ਪਟਰੌਲ-ਡੀਜ਼ਲ ਤੋਂ ਬਾਅਦ ਹੁਣ ਦੁੱਧ ਵੀ ਹੋਇਆ ਮਹਿੰਗਾ
ਅਮੂਲ ਦੇ ਬਾਅਦ ਹੁਣ ਮਦਰ ਡੇਅਰੀ ਨੇ ਵੀ ਦੁੱਧ 2 ਰੁਪਏ ਪ੍ਰਤੀ ਲੀਟਰ ਵਧਾਇਆ
ਨਵੀਂ ਦਿੱਲੀ, 10 ਜੁਲਾਈ : ਪਟਰੌਲ, ਡੀਜ਼ਲ ਦੀ ਵਧਦੀ ਮਹਿੰਗਾਈ ਵਿਚਕਾਰ ਹੁਣ ਦੁੱਧ ਵੀ ਮਹਿੰਗਾ ਹੋ ਗਿਆ ਹੈ | ਮਦਰ ਡੇਅਰੀ ਨੇ ਦਿੱਲੀ-ਰਾਸ਼ਟਰੀ ਰਾਜਧਾਨੀ ਖੇਤਰ (ਐਨ. ਸੀ. ਆਰ.) ਅਤੇ ਹੋਰ ਸ਼ਹਿਰਾਂ ਵਿਚ ਦੁੱਧ ਦੀ ਕੀਮਤ ਦੋ ਰੁਪਏ ਪ੍ਰਤੀ ਲਿਟਰ ਵਧਾ ਦਿਤੀ ਹੈ | ਇਹ ਵਾਧਾ ਐਤਵਾਰ ਤੋਂ ਲਾਗੂ ਹੋ ਜਾਵੇਗਾ | ਇਸ ਤੋਂ ਪਹਿਲਾਂ ਦਸੰਬਰ 2019 ਵਿਚ ਕੀਮਤਾਂ ਵਿਚ ਵਾਧਾ ਕੀਤਾ ਗਿਆ ਸੀ | ਮਦਰ ਡੇਅਰੀ ਤੋਂ ਪਹਿਲਾਂ ਇਕ ਜੁਲਾਈ ਤੋਂ ਅਮੂਲ ਦੁੱਧ ਵੀ ਦੋ ਰੁਪਏ ਪ੍ਰਤੀ ਲਿਟਰ ਮਹਿੰਗਾ ਹੋ ਚੁੱਕਾ ਹੈ | ਮਦਰ ਡੇਅਰੀ ਨੇ ਕਿਹਾ ਕਿ ਦੁੱਧ ਕੀਮਤਾਂ ਵਿਚ ਵਾਧਾ 11 ਜੁਲਾਈ 2021 ਤੋਂ ਲਾਗੂ ਹੋਵੇਗਾ |
ਦੁੱਧ ਦੀ ਸਪਲਾਈ ਕਰਨ ਵਾਲੀ ਪ੍ਰਮੁੱਖ ਕੰਪਨੀ ਮਦਰ ਡੇਅਰੀ ਨੇ ਕੀਮਤਾਂ ਵਧਾਉਣ ਪਿੱਛੇ ਦਾ ਕਾਰਨ ਉੱਚ ਲਾਗਤ ਹੋਣਾ ਦਸਿਆ ਹੈ | ਬਿਆਨ ਵਿਚ ਕਿਹਾ ਗਿਆ ਹੈ, ''ਕੰਪਨੀ ਨੂੰ ਸਾਰੇ ਤਰ੍ਹਾਂ ਦੀਆਂ ਇਨਪੁਟ ਲਾਗਤਾਂ 'ਤੇ ਮਹਿੰਗਾਈ ਦੇ
ਦਬਾਅ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ ਜੋ ਪਿਛਲੇ ਇਕ ਸਾਲ ਵਿਚ ਕਈ ਗੁਣਾ ਵਧੀਆਂ ਹਨ ਅਤੇ ਜਾਰੀ ਮਹਾਮਾਰੀ ਕਾਰਨ ਦੁੱਧ ਦੇ ਉਤਪਾਦਨ ਵਿਚ ਵੀ ਸੰਕਟ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ |'' ਪ੍ਰੋਸੈਸਿੰਗ, ਪੈਕਜਿੰਗ ਅਤੇ ਸਾਜੋ-ਸਾਮਾਨ ਦੀ ਲਾਗਤ ਵੀ ਵਧੀ ਹੈ | ਕੰਪਨੀ ਨੇ ਕਿਹਾ ਕਿ ਪਿਛਲੇ ਇਕ ਸਾਲ ਵਿਚ ਦੁੱਧ ਦੀ ਖ਼ਰੀਦ ਲਈ ਜ਼ਿਆਦਾ ਕੀਮਤਾਂ ਚੁਕਾਉਣ ਦੇ ਬਾਵਜੂਦ ਗਾਹਕਾਂ ਲਈ ਕੀਮਤ ਨਹੀਂ ਵਧਾਈ ਗਈ ਸੀ |
ਮਦਰ ਡੇਅਰੀ ਦਾ ਦੁੱਧ ਦੇਸ਼ ਦੇ 100 ਤੋਂ ਵੱਧ ਸ਼ਹਿਰਾਂ ਵਿਚ ਵਿਕਦਾ ਹੈ | ਮਦਰ ਡੇਅਰੀ ਦੀ ਰੋਜ਼ਾਨਾ ਦੀ ਵਿਕਰੀ 35 ਲੱਖ ਲੀਟਰ ਦੁੱਧ ਦੀ ਹੈ | ਇਸ ਵਿਚੋਂ 35 ਲੱਖ ਲੀਟਰ ਦੁੱਧ ਉਹ ਦਿੱਲੀ-ਐਨਸੀਆਰ 'ਚ ਬੇਚਦੀ ਹੈ | ਐਤਵਾਰ ਤੋਂ ਮਦਰ ਡੇਅਰੀ ਦਾ ਟੋਕਨ ਵਾਲਾ ਦੁੱਧ 44 ਰੁਪਏ ਪ੍ਰਤੀ ਲੀਟਰ ਹੋ ਜਾਵੇਗਾ | ਹਾਲੇ ਇਸ ਦੀ ਕੀਮਤ 42 ਰੁਪਏ ਪ੍ਰਤੀ ਲੀਟਰ ਹੈ | (ਏਜੰਸੀ)