ਅੱਧੇ ਸਾਲ ਤਕ ਪਏਗੀ ਗਰਮੀ
ਸਾਲ ਵਿਚ ਚਾਰ ਮੌਸਮਾਂ ਦੀ ਗੱਲ ਤਾਂ ਭੁਲਾ ਦੇਣੀ ਪਵੇਗੀ
ਬੀਜਿੰਗ, 9 ਮਾਰਚ : ਇਕ ਅਧਿਐਨ 'ਚ ਇਹ ਗੱਲ ਸਾਹਮਣੇ ਆਈ ਹੈ ਕਿ ਵਾਤਾਵਰਣ ਤਬਦੀਲੀ ਬਾਰੇ ਜੇ ਸਹੀ ਦਿਸ਼ਾ 'ਚ ਢੁੱਕਵੇਂ ਕਦਮ ਨਾ ਚੁੱਕੇ ਗਏ ਤਾਂ ਸਾਲ 2100 ਆਉਂਦੇ-ਆਉਂਦੇ ਹੋ ਸਕਦਾ ਹੈ ਕਿ ਉੱਤਰੀ ਗੋਲੇ (ਜਿਸ 'ਚ ਭਾਰਤ ਵੀ ਸ਼ਾਮਲ ਹੈ) 'ਚ ਗਰਮੀ ਦਾ ਮੌਸਮ ਛੇ ਮਹੀਨਿਆਂ ਤਕ ਰਹੇ | ਅਜਿਹੇ 'ਚ ਤਾਂ ਇਕ ਵਰ੍ਹੇ 'ਚ ਚਾਰ ਮੌਸਮਾਂ ਦੀ ਗੱਲ ਭੁੱਲ ਹੀ ਜਾਣੀ ਪਵੇਗੀ | ਜੇ ਅਜਿਹਾ ਹੋਇਆ ਤਾਂ ਮੌਸਮ 'ਚ ਇਸ ਬਦਲਾਅ ਦਾ ਖੇਤੀਬਾੜੀ, ਮਨੁੱਖੀ ਸਿਹਤ ਤੇ ਵਾਤਾਵਰਣ 'ਤੇ ਵਿਆਪਕ ਅਸਰ ਪਵੇਗਾ |
ਜਿਓਫਿਜ਼ੀਕਲ ਰਿਸਰਚ ਲੇਟਰਸ ਨਾਮਕ ਜਰਨਲ 'ਚ ਪ੍ਰਕਾਸ਼ਿਤ ਇਸ ਅਧਿਐਨ ਮੁਤਾਬਕ ਮੌਸਮ ਚੱਕਰ 'ਚ ਸੱਭ ਤੋਂ ਵੱਧ ਬਦਲਾਅ ਭੂ-ਮੱਧ ਸਾਗਰ ਖੇਤਰ ਤੇ ਤਿੱਬਤੀ ਪਠਾਰ ਖੇਤਰ 'ਚ ਦੇਖਣ ਨੂੰ ਮਿਲਿਆ ਹੈ | ਖੋਜਕਾਰਾਂ ਮੁਤਾਬਕ ਉੱਤਰੀ ਖੇਤਰ 'ਚ ਲਗਪਗ 1950 ਦੇ ਆਸਪਾਸ ਤਕ ਅੰਦਾਜ਼ਨ
ਤੌਰ 'ਤੇ ਚਾਰ ਮੌਸਮ ਲਗਪਗ ਨਿਯਮਤ ਪੈਟਰਨ ਨਾਲ ਆਉਂਦੇ-ਜਾਂਦੇ ਸਨ ਪਰ ਵਾਤਾਵਰਣ ਤਬਦੀਲੀ ਕਾਰਨ ਇਨ੍ਹਾਂ 'ਚ ਅਨਿਯਮਤਾ ਵੱਧਦੀ ਜਾ ਰਹੀ ਹੈ | ਰੁੱਤਾਂ ਦੀ ਮਿਆਦ ਤੇ ਉਨ੍ਹਾਂ ਦੀ ਸ਼ੁਰੂਆਤ ਤੇ ਬੀਤਣ ਦਾ ਕੋਈ ਤੈਅ ਸਮਾਂ ਨਹੀਂ ਰਹਿ ਗਿਆ ਹੈ | ਆਉਣ ਵਾਲੇ ਸਮੇਂ 'ਚ ਇਸ ਦੀ ਅਨਿਯਮਤਾ ਹੋਰ ਵੀ ਵਧੇਗੀ |
ਖੋਜ ਵਾਲੇ ਲੇਖ ਦੇ ਮੁੱਖ ਲੇਖਕ ਯੂਪਿੰਗ ਗੁਆਨ (ਚਾਈਨੀਜ਼ ਅਕੈਡਮੀ ਆਫ ਸਾਇੰਸ) ਮੁਤਾਬਕ ਗਲੋਬਲ ਵਾਰਮਿੰਗ ਕਾਰਨ ਗਰਮੀ ਦਾ ਮੌਸਮ ਲੰਮਾ ਤੇ ਜ਼ਿਆਦਾ ਗਰਮ ਹੁੰਦਾ ਜਾ ਰਿਹਾ ਹੈ ਜਦੋਂਕਿ ਸਰਦੀ ਦਾ ਮੌਸਮ ਛੋਟਾ ਤੇ ਘੱਟ ਠੰਢ ਵਾਲਾ ਹੋਣ ਲੱਗਾ ਹੈ |
ਖੋਜਕਾਰਾਂ ਨੇ ਉੱਤਰੀ ਖੇਤਰ 'ਚ 1952 ਤੋਂ
image 2011 ਤਕ ਦੇ ਚਾਰ ਮੌਸਮਾਂ 'ਚ ਬਦਲਾਅ ਬਾਰੇ ਰੋਜ਼ਾਨਾ ਦੀ ਜਲਵਾਯੂ ਸਬੰਧੀ ਅੰਕੜਿਆਂ ਦਾ ਵਿਸ਼ਲੇਸ਼ਣ ਕੀਤਾ ਹੈ | ਉਨ੍ਹਾਂ ਗਰਮੀ ਦੀ ਸ਼ੁਰੂਆਤ ਨੂੁੰ ਸੱਭ ਤੋਂ ਗਰਮ 25 ਫ਼ੀ ਸਦੀ ਤੇ ਇਸੇ ਤਰ੍ਹਾਂ ਸਰਦੀ ਨੂੰ 25 ਫ਼ੀ ਸਦੀ ਸੱਭ ਤੋਂ ਠੰਢ ਮਿਆਦ ਵਜੋਂ ਪ੍ਰਭਾਸ਼ਤ ਕੀਤਾ | ਖੋਜਕਾਰਾਂ ਦੀ ਟੀਮ ਨੇ ਭਵਿੱਖ 'ਚ ਮੌਸਮ 'ਚ ਬਦਲਾਅ ਦਾ ਅੰਦਾਜ਼ਾ ਲਗਾਉਣ ਲਈ ਵਾਤਾਵਰਣ ਤਬਦੀਲੀ ਮਾਡਲ ਦੀ ਵਰਤੋਂ ਕੀਤੀ | (ਪੀਟੀਆਈ)
