ਪ੍ਰਧਾਨ ਮੰਤਰੀ ਮੋਦੀ ਸਿਰਫ਼ ਅਪਣੇ ਦੋਸਤਾਂ ਦੀ ਗੱਲ ਸੁਣਦੇ ਹਨ : ਰਾਹੁਲ ਗਾਂਧੀ

ਮੋਦੀ ਨੌਜਵਾਨਾਂ ਦੀਆਂ ਸਮੱਸਿਆਵਾਂ ਵਲ ਧਿਆਨ ਨਹੀਂ ਦੇ ਰਹੇ
 

ਨਵੀਂ ਦਿੱਲੀ, 10 ਸਤੰਬਰ : ਕਾਂਗਰਸ ਦੇ ਸਾਬਕਾ ਪ੍ਰਧਾਨ ਰਾਹੁਲ ਗਾਂਧੀ ਨੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ 'ਤੇ ਨੌਜਵਾਨਾਂ ਦੀਆਂ ਸਮੱਸਿਆਵਾਂ 'ਤੇ ਧਿਆਨ ਨਾ ਦੇਣ ਦਾ ਦੋਸ਼ ਲਾਇਆ। ਰਾਹੁਲ ਨੇ ਕਿਹਾ ਕਿ ਮੋਦੀ ਬੇਰੋਜ਼ਗਾਰੀ ਦੀ ਪਰੇਸ਼ਾਨੀ ਝੱਲ ਰਹੇ ਨੌਜਵਾਨਾਂ ਦੇ ਭਵਿੱਖ ਦੀ ਅਣਦੇਖੀ ਕਰਕੇ ਸਿਰਫ ਆਪਣੇ ਗਿਣੇ-ਚੁਣੇ ਦੋਸਤਾਂ ਦੀ ਗੱਲ ਸੁਣਦੇ ਹਨ। ਰਾਹੁਲ ਨੇ ਪਾਰਟੀ ਦੀ 'ਸਪੀਕਅਪ' ਮੁਹਿੰਮ ਤਹਿਤ ਵੀਡੀਉ ਸੰਦੇਸ਼ ਵਿਚ ਕਿਹਾ ਕਿ ਬੇਰੋਜ਼ਗਾਰੀ ਤੋਂ ਪੀੜਤ ਦੇਸ਼ ਦੇ ਨੌਜਵਾਨ ਅੱਜ ਮੋਦੀ ਤੋਂ ਆਪਣੇ ਹੱਕ, ਰੁਜ਼ਗਾਰ 'ਤੇ ਚੰਗਾ ਭਵਿੱਖ ਮੰਗ ਰਹੇ ਹਨ ਪਰ ਪ੍ਰਧਾਨ ਮੰਤਰੀ ਚੁੱਪ ਹਨ ਅਤੇ ਨੌਜਵਾਨਾਂ ਦੀਆਂ ਸਮਸਿਆਵਾਂ ਨੂੰ ਅਣਦੇਖਾ ਕਰ ਰਹੇ ਹਨ।
   ਰਾਹੁਲ ਗਾਂਧੀ ਨੇ ਨੌਜਵਾਨਾਂ ਨੂੰ ਕਿਹਾ ਕਿ ਦੇਸ਼ ਦੀ ਹਾਲਤ ਤੁਹਾਡੇ ਤੋਂ ਬਿਹਤਰ ਕੌਣ ਜਾਣਦਾ ਹੈ। ਤੁਸੀਂ ਹਿੰਦੋਸਤਾਨ ਦਾ ਭਵਿੱਖ ਹੋ ਅਤੇ ਤੁਹਾਡਾ ਭਵਿੱਖ ਅੱਜ ਦਿੱਸ ਰਿਹਾ ਹੈ। ਕੋਰੋਨਾ ਆਉਣ ਤੋਂ ਪਹਿਲਾਂ ਮੈਂ ਕਿਹਾ ਸੀ ਕਿ ਤੂਫ਼ਾਨ ਆਉਣ ਵਾਲਾ ਹੈ। ਫ਼ਰਵਰੀ 'ਚ ਕਿਹਾ ਸੀ, ਤਿਆਰੀ ਕਰੋ। ਸਰਕਾਰ ਨੇ ਮੇਰਾ ਮਜ਼ਾਕ ਉਡਾਇਆ। ਜਦੋਂ ਤੂਫ਼ਾਨ ਆਇਆ, ਮੈਂ ਫਿਰ ਸੁਝਾਅ ਦਿੱਤਾ- ਨੌਜਵਾਨਾਂ ਦੇ ਭਵਿੱਖ ਲਈ ਤੁਹਾਨੂੰ ਕੁਝ ਕੰਮ ਕਰਨੇ ਹੋਣਗੇ। ਪਹਿਲਾਂ ਹਰ ਗਰੀਬ ਵਿਅਕਤੀ ਦੇ ਬੈਂਕ ਖਾਤੇ 'ਚ 'ਨਿਆਂ' ਯੋਜਨਾ ਜਿਵੇਂ ਸਿੱਧਾ ਪੈਸਾ ਜਮ੍ਹਾਂ ਕਰਵਾਇਆ ਜਾਣਾ ਚਾਹੀਦਾ ਹੈ। ਦੂਜਾ ਲਘੂ ਅਤੇ ਮੱਧ ਦਰਜੇ ਦੀਆਂ ਸੰਸਥਾਵਾਂ ਦੀ ਮਦਦ ਕੀਤੀ ਜਾਣੀ ਚਾਹੀਦੀ ਹੈ। ਇਹ ਹੀ ਦੇਸ਼ ਦੀ ਰੀੜ੍ਹ ਦੀ ਹੱਡੀ ਹੈ ਅਤੇ ਨੌਜਵਾਨ ਦਾ ਭਵਿੱਖ ਹਨ, imageਇਸ ਲਈ ਇਨ੍ਹਾਂ ਸੰਸਥਾਵਾਂ ਦੀ ਰਖਿਆ ਲਈ ਉਨ੍ਹਾਂ ਦੀ ਪੂਰੀ ਮਦਦ ਦੀ ਲੋੜ ਹੈ।           (ਪੀ.ਟੀ.ਆਈ)