ਘਰ ਵਿਚ ਪਰਵਾਰ ਸੁੱਤਾ ਰਿਹਾ ਤੇ ਚੋਰ ਲੈ ਗਏ 35 ਤੋਲੇ ਗਹਿਣੇ
ਲੁਧਿਆਣਾ, 10 ਜੁਲਾਈ (ਸੰਦੀਪ ਮਾਹਨਾ) : ਚੋਰਾਂ ਨੇ ਸ਼ਹਿਰ ਦੇ ਟਰਾਂਸਪੋਰਟ ਕਾਰੋਬਾਰੀ ਦੇ ਘਰੋਂ 35 ਤੋਲੇ ਗਹਿਣੇ ਚੋਰੀ ਕਰਨ ਦੀ ਵਾਰਦਾਤ ਨੂੰ ਅੰਜਾਮ ਦਿਤਾ ਹੈ। ਇਹ ਘਟਨਾ ਐਤਵਾਰ ਤੜਕੇ ਜਨਤਾ ਨਗਰ ਇਲਾਕੇ ਦੇ ਕੋਲ ਰਣਜੀਤ ਨਗਰ ਦੀ ਹੈ। ਘਰ ਵਿਚ ਸੁੱਤੇ ਪਏ ਪਰਵਾਰ ਨੂੰ ਵੀ ਚੋਰਾਂ ਦੀ ਇਸ ਹਰਕਤ ਦਾ ਪਤਾ ਨਹੀਂ ਲੱਗਾ। ਪਰਵਾਰ ਜਦ ਉਠਿਆ ਤਾਂ ਅਲਮਾਰੀ ਦਾ ਸਾਮਾਨ ਖਿਲਰਿਆ ਪਿਆ ਸੀ। ਜਿਸ ’ਤੇ ਪਰਵਾਰ ਵਾਲਿਆਂ ਨੇ ਥਾਣਾ ਡਵੀਜ਼ਨ ਨੰਬਰ 6 ਦੀ ਪੁਲਿਸ ਨੂੰ ਸੂਚਿਤ ਕੀਤਾ।
ਸੂਚਨਾ ਮਿਲਦੇ ਹੀ ਏ.ਸੀ.ਪੀ. ਜੋਤੀ ਯਾਦਵ, ਐਸਐਚਓ ਮਧੂ ਬਾਲਾ ਸਮੇਤ ਫੋਰੈਂਸਿਕ ਟੀਮ ਸਮੇਤ ਮੌਕੇ ’ਤੇ ਪਹੁੰਚੇ। ਪੁਲਿਸ ਨੇ ਆਸ-ਪਾਸ ਦੇ ਸੀ.ਸੀ.ਟੀ.ਵੀ. ਫੁਟੇਜ ਦੀ ਪੜਤਾਲ ਕਰਦਿਆਂ ਛੇ ਅਣਪਛਾਤੇ ਵਿਅਕਤੀਆਂ ਦੀ ਫੁਟੇਜ ਹਾਸਲ ਕੀਤੀ ਹੈ। ਜਿਸ ਦੇ ਆਧਾਰ ’ਤੇ ਪੁਲਿਸ ਨੇ ਮਾਮਲੇ ਦੀ ਜਾਂਚ ਸ਼ੁਰੂ ਕਰ ਦਿਤੀ ਹੈ। ਅਵਨੀਤ ਕੌਰ ਨੇ ਦਸਿਆ ਕਿ ਉਸ ਦੇ ਪਤੀ ਕਮਲਪ੍ਰੀਤ ਸਿੰਘ ਦਾ ਟਰਾਂਸਪੋਰਟ ਦਾ ਕਾਰੋਬਾਰ ਹੈ। ਉਸ ਦੇ ਪਰਵਾਰ ਦੇ ਮੈਂਬਰ ਅਪਣੇ-ਅਪਣੇ ਕਮਰਿਆਂ ਵਿਚ ਸੁੱਤੇ ਪਏ ਸਨ। ਸਵੇਰੇ ਜਦੋਂ ਸੁੱਤੇ ਉਠੇ ਤਾਂ ਵੇਖਿਆ ਕਿ ਕਮਰੇ ਵਿਚ ਪਈ ਅਲਮਾਰੀ ਦਾ ਸਾਮਾਨ ਖਿਲਰਿਆ ਪਿਆ ਸੀ। ਜਿਸ ਵਿਚੋਂ ਲੱਖਾਂ ਰੁਪਏ ਦੇ ਕਰੀਬ 35 ਤੋਲੇ ਸੋਨੇ ਦੇ ਗਹਿਣੇ ਚੋਰੀ ਹੋ ਗਏ। ਉਸ ਦੇ ਪਰਵਾਰ ਨੂੰ ਵੀ ਇਸ ਬਾਰੇ ਬਿਲਕੁਲ ਪਤਾ ਨਹੀਂ ਸੀ। ਫਿਲਹਾਲ ਪੁਲਿਸ ਨੇ ਮਾਮਲਾ ਦਰਜ ਕਰ ਜਾਂਚ ਸ਼ੁਰੂ ਕਰ ਦਿਤੀ ਹੈ।
Ldh_Sandeep Mahna_10_05
