ਵਿਆਹ ਤੋਂ ਬਾਅਦ ਨੂੰਹ ਨੂੰ ਲੈ ਕੇ ਸਿੱਧਾ ਸਿੰਘੂ ਬਾਰਡਰ ਪਹੁੰਚਿਆ ਜਲੰਧਰ ਦਾ ਪ੍ਰਵਾਰ

ਨਵੀਂ ਦਿੱਲੀ, 11 ਮਾਰਚ (ਸੈਸ਼ਵ ਨਾਗਰਾ): ਦਿੱਲੀ ਦੀਆਂ ਸਰਹੱਦਾਂ ਉਤੇ ਕਿਸਾਨਾਂ ਵਲੋਂ ਦਿਨ-ਰਾਤ ਧਰਨਾ ਪ੍ਰਦਰਸ਼ਨ ਕੀਤਾ ਜਾ ਰਿਹਾ ਹੈ।  ਇਸ ਦੌਰਾਨ ਅੱਜ ਇਕ ਲੜਕੇ ਦਾ ਵਿਆਹ ਹੋਇਆ ਤੇ ਉਸ ਨੇ ਬਾਹਰ ਕਿਸੇ ਲੋਕੇਸ਼ਨ ’ਤੇ ਘੁੰਮਣ ਦੀ ਬਜਾਏ ਕਿਸਾਨ ਅੰਦੋਲਨ ਵਿਚ ਪਹੁੰਚ ਕੇ ਅਪਣੀ ਸ਼ਿਰਕਤ ਕੀਤੀ।  ਪ੍ਰਵਾਰ ਵਾਲੇ ਵਿਆਹ ਤੋਂ ਇਕ ਹਫ਼ਤੇ ਬਾਅਦ ਹੀ ਅਪਣੀ ਨੂੰਹ ਨੂੰ ਦਿੱਲੀ ਸੰਘਰਸ਼ ਦੇ ਸਿੰਘੂ ਬਾਰਡਰ ’ਤੇ ਪਹੁੰਚੇ ਹਨ। ਲੜਕੀ ਨੇ ਕਿਹਾ ਕਿ ਅਸੀਂ ਬਾਹਰ ਕਿਸੇ ਲੋਕੇਸ਼ਨ ਤੇ ਘੁੰਮਣ ਦੀ ਬਜਾਏ ਕਿਸਾਨੀ ਸੰਘਰਸ਼ ਵਿਚ ਪਹੁੰਚਣਾ ਅਹਿਮ ਸਮਝ ਰਹੇ ਹਾਂ ਕਿ ਅੱਜ ਸਾਡੀ ਖੇਤੀ ਅਤੇ ਸਾਡਾ ਕਿਸਾਨ ਇਕ ਮੁਸ਼ਕਲ ਘੜੀ ਵਿਚ ਹੈ, ਇਸ ਸੰਘਰਸ਼ ਵਿਚ ਸੜਕਾਂ ਉਤੇ ਬੈਠਿਆਂ ਕਿਸਾਨਾਂ ਨੂੰ 100 ਦਿਨਾਂ ਤੋਂ ਉਪਰ ਹੋ ਗਏ ਹਨ, ਜਿਸ ਕਰ ਕੇ ਅਸੀਂ ਕਿਸਾਨਾਂ ਦੇ ਮੋਢੇ ਨਾਲ ਮੋਢਾ ਜੋੜ ਕੇ ਖੜਨ ਲਈ ਇਥੇ ਆਏ ਹਾਂ। ਉਥੇ ਹੀ ਲੜਕੇ ਦੀ ਮਾਂ ਨੇ ਕਿਹਾ ਕਿ ਇਥੇ ਸਾਡੇ ਬਜ਼ੁਰਗ, ਕਿਸਾਨ, ਮਾਤਾਵਾਂ, ਭੈਣਾਂ ਕਿਸਾਨ ਅੰਦੋਲਨ ਵਿਚ ਬੈਠੇ ਹਨ ਅਤੇ ਅਸੀ ਇਨ੍ਹਾਂ ਦਾ ਸਾਥ ਦੇਣ ਲਈ ਇਥੇ ਆਏ ਹਾਂ। ਉਨ੍ਹਾਂ ਕਿਹਾ ਜੇ ਪੂਰੇ ਦੇਸ਼ ਦੇ ਲੋਕ ਇਕਜੁਟ ਹੋ ਜਾਣ ਤਾਂ ਸਰਕਾਰ ਤਾਂ ਅਪਣੇ ਆਪ ਖੇਤੀ ਦੇ ਕਾਲੇ ਕਾਨੂੰਨਾਂ ਰੱਦ ਕਰ ਦੇਵੇਗੀ। ਉਨ੍ਹਾਂ ਕਿਹਾ ਕਿ ਅਸੀ ਸੋਚਿਆ ਹੋਇਆ ਸੀ ਕਿ ਜਦੋਂ ਵੀ ਬੇਟੇ ਦਾ ਵਿਆਹ ਹੋਇਆ ਤਾਂ ਸੱਭ ਤੋਂ ਪਹਿਲਾਂ ਇਸ ਸੰਘਰਸ਼ ਵਿਚ ਪਹੁੰਚਾਂਗੇ।