾਰਨ ਇੰਡਸਟਰੀ ਸਰਕਾਰ ਤੋਂ ਮੰਗ ਕਰ ਰਹੀ ਸੀ ਕਿ ਉਸ ਨੂੰ 5 ਰੁਪਏ ਯੂਨਿਟ ਬਿਜਲੀ ਦਿਤੀ ਜਾਵੇ। ਉਮੀਦ ਸੀ ਕਿ ਨਵੇਂ ਟੈਰਿਫ਼ 'ਚ ਇਸ ਰੇਟ 'ਤੇ ਬਿਜਲੀ ਮਿਲੇਗੀ ਪਰ ਪਾਵਰਕਾਮ ਨੇ ਪਹਿਲੀ ਜੂਨ ਤੋਂ 2 ਰੁਪਏ ਰੇਟ ਵਧਾ ਕੇ ਉਦਯੋਗ ਜਗਤ ਨੂੰ ਝਟਕਾ ਦੇ ਦਿਤਾ ਹੈ।