ਬਰਨਾਲਾ ਪ੍ਰਵਾਰ ਦੇ ਘਰ ਭਾਜਪਾ ਆਗੂ ਦੇ ਪਹੁੰਚਣ ’ਤੇ ਕਿਸਾਨਾਂ ਨੇ ਘੇਰਿਆ ਘਰ
ਬੀਬੀ ਬਰਨਾਲਾ ਨਾਲ ਬੰਦ ਕਮਰਾ ਮੀਟਿੰਗ ਕਰਨ ਵਾਲੇ ਆਗੂ ਨੇ ਪਿਛਲੇ ਗੇਟ ਤੋਂ ਲੰਘ ਕੇ ਛੁਡਾਇਆ ਖਹਿੜਾ
ਬਰਨਾਲਾ, 8 ਜੂਨ (ਹਰਜਿੰਦਰ ਸਿੰਘ ਪੱਪੂ) : ਪੰਜਾਬ ਦੀ ਰਾਜਨੀਤੀ ਵਿਚ ਵੱਡੇ ਨਾਂ ਨਾਲ ਜਾਣੇ ਜਾਂਦੇ ਬਰਨਾਲਾ ਪ੍ਰਵਾਰ ਦੇ ਗ੍ਰਹਿ ਵਿਖੇ ਇਕ ਭਾਜਪਾ ਆਗੂ ਗੁਰਤੇਜ ਸਿੰਘ ਢਿੱਲੋਂ ਦੇ ਪਹੁੰਚਣ ਦੀ ਭਿਣਕ ਜਦੋਂ ਕਿਸਾਨਾਂ ਨੂੰ ਪਈ ਤਾਂ ਵੱਡੀ ਗਿਣਤੀ ਵਿਚ ਕਿਸਾਨ ਇਕੱਠੇ ਹੋਣੇ ਸ਼ੁਰੂ ਹੋ ਗਏ। ਦੂਜੇ ਪਾਸੇ ਪੁਲਿਸ ਅਧਿਕਾਰੀਆਂ ਨੂੰ ਪਤਾ ਲੱਗਣ ਤੇ ਉਨ੍ਹਾਂ ਵੱਡੀ ਗਿਣਤੀ ਵਿਚ ਪੁਲਿਸ ਫ਼ੋਰਸ ਭੇਜ ਦਿਤੀ। ਬਰਨਾਲਾ ਪ੍ਰਵਾਰ ਦੀ ਕੋਠੀ ਅੱਗੇ ਕਿਸਾਨਾਂ ਵਲੋਂ ਧਰਨਾ ਦਿਤਾ ਗਿਆ। ਉਧਰ ਕਿਸਾਨ ਆਗੂ ਬਰਨਾਲਾ ਪ੍ਰਵਾਰ ਤੇ ਭਾਜਪਾ ਵਿਰੁਧ ਭੜਾਸ ਕੱਢ ਰਹੇ ਸਨ ਤੇ ਦੂਜੇ ਪਾਸੇ ਭਾਜਪਾ ਆਗੂ ਵਿਉਂਤ ਬਣਾ ਰਿਹਾ ਸੀ ਕਿ ਕਿਵੇਂ ਨਿਕਲਿਆ ਜਾਵੇ। ਅਖ਼ੀਰ ਬਰਨਾਲਾ ਪ੍ਰਵਾਰ ਵਲੋਂ ਭਾਜਪਾ ਆਗੂ ਨੂੰ ਪਿਛਲੇ ਗੇਟ ਰਾਹੀਂ ਕੱਢ ਦਿਤਾ ਗਿਆ। ਜਲਦੀ ’ਚ ਘਰੋਂ ਨਿਕਲ ਰਹੇ ਭਾਜਪਾ ਆਗੂ ਦੀ ਗੱਡੀ ਮੋਟਰਸਾਈਕਲ ਨਾਲ ਟਕਰਾ ਗਈ। ਜਾਣਕਾਰੀ ਪ੍ਰਾਪਤ ਕਰਨ ਲਈ ਜਦੋਂ ਸਾਬਕਾ ਮੁੱਖ ਮੰਤਰੀ ਸਰਦਾਰ ਸੁਰਜੀਤ ਸਿੰਘ ਬਰਨਾਲਾ ਦੀ ਧਰਮਪਤਨੀ ਬੀਬੀ ਸੁਰਜੀਤ ਕੌਰ ਬਰਨਾਲਾ ਨਾਲ ਗੱਲ ਕੀਤੀ ਗਈ ਤਾਂ ਉਨ੍ਹਾਂ ਦਸਿਆ ਕਿ ਗੁਰਤੇਜ ਸਿੰਘ ਢਿੱਲੋਂ ਉਨ੍ਹਾਂ ਦੇ ਰਿਸ਼ਤੇਦਾਰ ਹਨ, ਰਾਤ ਇਥੇ ਹੀ ਸਨ ਸਵੇਰੇ ਆ ਕੇ ਕਿਸਾਨਾਂ ਵਲੋਂ ਬਿਨਾਂ ਜਾਣਕਾਰੀ ਤੋਂ ਧਰਨਾ ਦੇਣਾ ਚੰਗੀ ਗੱਲ ਨਹੀਂ।
8===4ਬੀ, ਸੀ