ਸਫ਼ਾਈ ਸੇਵਕਾਂ ਨੂੰ ਹਾਈਜੈਨਿਕ ਕਿੱਟਾਂ ਵੰਡੀਆਂ
ਐਸ.ਏ.ਐਸ. ਨਗਰ, 12 ਮਈ (ਸੁਖਦੀਪ ਸਿੰਘ ਸੋਈਂ): ਸਿਹਤ ਅਤੇ ਪਰਵਾਰ ਭਲਾਈ ਮੰਤਰੀ ਬਲਬੀਰ ਸਿੰਘ ਸਿੱਧੂ ਨੇ ਅੱਜ ਨਗਰ ਨਿਗਮ ਦੇ ਦਫ਼ਤਰ ਵਿਚ ਨਿਗਮ ਵਲੋਂ ਸ਼ਹਿਰ ਵਿਚ ਸਫ਼ਾਈ ਦਾ ਕੰਮ ਕਰਨ ਵਾਲੇ ਸਫ਼ਾਈ ਸੇਵਕਾਂ ਨੂੰ ਹਾਈਜੈਨਿਕ ਕਿੱਟਾਂ ਵੰਡੀਆਂ ਗਈਆਂ।
ਇਸ ਮੌਕੇ ਸਿੱਧੂ ਨੇ ਕਿਹਾ ਕਿ ਕੋਰੋਨਾ ਮਹਾਂਮਾਰੀ ਨਾਲ ਜੰਗ ਵਿਚ ਮੂਹਰਲੀ ਕਤਾਰ ਵਿਚ ਲੜਨ ਵਾਲੇ ਇਹਨਾਂ ਸਫ਼ਾਈ ਸੇਵਕਾਂ ਦੀ ਭੂਮਿਕਾ ਬਹੁਤ ਅਹਿਮ ਹੈ ਅਤੇ ਨਿਗਮ ਵਲੋਂ ਇਹਨਾਂ ਦੀ ਸੁਰਖਿਆ ਲਈ ਇਹ ਕਿਟਾਂ ਦਿਤੀਆਂ ਜਾ ਰਹੀਆਂ ਹਨ।
ਇਨ੍ਹਾਂ ਕਿਟਾਂ ਵਿੱਚ ਪੁਰਸ਼ ਸਫਾਈ ਸੇਵਕਾਂ ਨੂੰ ਸੈਨੀਟਾਈਜ਼ਰ, ਦਸਤਾਨੇ, ਮਾਸਕ ਅਤੇ ਇਮਿਊਨ ਸਿਸਟਮ ਨੂੰ ਮਜਬੂਤ ਕਰਨ ਲਈ ਹੋਮੋਪੈਥਿਕ ਦਵਾਈ ਵੰਡੀ ਗਈ ਅਤੇ ਇਸਦੇ ਨਾਲ ਹੀ ਮਹਿਲਾ ਸਫਾਈ ਸੇਵਕਾਂ ਨੂੰ ਸੈਨੇਟਾਇਜਰ, ਦਸਤਾਨੇ, ਮਾਸਕ, ਇਮਿਊਨ ਸਿਸਟਮ ਨੂੰ ਮਜਬੂਤ ਕਰਨ ਲਈ ਹੋਮੋਪੈਥਿਕ ਦਵਾਈ ਅਤੇ ਸੈਨਟਰੀ ਨੈਪਕਿਨ ਵੀ ਵੰਡੇ ਗਏ ਹਨ ਇਸ ਮੌਕੇ ਹੋਮੋਪੈਥਿਕ ਦਵਾਈ ਮੁਫਤ ਵਿੱਚ ਮੁਹਈਆ ਕਰਵਾਉਣ ਵਾਲੇ ਡਾ. ਜੀ.ਐਸ. ਚੰਦੋਕ ਦੱਸਿਆ ਕਿ ਹੁਣ ਤੱਕ ਤਕਰੀਬਨ 52,000 ਵਿਅਕਤੀਆਂ ਨੂੰ ਇਹ ਦਵਾਈ ਵੰਡੀ ਜਾ ਚੁੱਕੀ ਹੈ।
