ਕਾਂਸਟੇਬਲ ਨੇ ਪਤਨੀ ਅਤੇ ਧੀ ਨਾਲ 12ਵੀਂ ਮੰਜ਼ਲ ਤੋਂ ਛਾਲ ਮਾਰ ਕੇ ਦਿਤੀ ਜਾਨ

ਅਹਿਮਦਾਬਾਦ, 7 ਸਤੰਬਰ : ਅਹਿਮਦਾਬਾਦ 'ਚ ਬੁਧਵਾਰ ਨੂੰ  ਇਕ ਰਿਹਾਇਸ਼ੀ ਇਮਾਰਤ ਦੀ 12ਵੀਂ ਮੰਜ਼ਿਲ ਤੋਂ ਛਾਲ ਮਾਰ ਕੇ ਇਕ ਕਾਂਸਟੇਬਲ ਨੇ ਅਪਣੀ ਪਤਨੀ ਅਤੇ ਨਾਬਾਲਗ਼ ਧੀ ਨਾਲ ਖ਼ੁਦਕੁਸ਼ੀ ਕਰ ਲਈ | ਪੁਲਿਸ ਨੇ ਇਹ ਜਾਣਕਾਰੀ ਦਿਤੀ | ਸੋਲਾ ਪੁਲਿਸ ਥਾਣੇ ਦੇ ਐਨ. ਆਰ. ਵਾਘੇਲਾ ਨੇ ਦਸਿਆ ਕਿ ਸ਼ੁਰੂਆਤੀ ਜਾਂਚ ਤੋਂ ਅਜਿਹਾ ਲਗਦਾ ਹੈ ਕਿ ਕਿਸੇ ਝਗੜੇ ਮਗਰੋਂ ਜੋੜੇ ਨੇ ਇਹ ਕਦਮ ਚੁਕਿਆ ਹੋਵੇਗਾ | ਮਿ੍ਤਕ ਦੀ ਪਛਾਣ ਕਾਂਸਟੇਬਲ ਕੁਲਦੀਪ ਸਿੰਘ ਯਾਦਵ ਦੇ ਰੂਪ 'ਚ ਕੀਤੀ ਗਈ ਹੈ, ਜੋ ਵਸਤਪੁਰ ਪੁਲਿਸ ਥਾਣੇ 'ਚ ਤਾਇਨਾਤ ਸੀ |
ਮਿ੍ਤਕ ਕਾਂਸਟੇਬਲ ਦੀ ਪਤਨੀ ਦਾ ਨਾਂ ਰਿੱਧੀ ਅਤੇ 3 ਸਾਲਾ ਧੀ ਦਾ ਨਾਂ ਆਕਾਂਸ਼ੀ ਸੀ | ਪੁਲਿਸ ਅਧਿਕਾਰੀ ਨੇ ਕਿਹਾ ਕਿ ਯਾਦਵ ਅਪਣੀ ਪਤਨੀ ਅਤੇ ਧੀ ਨਾਲ ਗੋਟਾ ਇਲਾਕੇ 'ਚ ਬਹੁ-ਮੰਜ਼ਿਲਾ ਇਮਾਰਤ ਦੀ 12ਵੀਂ ਮੰਜ਼ਿਲ 'ਤੇ ਰਹਿੰਦਾ ਸੀ | ਇਮਾਰਤ 'ਚ ਰਹਿੰਦੇ ਹੋਏ ਵਸਨੀਕਾਂ ਮੁਤਾਬਕ ਜੋੜੇ ਨੇ ਅਪਣੀ ਧੀ ਨਾਲ 12ਵੀਂ ਮੰਜ਼ਿਲ ਤੋਂ ਦੇਰ ਰਾਤ ਡੇਢ ਵਜੇ ਛਾਲ ਮਾਰ ਦਿਤੀ | ਤਿੰਨਾਂ ਦੀ ਮੌਕੇ 'ਤੇ ਹੀ ਮੌਤ ਹੋ ਗਈ | ਇਮਾਰਤ ਦੇ ਇਕ ਵਾਸੀ ਨੇ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਦਸਿਆ ਕਿ ਕਾਂਸਟੇਬਲ ਦੀ ਪਤਨੀ ਰਿੱਧੀ ਨੇ ਪਹਿਲਾਂ ਛਾਲ ਮਾਰੀ ਅਤੇ ਉਸ ਤੋਂ ਬਾਅਦ ਯਾਦਵ ਨੇ ਅਪਣੀ ਧੀ ਨਾਲ ਛਾਲ ਮਾਰ ਦਿਤੀ | ਪੁਲਿਸ ਅਧਿਕਾਰੀ ਨੇ ਕਿਹਾ ਕਿ ਉਸੇ ਮੰਜ਼ਿਲ 'ਤੇ ਰਹਿਣ ਵਾਲੀ ਯਾਦਵ ਦੀ ਭੈਣ ਮੁਤਾਬਕ ਦੋਹਾਂ ਵਿਚ ਬਹੁਤ ਝਗੜੇ ਹੁੰਦੇ ਸਨ | ਅਧਿਕਾਰੀ ਨੇ ਕਿਹਾ ਕਿ ਲਾਸ਼ਾਂ ਨੂੰ  ਪੋਸਟਮਾਰਟਮ ਲਈ ਭੇਜ ਕੇ ਘਟਨਾ ਦੀ ਜਾਂਚ ਕੀਤੀ ਜਾ ਰਹੀ ਹੈ |     (ਪੀਟੀਆਈ)