ਐਚਐਸਐਸਸੀ ਦੇ ਚੇਅਰਮੈਨ ਭੋਪਾਲ ਸਿੰਘ ਖੱਦਰੀ ਨੇ ਕਿਹਾ ਕਿ ਉਨ੍ਹਾਂ ਵਿਚ 2 ਤੋਂ 2.5 ਲੱਖ ਨੌਜਵਾਨ ਅਜਿਹੇ ਹਨ ਜਿਨ੍ਹਾਂ ਨੇ ਇੱਕ ਤੋਂ ਚਾਰ ਵਾਰ ਰਜਿਸਟਰੇਸ਼ਨ ਕਰਵਾਈ ਹੈ।

ਹਰਿਆਣਾ - ਹਰਿਆਣਾ ਦੇ ਨੌਜਵਾਨਾਂ ਨੂੰ ਗਰੁੱਪ-ਡੀ ਦੀਆਂ ਨੌਕਰੀਆਂ ਲਈ ਬਹੁਤ ਸੰਘਰਸ਼ ਕਰਨਾ ਪਏਗਾ, ਕਿਉਂਕਿ 13,000 ਗਰੁੱਪ-ਡੀ ਦੀਆਂ ਅਸਾਮੀਆਂ ਲਈ ਲਗਭਗ 11.50 ਉਮੀਦਵਾਰ ਲਾਈਨ ਵਿਚ ਹਨ। ਹਰਿਆਣਾ ਸਟਾਫ਼ ਸਿਲੈਕਸ਼ਨ ਕਮਿਸ਼ਨ ਦੁਆਰਾ ਖੋਲ੍ਹੇ ਗਏ ਪੋਰਟਲ 'ਤੇ ਲਗਭਗ 13.84 ਲੱਖ ਨੌਜਵਾਨਾਂ ਨੇ ਰਜਿਸਟ੍ਰੇਸ਼ਨ ਕਰਵਾਈ ਹੈ।

ਐਚਐਸਐਸਸੀ ਦੇ ਚੇਅਰਮੈਨ ਭੋਪਾਲ ਸਿੰਘ ਖੱਦਰੀ ਨੇ ਕਿਹਾ ਕਿ ਉਨ੍ਹਾਂ ਵਿਚ 2 ਤੋਂ 2.5 ਲੱਖ ਨੌਜਵਾਨ ਅਜਿਹੇ ਹਨ ਜਿਨ੍ਹਾਂ ਨੇ ਇੱਕ ਤੋਂ ਚਾਰ ਵਾਰ ਰਜਿਸਟਰੇਸ਼ਨ ਕਰਵਾਈ ਹੈ। ਕਮਿਸ਼ਨ ਮੁਤਾਬਕ ਕੁੱਲ ਅਰਜ਼ੀਆਂ ਲਗਭਗ 11.50 ਲੱਖ ਹੋਣਗੀਆਂ। ਇਸ ਤਰ੍ਹਾਂ 13,000 ਪੋਸਟਾਂ ਵਿਚੋਂ ਹਰੇਕ ਲਈ 88 ਨੌਜਵਾਨ ਲਾਈਨ ਵਿਚ ਹੋਣਗੇ। ਇਸ ਦੇ ਲਈ ਸਤੰਬਰ ਵਿਚ ਸੀਈਟੀ ਕਰਵਾਉਣ ਦੀਆਂ ਤਿਆਰੀਆਂ ਚੱਲ ਰਹੀਆਂ ਹਨ।  

ਕਮਿਸ਼ਨ ਨੇ ਨੈਸ਼ਨਲ ਟੈਸਟਿੰਗ ਏਜੰਸੀ ਨੂੰ ਪੱਤਰ ਲਿਖਿਆ ਹੈ। ਇਸ ਮਾਮਲੇ ਨੂੰ ਲੈ ਕੇ ਜਲਦੀ ਹੀ ਹਰਿਆਣਾ ਸਟਾਫ ਸਿਲੈਕਸ਼ਨ ਕਮਿਸ਼ਨ ਅਤੇ ਨੈਸ਼ਨਲ ਟੈਸਟਿੰਗ ਏਜੰਸੀ ਦੇ ਅਧਿਕਾਰੀਆਂ ਵਿਚਕਾਰ ਮੀਟਿੰਗ ਹੋਵੇਗੀ। ਇਨ੍ਹਾਂ ਅਸਾਮੀਆਂ ਲਈ ਕੋਈ ਸਕ੍ਰੀਨਿੰਗ ਟੈਸਟ ਨਹੀਂ ਹੋਵੇਗਾ। ਬਹੁਤ ਸਾਰੇ ਨੌਜਵਾਨ ਅਜਿਹੇ ਹਨ, ਜਿਨ੍ਹਾਂ ਨੇ ਪਹਿਲਾਂ ਫਾਰਮ ਭਰਦਿਆਂ ਇਹ ਲਿਖ ਦਿੱਤਾ ਹੈ ਕਿ ਉਨ੍ਹਾਂ ਦੇ ਘਰ ਕੋਈ ਸਰਕਾਰੀ ਨੌਕਰੀ ਨਹੀਂ ਹੈ। ਫਿਰ ਇੱਕ ਹੋਰ ਫਾਰਮ ਭਰਿਆ ਗਿਆ, ਜਿਸ ਵਿਚ ਇਹ ਲਿਖਿਆ ਗਿਆ ਹੈ ਕਿ ਘਰ ਵਿਚ ਨੌਕਰੀ ਹੈ। 

ਕਈ ਨੌਜਵਾਨਾਂ ਨੇ ਇੱਕ ਤੋਂ ਚਾਰ ਫਾਰਮ ਭਰੇ ਹਨ। ਬਹੁਤ ਸਾਰੇ ਨੌਜਵਾਨ ਅਜਿਹੇ ਹਨ ਜਿਨ੍ਹਾਂ ਨੇ ਪਹਿਲਾਂ ਜਨਮ ਮਿਤੀ ਗਲਤ ਭਰੀ, ਫਿਰ ਸਹੀ ਭਰੀ, ਕਈਆਂ ਨੇ ਤੀਜੀ ਵਾਰ ਜਨਮ ਮਿਤੀ ਭਰ ਦਿੱਤੀ। ਕਮਿਸ਼ਨ ਵੱਲੋਂ ਅਜਿਹੇ ਨੌਜਵਾਨਾਂ ਦੇ ਆਖਰੀ ਭਰੇ ਫਾਰਮ ਹੀ ਸਵੀਕਾਰ ਕੀਤੇ ਜਾਣਗੇ।