ਅਜ਼ੀਮ ਪ੍ਰੇਮਜੀ ਬਣੇ ਸੱਭ ਤੋਂ ਵੱਡੇ ਦਾਨੀ ਭਾਰਤੀ, ਹਰ ਰੋਜ਼ ਦਾਨ ਕੀਤੇ 22 ਕਰੋੜ

ਦਾਨਵੀਰ ਭਾਰਤੀਆਂ ਦੀ ਸੂਚੀ ਵਿਚ ਤੀਜੇ ਨੰਬਰ 'ਤੇ ਮੁਕੇਸ਼ ਅੰਬਾਨੀ

ਨਵੀਂ ਦਿੱਲੀ, 11 ਨਵੰਬਰ: ਸੁਪ੍ਰਸਿੱਧ ਸੂਚਨਾ ਤਕਨੀਕ ਕੰਪਨੀ ਵਿਪਰੋ ਦੇ ਸੰਸਥਾਪਕ ਅਜ਼ੀਮ ਪ੍ਰੇਮਜੀ ਨੇ ਪਰਉਪਕਾਰੀਆਂ ਦੀ ਸੂਚੀ ਵਿਚ ਪਹਿਲਾ ਸਥਾਨ ਹਾਸਲ ਕਰ ਲਿਆ ਹੈ। ਪ੍ਰੇਮਜੀ ਇਕ ਦਿਨ ਵਿਚ 22 ਕਰੋੜ ਰੁਪਏ ਅਤੇ ਇਕ ਸਾਲ ਵਿਚ 7904 ਕਰੋੜ ਰੁਪਏ ਦਾਨ ਕਰਨ ਵਾਲੇ ਵਿੱਤੀ ਸਾਲ 2020 ਵਿਚ ਸਭ ਤੋਂ ਦਾਨਵੀਰ ਭਾਰਤੀ ਬਣ ਗਏ।
ਇਕ ਰੀਪੋਰਟ ਮੁਤਾਬਕ ਪ੍ਰੇਮਜੀ ਨੇ ਐਚਸੀਐਲ ਟੈਕਨਾਲੋਜੀ ਦੇ ਸ਼ਿਵ ਨਾਡਰ ਨੂੰ ਵੱਡੇ ਅੰਤਰ ਨਾਲ ਪਛਾੜਿਆ ਹੈ, ਜੋ ਇਸ ਤੋਂ ਪਹਿਲਾਂ ਪਰਉਪਕਾਰੀਆਂ ਦੀ ਸੂਚੀ ਵਿਚ ਟਾਪ 'ਤੇ ਚੱਲ ਰਹੇ ਸੀ। ਨਾਡਰ ਨੇ ਵਿੱਤੀ ਸਾਲ 2020 ਵਿਚ 795 ਕਰੋੜ ਰੁਪਏ ਦਾਨ ਕੀਤੇ ਜਦਕਿ ਇਸ ਤੋਂ ਇਕ ਸਾਲ ਪਹਿਲਾਂ ਉਨ੍ਹਾਂ ਨੇ 826 ਕਰੋੜ ਰੁਪਏ ਦਾਨ ਕੀਤੇ ਸਨ।
ਪ੍ਰੇਮਜੀ ਨੇ ਇਸ ਤੋਂ ਪਹਿਲਾਂ ਯਾਨੀ ਸਾਲ 2018-19 ਵਿਚ ਸਿਰਫ਼ 426 ਕਰੋੜ ਰੁਪਏ ਦਾਨ ਕੀਤੇ ਸੀ। ਪਰ ਇਸ ਸਾਲ ਉਨ੍ਹਾਂ ਨੇ ਸਾਰੇ ਰੀਕਾਰਡ ਤੋੜ ਦਿਤੇ ਅਤੇ ਭਾਰਤੀ ਉਦਮੀਆਂ ਵਲੋਂ ਕੀਤੇ ਦਾਨ ਨੂੰ ਵਿੱਤੀ ਸਾਲ 2020 ਵਿਚ 175 ਫ਼ੀਸਦੀ ਵਧਾਉਂਦੇ ਹੋਏ 12,050 ਕਰੋੜ ਰੁਪਏ 'ਤੇ ਪਹੁੰਚਾ ਦਿਤਾ ਹੈ। ਇਸ ਤੋਂ ਇਲਾਵਾ ਸਭ ਤੋਂ ਅਮੀਰ ਭਾਰਤੀ ਅਤੇ ਰਿਲਾਇਸ ਇੰਡਸਟਰੀਜ਼ ਦੇ ਚੇਅਰਮੈਨ
ਮੁਕੇਸ਼ ਅੰਬਾਨੀ ਦਾਨਵੀਰ ਭਾਰਤੀਆਂ ਦੀ ਸੂਚੀ ਵਿਚ ਤੀਜੇ ਨੰਬਰ 'ਤੇ ਹਨ। ਉਨ੍ਹਾਂ ਨੇ ਵਿੱਤੀ ਸਾਲ 2018-19 ਵਿਚ 402 ਕਰੋੜ ਰੁਪਏ ਦਾਨ ਦੇਣ ਦੇ ਮੁਕਾਬਲੇ ਵਿੱਤੀ ਸਾਲ 2020 ਵਿਚ 458 ਕਰੋੜ ਰੁਪਏ ਦਾਨ ਕੀਤੇ।
ਇਸ ਸੂਚੀ ਵਿਚ ਚੋਥੇ ਨੰਬਰ 'ਤੇ ਅਦਿੱਤਿਆ ਬਿਰਲਾ ਗਰੁਪ ਦੇ ਕੁਮਾਰ ਮੰਗਲਮ ਬਿਰਲਾ ਅਤੇ ਪੰਜਵੇਂ ਨੰਬਰ 'ਤੇ ਵੇਦਾਂਤਾ ਗਰੁਪ ਦੇ ਚੇਅਰਮੈਨ ਅਨਿਲ ਅਗਰਵਾਲ ਹਨ। (ਏਜੰਸੀ)image