ਪੰਜਾਬ ਦੇ ਬਿਜਲੀ ਸੰਕਟ ਨਾਲ ਨਿਪਟਣ ਲਈ ਆਖ਼ਰ ਪੰਜਾਬ ਬਿਜਲੀ ਨਿਗਮ ਨੇ ਅਪਣੇ ਦੋ ਤਾਪ ਬਿਜਲੀ ਘਰ ਭਖਾਏ
ਲਹਿਰਾ ਮੁਹੱਬਤ ਅਤੇ ਰੋਪੜ ਦੇ ਤਾਪ ਬਿਜਲੀ ਘਰ ਤੋਂ ਪੈਦਾ ਹੋਣ ਲੱਗੀ ਹੈ 422 ਮੈਗਾਵਾਟ ਬਿਜਲੀ
ਪਟਿਆਲਾ, 8 ਨਵੰਬਰ (ਜਸਪਾਲ ਸਿੰਘ ਢਿੱਲੋਂ): ਇਸ ਵੇਲੇ ਪੰਜਾਬ ਅੰਦਰ ਕਿਸਾਨੀ ਅੰਦੋਲਨ ਕਾਰਨ ਰੇਲ ਵਿਭਾਗ ਨੇ ਕਿਸਾਨਾਂ ਵਲੋਂ ਰੇਲ ਪਟੜੀਆਂ ਖ਼ਾਲੀ ਹੋਣ ਦੇ ਬਾਵਰੂਦ ਵੀ ਰੇਲਾਂ ਰੋਕੀਆਂ ਹੋਈਆਂ ਹਨ ਜਿਸ ਕਾਰਨ ਨਿਜੀ ਤਾਪ ਬਿਜਲੀ ਘਰ ਇਸ ਵੇਲੇ ਕੋਲੇ ਤੋਂ ਸੱਖਣੇ ਹੋ ਗਏ ਹਨ ਇਸ ਲਈ ਨਿਜੀ ਤਾਪ ਬਿਜਲੀ ਘਰਾਂ ਦਾ ਇਸ ਵੇਲੇ ਉਤਪਾਦਨ ਠੱਪ ਹੈ।
ਇਸ ਦੇ ਮੱਦੇ ਨਜ਼ਰ ਬਿਜਲੀ ਨਿਗਮ ਨੇ ਹੁਣ ਅਪਣੇ ਤਾਪ ਬਿਜਲੀ ਘਰ ਜਿਨ੍ਹਾਂ 'ਚ ਗੁਰੂ ਗੋਬਿੰਦ ਸਿੰਘ ਸੁਪਰ ਤਾਪ ਬਿਜਲੀ ਘਰ ਰੋਪੜ ਅਤੇ ਗੁਰੂ ਹਰਗੋਬਿੰਦ ਸਾਹਿਬ ਤਾਪ ਬਿਜਲੀ ਘਰ ਲਹਿਰਾ ਮੁਹੱਬਤ ਦੇ ਇਕ ਇਕ ਯੂਨਿਟ ਨੂੰ ਭਖਾ ਲਿਆ ਹੈ ਤੇ ਇਨ੍ਹਾਂ ਤੋਂ ਕਰਮਵਾਰ 192 ਅਤੇ 228 ਮੈਗਾਵਾਟ ਬਿਜਲੀ ਉਤਪਾਦਨ ਹੋਣਾ ਸ਼ੁਰੂ ਹੋ ਗਿਆ ਹੈ।
ਰਾਜ ਅੰਦਰ ਇਸ ਵੇਲੇ ਬਿਜਲੀ ਦੀ ਖਪਤ ਦਾ ਅੰਕੜਾ 4819 ਮੈਗਾਵਾਟ ਹੈ। ਇਸ ਦੇ ਟਾਕਰੇ ਲਈ ਬਿਜਲੀ ਨਿਗਮ ਵਲੋਂ ਹੁਣ ਪਣ ਬਿਜਲੀ ਘਰਾਂ ਤੋਂ ਵੀ 449 ਮੈਗਾਵਾਟ ਬਿਜਲੀ ਪ੍ਰਾਪਤ ਹੋ ਰਹੀ ਹੈ। ਇਸ ਨਾਲ ਹੀ ਹਿਮਾਚਲ ਪ੍ਰਦੇਸ਼ ਸਥਿਤ ਜੋਗਿੰਦਰ ਨਗਰ ਦੇ ਸ਼ਾਨਨ ਬਿਜਲੀ ਘਰ ਤੋਂ ਵੀ 93 ਮੈਗਵਾਟ ਬਿਜਲੀ ਦਾ ਯੋਗਦਾਨ ਪਾਇਆ ਜਾ ਰਿਹਾ ਹੈ। ਇਸ ਤੋ ਇਲਾਵਾ ਪੰਜਾਬ ਬਿਜਲੀ ਨਿਗਮ ਨੂੰ 140 ਮੈਗਾਵਾਟ ਬਿਜਲੀ ਦੀ ਪ੍ਰਾਪਤੀ ਹੋ ਰਹੀ ਹੈ। ਇਸ ਵਿਚ ਸੌਰ ਊਰਜਾ ਦੇ ਪ੍ਰਾਜੈਕਟਾਂ ਤੋਂ 51 ਮੈਗਾਵਾਟ ਅਤੇ ਗ਼ੈਰ ਸੌਰ ਊਰਜਾ ਦੇ ਪ੍ਰਾਜੈਕਟਾਂ ਤੋਂ 87 ਮੈਗਾਵਾਟ ਬਿਜਲੀ ਦਾ ਯੋਗਦਾਨ ਪਾਇਆ ਜਾ ਰਿਹਾ ਹੈ। ਇਸ ਤੋਂ ਇਲਾਵਾ ਬਿਜਲੀ ਨਿਗਮ ਨੂੰ ਭਾਖੜਾ ਦੇ ਪ੍ਰਾਜੈਕਟਾਂ ਤੋਂ ਵੀ ਹਿੱਸੇ ਮੁਤਾਬਕ ਬਿਜਲੀ ਦੀ ਪ੍ਰਾਪਤੀ ਹੋ ਰਹੀ ਹੈ, ਬਿਜਲੀ ਨਿਗਮ ਬਿਜਲੀ ਦੀ ਪੁਰਤੀ ਲਈ ਕੇਂਦਰ ਪੂਲ ਤੋਂ ਵੀ ਬਿਜਲੀ ਪ੍ਰਾਪਤ ਕਰ ਰਹੀ ਹੈ।
ਗੌਰਤਲਬ ਹੈ ਕਿ ਪੰਜਾਬ ਅੰਦਰ ਇਸ 
imageਵੇਲੇ ਬਿਜਲੀ ਨਿਗਮ ਹਰ ਰੋਜ਼ ਸ਼ੂਚਨਾ ਜਾਰੀ ਕਰ ਕੇ ਬਿਜਲੀ ਲਾਈਨਾਂ ਦੀ ਮੁਰੰਮਤ ਦੇ ਨਾਮ ਤੇ ਬਦਲ ਬਦਲ ਕੇ ਖੇਤਰਾਂ ਦੀ ਬਿਜਲੀ ਬੰਦ ਰੱਖੀ ਜਾਂਦੀ ਹੈ। ਇਸ ਬਾਰੇ ਚਰਚਾ ਹੈ ਕਿ ਬਿਜਲੀ ਨਿਗਮ ਬਦਲਵੇਂ ਰੂਪ 'ਚ ਬਿਜਲੀ ਕੱਟ ਹੀ ਲਾਏ ਜਾ ਰਹੇ ਹਨ, ਪਰ ਅਗਾਉਂ ਸੂਚਨਾ ਕਾਰਨ ਸਾਰਾ ਕੁੱਝ ਨਿਯਮਤ ਹੋ ਜਾਂਦਾ ਹੈ। ਬਿਜਲੀ ਨਿਗਮ ਨੇ ਲੋਕਾਂ ਨੂੰ ਵੀ ਅਪੀਲ ਕੀਤੀ ਹੈ ਕਿ ਇਸ ਸੰਕਟ ਦੇ ਸਮੇਂ ਅੰਦਰ ਬਿਜਲੀ ਸੰਜਮ ਨਾਲ ਹੀ ਵਰਤਣ।
