ਸੰਸਦ ਦੇ ਘਿਰਾਉ ਲਈ ਯੂਥ ਕਾਂਗਰਸ ਦੇ ਵੱਡੇ ਕਾਫ਼ਲੇ ਦਿੱਲੀ ਵਲ ਵਧੇ
ਵੱਖ-ਵੱਖ ਜ਼ਿਲਿ੍ਹਆਂ ਵਿਚੋਂ ਬੱਸਾਂ ਤੇ ਹੋਰ ਸਾਧਨਾਂ ਰਾਹੀਂ ਹੋਏ ਰਵਾਨਾ
ਚੰਡੀਗੜ੍ਹ, 8 ਫ਼ਰਵਰੀ (ਗੁਰਉਪਦੇਸ਼ ਭੁੱਲਰ): ਪੰਜਾਬ ਯੂਥ ਕਾਂਗਰਸ ਵਲੋਂ ਸਰਕਾਰ ਦੀਆਂ ਰੋਕਾਂ ਦੇ ਬਾਵਜੂਦ 9 ਫ਼ਰਵਰੀ ਨੂੰ ਸੰਸਦ ਦੇ ਘਿਰਾਉ ਦੀਆਂ ਤਿਆਰੀਆਂ ਮੁਕੰਮਲ ਕਰ ਲਈਆਂ ਗਈਆਂ ਹਨ | ਅੱਜ ਪੰਜਾਬ ਦੇ ਵੱਖ-ਵੱਖ ਜ਼ਿਲਿ੍ਹਆਂ ਵਿਚੋਂ ਬੱਸਾਂ ਦੀ ਰਵਾਨਗੀ ਸ਼ੁਰੂ ਹੋ ਚੁੱਕੀ ਹੈ ਤੇ ਦੇਰ ਰਾਤ ਤਕ ਇਨ੍ਹਾਂ ਦੇ ਦਿੱਲੀ ਦਾਖ਼ਲ ਹੋਣ ਦੀ ਯੋਜਨ ਹੈ | ਪੰਜਾਬ ਯੂਥ ਕਾਂਗਰਸ ਦੇ ਪ੍ਰਧਾਨ ਬਰਿੰਦਰ ਢਿੱਲੋਂ ਨੇ ਦਸਿਆ ਕਿ ਸੰਸਦ ਦਾ ਘਿਰਾਉ ਕਰਨ ਲਈ ਹਰ ਹਾਲਤ ਵਿਚ ਨੌਜਵਾਨ ਅੱਗੇ ਵਧਣਗੇ ਤੇ ਅਪਣਾ ਰੋਸ ਜ਼ਰੂਰ ਦਰਜ ਕਰਵਾਉਣਗੇ | ਬੱਸਾਂ ਤੋਂ ਇਲਾਵਾ ਕਾਫ਼ੀ ਮੈਂਬਰ ਹੋਰ ਸਾਧਨਾਂ ਰਾਹੀਂ ਵੀ ਦਿੱਲੀ ਰਵਾਨਾ ਹੋਏ ਹਨ | ਉਨ੍ਹਾਂ ਕਿਹਾ ਕਿ ਕਾਂਗਰਸ ਪੂਰੀ ਤਰ੍ਹਾਂ ਡਟ ਕੇ ਕਿਸਾਨਾਂ ਨਾਲ ਖੜੀ ਹੈ ਤੇ ਯੂਥ ਕਾਂਗਰਸ ਵੀ ਸ਼ੁਰੂ ਤੋਂ ਹੀ ਕਿਸਾਨਾਂ ਦੇ ਅੰਦੋਲਨ ਲਈ ਕੰਮ ਕਰ ਰਹੀ ਹੈ | ਯੂਥ ਕਾਂਗਰਸ ਦਿੱਲੀ ਪਹੁੰਚ ਕੇ ਸੱਭ ਤੋਂ ਪਹਿਲਾਂ ਸੰਕੇਤਕ ਰੂਪ ਵਿਚ ਟਰੈਕਟਰ ਵੀ ਸਾੜ ਚੁੱਕੀ ਹੈ |
