ਆਪ ਨੇਤਾ ਦੀ ਹਿੰਦੂ ਦੇਵਤਿਆਂ ਵਿਰੁਧ ਟਿਪਣੀ ਤੋਂ ਬਾਅਦ ਭਖਿਆ ਵਿਵਾਦ

ਗੁਜਰਾਤ ਵਿਚ ਕੇਜਰੀਵਾਲ ਦੇ ਲੱਗੇ ਕਾਲੇ ਪੋਸਟਰ : ਲਿਖਿਆ, 'ਮੈਂ ਹਿੰਦੂਵਾਦ ਨੂੰ  ਪਾਗ਼ਲਪਨ ਸਮਝਦਾ ਹਾਂ'

ਅਹਿਮਦਾਬਾਦ, 8 ਅਕਤੂਬਰ : ਦਿੱਲੀ ਸਰਕਾਰ ਵਿਚ ਮੰਤਰੀ ਰਾਜੇਂਦਰ ਪਾਲ ਗੌਤਮ ਵਲੋਂ ਹਿੰਦੂ ਦੇਵੀ-ਦੇਵਤਿਆਂ ਪ੍ਰਤੀ ਅਪਮਾਨਜਨਕ ਟਿਪਣੀ ਦਾ ਮਾਮਲਾ ਜ਼ੋਰ ਫੜਦਾ ਜਾ ਰਿਹਾ ਹੈ | ਦਿੱਲੀ ਤੋਂ ਲੈ ਕੇ ਭਾਜਪਾ ਸ਼ਾਸਤ ਗੁਜਰਾਤ ਤਕ ਵਿਰੋਧ ਦੇਖਣ ਨੂੰ  ਮਿਲ ਰਿਹਾ ਹੈ | ਸਨਿਚਰਵਾਰ ਨੂੰ  ਗੁਜਰਾਤ ਦੇ ਰਾਜਕੋਟ ਅਤੇ ਅਹਿਮਦਾਬਾਦ ਵਿਚ ਆਮ ਆਦਮੀ ਪਾਰਟੀ ਵਿਰੁਧ ਕਾਲੇ ਹੋਰਡਿੰਗ ਲਗਾਏ ਗਏ |
ਇਨ੍ਹਾਂ ਹੋਰਡਿੰਗਾਂ 'ਤੇ ਦਿੱਲੀ ਦੇ ਮੁੱਖ ਮੰਤਰੀ ਅਰਵਿੰਦ ਕੇਜਰੀਵਾਲ ਨੂੰ  ਟੋਪੀ ਪਾਈ ਦਿਖਾਇਆ ਗਿਆ ਹੈ ਅਤੇ ਲਿਖਿਆ ਹੋਇਆ ਹੈ, 'ਮੈਂ ਹਿੰਦੂਵਾਦ ਨੂੰ  ਪਾਗਲਪਨ ਸਮਝਦਾ ਹਾਂ' | ਇਕ ਹੋਰ ਹੋਰਡਿੰਗ ਵਿਚ ਲਿਖਿਆ ਸੀ, Tਮੈਂ ਬ੍ਰਹਮਾ, ਵਿਸ਼ਨੂੰ, ਮਹੇਸ਼, ਰਾਮ ਅਤੇ ਕਿ੍ਸ਼ਨ ਨੂੰ  ਭਗਵਾਨ ਨਹੀਂ ਮੰਨਦਾ |'' ਇਸ ਹੋਰਡਿੰਗ ਵਿਚ ਅੱਗੇ ਲਿਖਿਆ ਗਿਆ ਹੈ ਕਿ ਇਹ ਆਮ ਆਦਮੀ ਪਾਰਟੀ ਦੇ ਸੰਸਕਾਰ ਹਨ | ਬਰੋਟਾ ਵਿਚ ਅਜਿਹੇ ਦਰਜਨਾਂ ਹੋਰਡਿੰਗ ਹਨ | ਰਾਜੇਂਦਰ ਪਾਲ ਗੌਤਮ ਕੇਜਰੀਵਾਲ ਸਰਕਾਰ ਵਿਚ ਸਮਾਜ ਕਲਿਆਣ ਮੰਤਰੀ ਹਨ |

ਇਸ ਦੌਰਾਨ ਭਾਜਪਾ ਦਾ ਕਹਿਣਾ ਹੈ ਕਿ ਰਾਜਿੰਦਰ ਪਾਲ ਦੇ ਬਿਆਨ ਕਾਰਨ ਸਮਾਜ ਵਿਚ ਦੁਸ਼ਮਣੀ ਪੈਦਾ ਹੋ ਗਈ ਹੈ, ਉਹ ਹਿੰਦੂ ਧਰਮ ਦਾ ਅਪਮਾਨ ਕਰ ਰਿਹਾ ਹੈ, ਇਸ ਲਈ ਕੇਜਰੀਵਾਲ ਨੂੰ  ਉਨ੍ਹਾਂ ਨੂੰ  ਤੁਰਤ ਬਰਖ਼ਾਸਤ ਕਰਨਾ ਚਾਹੀਦਾ ਹੈ | ਹਾਲਾਂਕਿ ਸ਼ੁਕਰਵਾਰ ਸ਼ਾਮ ਤਕ ਰਾਜੇਂਦਰ ਪਾਲ ਨੇ ਇਸ ਮਾਮਲੇ 'ਚ ਮੁਆਫ਼ੀ ਵੀ ਮੰਗ ਲਈ ਸੀ | ਉਨ੍ਹਾਂ ਕਿਹਾ ਕਿ ਜੇਕਰ ਉਨ੍ਹਾਂ ਦੇ ਬਿਆਨ ਨਾਲ ਕਿਸੇ ਦੇ ਵਿਸ਼ਵਾਸ ਨੂੰ  ਠੇਸ ਪਹੁੰਚੀ ਹੈ ਤਾਂ ਉਹ ਇਸ ਲਈ ਮੁਆਫ਼ੀ ਮੰਗਦੇ ਹਨ |    (ਏਜੰਸੀ)