ਕੋਰੋਨਾ ਦੀ ਰੋਕਥਾਮ ਲਈ ਬੌਰਿਸ ਜੌਹਨਸਨ ਸੰਸਦ ਵਿਚ ਕਰਨਗੇ ਸੋਮਵਾਰ ਨੂੰ ਨਵਾਂ ਐਲਾਨ
ਲੰਡਨ, 11 ਅਕਤੂਬਰ (ਸ਼ਿੰਦਰਪਾਲ ਸਿੰਘ) :ਜਿੱਥੇ ਕੋਰੋਨਾ ਮਹਾਂਮਾਰੀ ਨੇ ਸਾਰੇ ਸੰਸਾਰ ਨੂੰ ਅਪਣੀ ਜਕੜ ਵਿਚ ਲੈ ਰਖਿਆ ਹੈ, ਉੱਥੇ ਸਮੁੱਚੇ ਬ੍ਰਤਾਨੀਆ ਤੇ ਇਸ ਦੇ ਸਹਿਮ ਨੇ ਮੁੜ ਅਪਣੀ ਬੁੱਕਲ ਵਿਚ ਲੈ ਲਿਆ ਹੈ। ਹਰ ਆਏ ਹਫ਼ਤੇ ਇਸਦੇ ਵੱਖ-ਵੱਖ ਸ਼ਹਿਰਾਂ ਵਿਚ ਨਵੇਂ ਕੇਸਾਂ ਦੀ ਗਿਣਤੀ ਵਧਣੀ ਸ਼ੁਰੂ ਹੋ ਗਈ ਹੈ ਜਿਸ ਨੂੰ ਦੇਖਦਿਆਂ ਦੇਸ਼ ਦੇ ਡਾਕਟਰਾਂ ਦੀ ਸਭਾ ਨੇ ਪ੍ਰਧਾਨ ਮੰਤਰੀ ਨੂੰ ਲਿਖਤੀ ਮੰਗ ਕਰਦਿਆਂ ਹੋਰ ਸਪੱਸ਼ਟ ਹਦਾਇਤਾਂ ਜਾਰੀ ਕਰਨ ਦੇ ਨਾਲ-ਨਾਲ ਸਖ਼ਤਾਈ ਵਰਤਣ ਦੀ ਵੀ ਵਕਾਲਤ ਕੀਤੀ ਹੈ।
ਕੇਸਾਂ ਦੀ ਗਿਣਤੀ ਵਿਚ ਉਛਾਲ਼ ਅਤੇ ਡਾਕਟਰਾਂ ਦੀ ਮੰਗ ਨੂੰ ਲੈ ਕੇ ਪ੍ਰਧਾਨ ਮੰਤਰੀ ਬੌਰਿਸ ਜੌਹਨਸਨ ਦੇ ਮੁੱਖ ਰਣਨੀਤਕ ਸਲਾਹਕਾਰ ਨੇ ਉੱਤਰੀ ਪੱਛਮੀ ਇਲਾਕਿਆਂ ਦੇ ਸੰਸਦ ਮੈਂਬਰਾਂ ਨੂੰ ਚਿੱਠੀ ਲਿਖ ਕੇ ਕਿਹਾ ਹੈ ਕਿ ਕੁੱਝ ਖ਼ਾਸ ਸਥਾਨਕ ਇਲਾਕਿਆਂ ਵਿਚ ਹੋਰ ਸਖ਼ਤ ਪਾਬੰਦੀਆਂ ਲਗਾਈ ਜਾਣ ਦੀਆਂ ਬਹੁਤ ਜ਼ਿਆਦਾ ਸੰਭਾਵਨਾਵਾਂ ਹਨ ਜਿਸ ਨੂੰ ਦੇਖਦਿਆਂ ਵੱਖ ਦੋ ਵੱਖ ਇਲਾਕਿਆਂ ਵਿਚ ਕੇਸਾਂ ਦੀ ਗੰਭੀਰਤਾ ਨੂੰ ਦੇਖਦਿਆਂ ਸਰਕਾਰੀ ਹੁਕਮਾਂ ਵਿਚ ਤਿੰਨ ਤਰਾਂ ਦੀ ਨੀਤੀ ਅਪਨਾਏ ਜਾਣ ਦੀ ਸੰਭਾਵਨਾ ਹੈ। ਇੰਗਲੈਂਡ ਵਿਚ ਕੋਰੋਨਾ ਦੇ ਫੈਲਾਅ ਨੂੰ ਰੋਕਣ ਲਈ ਨਵੀਂਆਂ ਹਦਾਇਤਾਂ ਬਾਰੇ ਪ੍ਰਧਾਨ ਮੰਤਰੀ ਬੌਰਿਸ ਜੌਹਨਸਨ ਸੋਮਵਾਰ ਨੂੰ ਹਾਊਸ ਔਫ਼ ਕੌਮਨਜ਼ ਵਿਚ ਨਵੇਂ ਐਲਾਨ ਕਰਨਗੇ।
image
