ਸੀਟ 'ਤੇ ਪਈ ਸੀ ਮਿੱਟੀ
ਮੁਹਾਲੀ: ਮੁਹਾਲੀ ਦੇ ਜ਼ਿਲ੍ਹਾ ਖਪਤਕਾਰ ਕਮਿਸ਼ਨ ਨੇ ਜੈੱਟ ਏਅਰਵੇਜ਼ ਨੂੰ ਚੰਡੀਗੜ੍ਹ-ਮੁੰਬਈ ਉਡਾਣ ਵਿੱਚ ਸਫ਼ਾਈ ਨਾ ਰੱਖਣ ਕਾਰਨ 15,000 ਰੁਪਏ ਹਰਜਾਨੇ ਵਜੋਂ ਅਦਾ ਕਰਨ ਦੇ ਹੁਕਮ ਦਿੱਤੇ ਹਨ। ਮੁਹਾਲੀ ਦੇ ਸੈਕਟਰ 70 ਦੇ ਵਸਨੀਕ ਅੰਕੁਰ ਸੂਰੀ ਨੇ ਸ਼ਿਕਾਇਤ ਦਿੱਤੀ ਸੀ। ਉਸਨੇ ਆਪਣੇ ਘਰ ਤੋਂ 21 ਜੂਨ 2018 ਲਈ ਚੰਡੀਗੜ੍ਹ ਤੋਂ ਮੁੰਬਈ ਲਈ ਜੈੱਟ ਏਅਰਵੇਜ਼ ਦੀ ਆਨਲਾਈਨ ਟਿਕਟ ਬੁੱਕ ਕੀਤੀ ਸੀ।
ਸ਼ਿਕਾਇਤਕਰਤਾ ਨੇ ਉਡਾਣ ਦੌਰਾਨ ਦੇਖਿਆ ਕਿ ਇੱਥੇ ਕੋਈ ਸਫਾਈ ਨਹੀਂ ਸੀ। ਪੁਰਾਣੀ ਉਡਾਣ ਤੋਂ ਬਾਅਦ ਫਲਾਈਟ ਦੇ ਕੈਬਿਨ ਦੀ ਸਫਾਈ ਨਹੀਂ ਕੀਤੀ ਗਈ ਸੀ। ਚੌਲਾਂ ਦੇ ਦਾਣੇ ਅਤੇ ਭੋਜਨ ਦੇ ਟੁਕੜੇ ਸੀਟਾਂ 'ਤੇ ਥਾਂ-ਥਾਂ ਖਿੱਲਰੇ ਪਏ ਸਨ। ਟਰੇ ਮੇਜ਼ ਉੱਤੇ ਤੇਲ ਦੇ ਧੱਬੇ ਸਨ। ਇੰਨਾ ਹੀ ਨਹੀਂ, ਫਲਾਈਟ ਦੌਰਾਨ ਵਰਤੇ ਗਏ ਟਿਸ਼ੂ ਪੇਪਰ ਅਤੇ ਚਮਚੇ ਫਰਸ਼ 'ਤੇ ਖਿੱਲਰੇ ਪਏ ਸਨ। ਗਲੀਚੇ 'ਤੇ ਮਿੱਟੀ ਖਿੱਲਰੀ ਪਈ ਸੀ। ਖਿੜਕੀ ਦੇ ਸ਼ੀਸ਼ੇ 'ਤੇ ਵਾਲ ਫਸੇ ਹੋਏ ਸਨ।
ਇਸ ਮਾਮਲੇ 'ਚ ਕਮਿਸ਼ਨ ਨੇ ਜੈੱਟ ਏਅਰਵੇਜ਼ ਨੂੰ 7 ਫੀਸਦੀ ਵਿਆਜ ਸਮੇਤ ਸ਼ਿਕਾਇਤਕਰਤਾ ਨੂੰ 1245 ਰੁਪਏ ਵਾਪਸ ਕਰਨ ਦਾ ਹੁਕਮ ਦਿੱਤਾ ਹੈ। ਇਹ ਵਿਆਜ ਫਲਾਈਟ ਵਿੱਚ ਯਾਤਰਾ ਦੇ ਸਮੇਂ ਤੋਂ ਅਦਾ ਕੀਤਾ ਜਾਣਾ ਚਾਹੀਦਾ ਹੈ। ਇਸ ਤੋਂ ਇਲਾਵਾ 15,000 ਰੁਪਏ ਮੁਆਵਜ਼ੇ ਵਜੋਂ ਦੇਣ ਲਈ ਵੀ ਕਿਹਾ ਗਿਆ ਹੈ। ਇਸ ਵਿੱਚ ਸ਼ਿਕਾਇਤਕਰਤਾ ਨੂੰ ਮਾਨਸਿਕ ਤਸੀਹੇ ਦੀ ਰਕਮ ਅਤੇ ਅਦਾਲਤੀ ਖਰਚੇ ਸ਼ਾਮਲ ਹਨ। ਜੈੱਟ ਏਅਰਵੇਜ਼ ਇੰਡੀਆ ਲਿਮਟਿਡ ਨੂੰ ਇੱਕ ਧਿਰ ਬਣਾਉਂਦੇ ਹੋਏ ਦਸੰਬਰ 2019 ਵਿੱਚ ਕਮਿਸ਼ਨ ਵਿੱਚ ਕੇਸ ਦਾਇਰ ਕੀਤਾ ਗਿਆ ਸੀ।
ਕਮਿਸ਼ਨ ਨੇ ਫੈਸਲੇ ਵਿੱਚ ਕਿਹਾ ਕਿ ਫਲਾਈਟ ਦਾ ਕੈਬਿਨ ਪੂਰੀ ਤਰ੍ਹਾਂ ਸਾਫ਼ ਨਹੀਂ ਸੀ। ਇਹ ਜੈੱਟ ਏਅਰਵੇਜ਼ 'ਤੇ ਨਿਰਭਰ ਕਰਦਾ ਸੀ ਕਿ ਉਹ ਉਨ੍ਹਾਂ ਯਾਤਰੀਆਂ ਲਈ ਇਸ ਨੂੰ ਸਾਫ਼-ਸੁਥਰਾ ਰੱਖੇ ਜਿਨ੍ਹਾਂ ਨੇ ਆਰਾਮਦਾਇਕ, ਸੁਰੱਖਿਅਤ ਅਤੇ ਸਾਫ਼ ਸਫ਼ਰ ਦੇ ਅਨੁਭਵ ਲਈ ਭੁਗਤਾਨ ਕੀਤਾ ਸੀ। ਇਹ ਏਅਰਲਾਈਨਜ਼ ਦੁਆਰਾ ਪ੍ਰਦਾਨ ਨਹੀਂ ਕੀਤਾ ਗਿਆ ਸੀ।ਇਹ ਗੱਲ ਉਹਨਾਂ ਨੇ ਵੀ ਮੰਨ ਲਈ ਸੀ। ਕਮਿਸ਼ਨ ਨੇ ਮਿਨਾਲੀ ਮਿੱਤਲ ਐਂਡ ਓਆਰਐਸ ਬਨਾਮ ਜੈੱਟ ਏਅਰਵੇਜ਼ ਕੇਸ ਵਿੱਚ ਰਾਜ ਖਪਤਕਾਰ ਕਮਿਸ਼ਨ, ਪੰਜਾਬ ਦੇ ਮਾਮਲੇ ਵਿੱਚ 23 ਜੁਲਾਈ, 2018 ਨੂੰ ਦਿੱਤੇ ਗਏ ਫੈਸਲੇ ਨੂੰ ਆਧਾਰ ਬਣਾਇਆ।
