ਮਾਮਲਾ ਜਸਟਿਸ ਸਾਰੋਂ ਨੂੰ ਗੁਰਦੁਆਰਾ ਚੋਣ ਕਮਿਸ਼ਨਰ ਲਗਾਉਣ ਦਾ
ਪਟਿਆਲਾ : ਜਿਊਂ ਹੀ ਭਾਰਤ ਸਰਕਾਰ ਨੇ, ਹੱਦੋਂ ਵੱਧ ਲੰਬੇ ਸਮੇਂ ਤੋਂ ਲਮਕਦੀਆਂ ਅਤੇ ਅਨਿਸ਼ਚਿ ਦਸ਼ਾ ਵਿੱਚ ਪਈਆਂ, ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੀਆਂ ਚੋਣਾਂ ਕਰਵਾਉਂਣ ਲਈ ਜਸਟਿਸ ਸੁਰਿੰਦਰ ਸਿੰਘ ਸਾਰੋਂ ਦੀ ਗੁਰਦੁਆਰਾ ਚੋਂਣ ਕਮਿਸ਼ਨਰ ਦੇ ਤੌਰ ਤੇ ਨਿਯੁਕਤੀ ਦਾ ਐਲਾਨ ਕੀਤਾ ਹੈ, ਉਸ ਦੇ ਨਾਲ ਹੀ ਤੁਰੰਤ, ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਮੈਂਬਰਾਂ ਤੇ ਅਧਾਰਿਤ, ਇਮਾਰਤੀ ਕਮੇਟੀਆਂ ਅਤੇ ਕਾਰ ਸੇਵਾ ਵਾਲੇ ਬਾਬਿਆਂ ਨੇਂ ਗੁਰਦੁਆਰਾ ਸਾਹਿਬਾਨ ਦੀਆਂ ਪੁਰਾਨੀਆਂ ਤੇ ਮਜ਼ਬੂਤ ਇਮਾਰਤਾ ਨੂੰ ਢਾਹ ਕੇ, ਨਵੀਆਂ ਉਸਾਰੀਆਂ ਕਰਨ ਲਈ ਮਸ਼ਕਾਂ ਤੇਜ਼ ਕਰ ਦਿੱਤੀਆਂ ਹਨ,
ਜੋ ਕਿ ਸਰਾਸਰ ਗੁਰੂ ਘਰ ਦੀਆਂ ਗੋਲਕਾਂ ਉੱਤੇ ਜਾਂਦੀ ਵਾਰ ਦੇ ਡਾਕੇ ਮਾਰਨ ਵਾਲੀ ਗੱਲ ਹੈ।ਜ਼ਿਕਰ ਯੋਗ ਹੈ ਕਿ ਬਾਦਲ ਦਲ ਦੇ ਕੁੱਝ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਮੈਂਬਰਾਂ ਦਾ ਤਾਂ ਸਾਰਾ ਕਾਰ-ਵਿਹਾਰ ਤੇ ਤੋਰੀ-ਫੁਲਕਾ ਹੀ, ਕਾਰ ਸੇਵਾ ਵਾਲੇ ਬਾਬਿਆਂ ਦੀ ਪੂੰਜੀ ਤੇ ਨਿਰਭਰ ਹੈ ਜੋ ਗੁਰਦੁਆਰਾ ਸਾਹਿਬਾਨ ਦੀਆਂ ਪੁਰਾਣੀਆਂ ਪੁਖਤਾ ਇਮਾਰਤਾਂ ਨੂੰ ਮਲੀਆ-ਮੇਟ ਕਰਕੇ ਨਵੀਂ ਉਸਾਰੀ ਦੀ ਸੇਵਾ ਲੈਣ ਲਈ, ਇਨ੍ਹਾਂ ਭੁੱਖੜ ਤੇ ਲਾਲਚੀ ਮੈਂਬਰਾਂ ਨੂੰ ਅੰਦਰ-ਖਾਤੇ ਵੱਡੀਆਂ ਭੇਟਾਵਾਂ ਦੇ ਕੇ, ਕੋਈ ਨਾ ਲੋਈ ਉਸਾਰੀ ਦਾ ਕੰਮ, ਬਿਨਾਂ ਕਾਰਨ ਹੀ ਛੇੜੀਂ ਰੱਖਦੇ ਹਨ।
ਗੁਰਦੁਆਰਾ ਸ੍ਰੀ ਫਤਿਹਗੜ੍ਹ ਸਾਹਿਬ (ਸਰਹੰਦ) ਵਿਖੇ ਚੰਗੀਆਂ-ਭਲੀਆਂ ਦਫ਼ਤਰੀ ਇਮਾਰਤਾਂ ਦੇ ਹੁੰਦੇ ਹੋਏ, ਗੁਰਦੁਆਰਾ ਸਾਹਿਬ ਤੋਂ ਦੂਰ ਇੱਕ ਹੋਰ ਨਵਾਂ ਪ੍ਰਬੰਧਕੀ ਕੰਪਲੈਕਸ ਉਸਾਰ ਲਿਆ ਹੈ। ਜਿੱਥੇ ਇਹ ਨਵਾਂ ਪ੍ਰਬੰਧਕੀ ਦਫ਼ਤਰ, ਸ਼ਰਧਾਲੂ ਸਿੱਖ ਸੰਗਤ ਦੀ ਦ੍ਰਿਸ਼ਟੀ ਤੋਂ ਮੁਕੰਮਲ ਤੌਰ ਤੇ ਓਝਲ ਹੈ ਉਸ ਦੇ ਨਾਲ ਹੀ ਇਸਦੀ ਉਸਾਰੀ ਵਿੱਚ ਵੀ ਅਨੇਕਾਂ ਹੀ ਖਾਮੀਆਂ ਹਨ। ਅਫ਼ਸੋਸ ਕਿ ਇਮਾਰਤੀ ਕਮੇਟੀ ਦੇ ਮੈਂਬਰਾਂ ਜਾਂ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਇੰਜਨੀਅਰਿੰਗ ਵਿੰਗ ਦੇ ਨਿਗਰਾਨਾਂ ਨੇ, ਇਸ ਉਸਾਰੀ ਦੇ ਕੰਮ ਦੀ ਸਹੀ ਢੰਗ ਨਾਲ ਕੋਈ ਦੇਖ-ਰੇਖ ਨਹੀਂ ਕੀਤੀ।
ਗੁਰਦੁਆਰਾ ਸ੍ਰੀ ਫਤਿਹਗੜ੍ਹ ਸਾਹਿਬ (ਸਰਹੰਦ) ਵਿਖੇ ਮਾਹਰਾਜਾ ਯਾਦਵਿੰਦਰ ਸਿੰਘ ਪਟਿਆਲਾ ਵੱਲੋਂ ਉਸਾਰੀ ਗਈ ਸ਼ਾਨਦਾਰ ਦਰਸ਼ਨੀ ਡਿਊਢੀ ਨੂੰ ਵੀ ਕਿਸੇ ਸਹੀ ਉਪਯੋਗ ਵਿੱਚ ਨਹੀਂ ਲਿਆਂਦਾ ਜਾ ਰਿਹਾ, ਉਸਦੇ ਵੀ ਸਾਰੇ ਕਮਰਿਆਂ ਨੂੰ ਲੰਬੇ ਸਮੇਂ ਤੋਂ ਤਾਲੇ ਜੜੇ ਹੋਏ ਹਨ। ਏਸੇ ਤਰ੍ਹਾਂ ਪ੍ਰਬੰਧਕੀ ਵਿੰਗ ਦੇ ਸਾਰੇ ਪੁਰਾਣੇ ਕਮਰਿਆਂ ਦੀ ਵੀ ਕਈ ਸਾਲ ਤੋਂ ਤਾਲਾਬੰਦੀ ਕੀਤੀ ਹੋਈ ਜੋ ਕਿਸੇ ਵੀ ਵਰਤੋਂ ਵਿੱਚ ਨਹੀਂ ਲਿਆਂਦੇ ਜਾ ਰਹੇ।
ਬੰਦਾ ਬਹਾਦਰ ਗੇਟ ਤੋਂ ਦਰਸ਼ਨੀ ਡਿਉਢੀ ਤੱਕ ਮਾਰਗ ਦੇ ਦੋਹਵੇਂ ਪਾਸੀਂ ਸ਼ਾਨਦਾਰ ਫੁੱਲ-ਬੂਟਿਆਂ ਤੇ ਹਰਿਆਵਲੇ ਘਾਹ ਦੀਆਂ ਪਾਰਕਾਂ ਸਨ ਉਨ੍ਹਾਂ ਨੂੰ ਵੀ ਬਰਬਾਦ ਕਰ ਦਿੱਤਾ ਗਿਆ ਹੈ। ਹੁਣ ਗੁਰਦੁਆਰਾ ਸਾਹਿਬ ਦੇ ਪੁਰਾਣੇ ਦਫ਼ਤਰਾਂ ਨੂੰ ਢਾਹ ਕੇ ਓਥੇ ਪਾਰਕਾਂ ਬਣਾਉਂਣ ਦੀ ਤੁਗਲਕੀ ਯੋਜਨਾ, ਕੇਵਲ ਗੁਰੂ ਘਰ ਦੀਆਂ ਗੋਲਕਾਂ ਨੂੰ ਹਜ਼ਮ ਕਰਨ ਲਈ ਉਲੀਕੀ ਜਾ ਰਹੀ ਹੈ ਜਿਸ ਨੂੰ ਸਿੱਖ ਸੰਗਤਾਂ ਕਿਸੇ ਵੀ ਕੀਮਤ ਤੇ ਬਰਦਾਸ਼ਤ ਨਹੀਂ ਕਰਨਗੀਆਂ ਅਤੇ ਨਾ ਹੀ ਇਨ੍ਹਾਂ ਇਮਾਰਤਾਂ ਨੂੰ ਢਾਹ-ਢੇਰੀ ਕਰਨ ਦੀ ਸੰਗਤਾਂ ਵੱਲੋਂ ਆਗਿਆ ਹੀ ਦਿੱਤੀ ਜਾਵੇਗੀ।
ਹੁਣ ਜਦੋਂ ਜਸਟਿਸ ਸੁਰਿੰਦਰ ਸਿੰਘ ਸਾਰੋਂ ਦੇ ਮੁੱਖ ਗੁਰਦੁਆਰਾ ਚੋਂਣ ਕਮਿਸ਼ਨਰ ਨਿਯੁਕਤ ਹੋਣ ਨਾਲ, ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੀਆਂ ਚੋਣਾ ਦੀ ਪਰਕਿਰਿਆ ਦਾ ਅਰੰਭ ਹੋ ਚੁੱਕਾ ਹੈ ਤਾਂ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਮੈਂਬਰਾਂ ਤੇ ਅਧਾਰਿਤ, ਸਾਰੀਆਂ ਇਮਾਰਤੀ ਕਮੇਟੀਆਂ ਫੌਰੀ ਤੌਰ ਤੇ ਭੰਗ ਕਰ ਦੇਣੀਆਂ ਚਾਹੀਦੀਆਂ ਹਨ ਅਤੇ ਗੁਰਦੁਆਰਾ ਸਾਹਿਬਾਨ ਦੀ ਇਮਾਰਤ ਉਸਾਰੀ ਦੀ ਕਿਸੇ ਵੀ ਨਵੀਂ ਤਜਵੀਜ਼ ਜਾਂ ਉਸਦੀ ਵਿਉਂਤ ਬਣਾਉਣ ਦੀ ਯੋਜਨਾ ਨੂੰ, ਇਨ੍ਹਾਂ ਮੈਂਬਰਾਂ ਦੇ ਭ੍ਰਿਸ਼ਟ ਅਕਸ ਤੋਂ ਹਰ ਹੀਲੇ ਦੂਰ ਰੱਖਣਾਂ ਚਾਹੀਦਾ ਹੈ।
ਹੁਣ ਜਦੋਂ , ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੀਆਂ ਚੋਣਾਂ ਸਿਰ ਤੇ ਹਨ ਤਾਂ ਇਮਾਰਤ ਉਸਾਰੀ ਦੀ ਸਾਰੀ ਨਵੀਂ ਵਿਉਂਤ ਬੰਦੀ, ਨਵੀਂ ਚੁਣੀ ਜਾਣ ਵਾਲੀ ਕਮੇਟੀ ਤੇ ਹੀ ਛੱਢ ਦੇਣੀ ਬਣਦੀ ਹੈ। ਸ੍ਰੀ ਅਕਾਲ ਤਖਤ ਸਾਹਿਬ ਦੇ ਜਥੇਦਾਰ ਸਿੰਘ ਸਾਹਿਬ ਗਿਆਨੀ ਹਰਪ੍ਰੀਤ ਸਿੰਘ ਜੀ ਨੂੰ ਤੁਰੰਤ ਦਖਲ ਦੇ ਕੇ ਇਹ ਜਾਂਦੀ ਵਾਰ ਦੀ 'ਅਬਦਾਲੀ ਲੁੱਟ' ਤੋਂ ਗੁਰੂ ਕੀਆਂ ਗੋਲਕਾਂ ਨੂੰ ਬਚਾਉਂਣਾ ਚਾਹੀਦਾ ਹੈ।
ਬੀਰ ਦਵਿੰਦਰ ਸਿੰਘ
ਸਾਬਕਾ ਡਿਪਟੀ ਸਪੀਕਰ
ਪੰਜਾਬ ਵਿਧਾਨ ਸਭਾ
ਸੰਪਰਕ 9814033362