ਕੇਂਦਰੀ ਘੱਟ ਗਿਣਤੀ ਕਮਿਸ਼ਨ ਦੇ ਸਾਬਕਾ ਚੇਅਰਮੈਨ ਅਤੇ ਸਾਬਕਾ ਰਾਜ ਸਭਾ ਮੈਂਬਰ ਤਰਲੋਚਨ ਸਿੰਘ ਨੇ ਮੰਗ ਕੀਤੀ ਹੈ ਕਿ ਪੰਜਾਬ ਯੂਨੀਵਰਸਟੀ ਦਾ ਨਵਾਂ ਵੀ.ਸੀ. ...
ਚੰਡੀਗੜ੍ਹ : ਕੇਂਦਰੀ ਘੱਟ ਗਿਣਤੀ ਕਮਿਸ਼ਨ ਦੇ ਸਾਬਕਾ ਚੇਅਰਮੈਨ ਅਤੇ ਸਾਬਕਾ ਰਾਜ ਸਭਾ ਮੈਂਬਰ ਤਰਲੋਚਨ ਸਿੰਘ ਨੇ ਮੰਗ ਕੀਤੀ ਹੈ ਕਿ ਪੰਜਾਬ ਯੂਨੀਵਰਸਟੀ ਦਾ ਨਵਾਂ ਵੀ.ਸੀ. ਕਿਸੇ ਸਿੱਖ ਵਿਦਵਾਨ ਨੂੰ ਲਾਇਆ ਜਾਵੇ ਕਿਉਂਕਿ ਉੱਤਰੀ ਭਾਰਤ ਦੀ ਇਸ ਯੂਨੀਵਰਸਟਂ ਵਿਚ ਅੱਜ ਤਕ ਕਿਸੇ ਸਿੱਖ ਵਿਦਵਾਨ ਨੂੰ ਮੌਕਾ ਨਹੀਂ ਮਿਲਿਆ।
ਸਪੋਕਸਮੈਨ ਨਾਲ ਗੱਲਬਾਤ ਕਰਦਿਆਂ ਤਰਲੋਚਨ ਸਿੰਘ ਨੇ ਦਸਿਆ ਕਿ ਉਹ ਲਗਭਗ ਡੇਢ ਮਹੀਨੇ ਪਹਿਲਾਂ ਚਾਂਸਲਰ ਅਤੇ ਕੇਂਦਰੀ ਸਿਖਿਆ ਮੰਤਰੀ ਨੂੰ ਇਸ ਸਬੰਧੀ ਇਕ ਚਿੱਠੀ ਵੀ ਲਿਖ ਚੁੱਕੇ ਹਨ। ਇੰਨਾ ਹੀ ਨਹੀਂ, ਉਹ ਪਿਛਲੇ 15 ਸਾਲਾਂ ਤੋਂ ਅਜਿਹੀਆਂ ਚਿੱਠੀਆਂ ਲਿਖ ਰਹੇ ਹਨ ਪਰ ਕੋਈ ਸੁਣਦਾ ਹੀ ਨਹੀਂ। ਉਨ੍ਹਾਂ ਪੰਜਾਬ ਦੇ ਸਿਆਸੀ ਨੇਤਾਵਾਂ 'ਤੇ ਵੀ ਦੋਸ਼ ਲਾਇਆ ਕਿ ਉਹ ਇਸ ਮਾਮਲੇ ਵਿਚ ਅਵੇਸਲੇ ਹੋ ਗਏ ਲਗਦੇ ਹਨ। ਤਰਲੋਚਨ ਸਿੰਘ ਨੇ ਦਸਿਆ ਕਿ ਪੰਜਾਬ ਦੇ 180 ਤੋਂ ਵੱਧ ਕਾਲਜ, ਪੰਜਾਬ ਯੂਨੀਵਰਸਟੀ ਨਾਲ ਜੁੜੇ ਹੋਏ ਹਨ, ਜਿਥੇ ਲੱਖਾਂ ਵਿਦਿਆਰਥੀ ਪੜ੍ਹਦੇ ਹਨ।
ਯੂਨੀਵਰਸਟੀ ਦੇ ਜਿੰਮੇ ਪੰਜਾਬ ਦੇ ਸਾਹਿਤ ਅਤੇ ਸਭਿਆਚਾਰ ਨੂੰ ਪ੍ਰਫੁਲਤ ਕਰਨ ਦਾ ਕੰਮ ਵੀ ਹੈ। ਉਨ੍ਹਾਂ ਦਾਅਵਾ ਕੀਤਾ ਕਿ ਦੇਸ਼ ਭਰ ਦੀਆਂ ਦੋ ਦਰਜਨ ਤੋਂ ਵੱਧ ਕੇਂਦਰੀ ਯੂਨੀਵਰਸਟੀਆਂ ਵਿਚ ਵੀ ਕੋਈ ਸਿੱਖ ਵਿਦਵਾਨ ਵੀ.ਸੀ. ਨਹੀਂ ਲਾਇਆ ਗਿਆ। ਪ੍ਰਧਾਨ ਮੰਤਰੀ ਨੂੰ ਮਿਲਣ ਅਕਾਲੀ ਐਮ.ਪੀ. : ਤਰਲੋਚਨ ਸਿੰਘ ਨੇ ਸੁਝਾਅ ਦਿਤਾ ਕਿ ਇਸ ਮਾਮਲੇ 'ਤੇ ਸਾਰੇ ਪੰਜਾਬੀ ਹਿਤੈਸ਼ੀਆਂ ਨੂੰ ਮਿਲ ਕੇ ਹੰਭਲਾ ਮਾਰਨ ਦੀ ਲੋੜ ਹੈ। ਹੁਣ ਜਦਕਿ ਕੇਂਦਰ ਦੀ ਸਰਕਾਰ 'ਚ ਅਕਾਲੀ ਦਲ ਬਾਦਲ ਸਾਂਝੀਦਾਰ ਹੈ ਤਾਂ ਅਕਾਲੀ ਐਮ.ਪੀ. ਨੂੰ ਪ੍ਰਧਾਨ ਮੰਤਰੀ ਤਕ ਪਹੁੰਚ ਕਰਨੀ ਚਾਹੀਦੀ ਹੈ।
ਯੂਨੀਵਰਸਟੀ ਤੋਂ ਅਮਰੀਕ ਸਿੰਘ ਆਹਲੂਵਾਲੀਆ ਮੈਦਾਨ ਵਿਚ : ਇਸ ਵੇਲੇ ਵੀ.ਸੀ. ਦੇ ਅਹੁਦੇ ਲਈ ਸੰਭਾਵਤ 169 ਉਮੀਦਵਾਰਾਂ 'ਚੋਂ ਪੰਜਾਬ ਯੂਨੀਵਰਸਟੀ ਦੇ ਵੀ.ਸੀ. ਦੇ ਸਕੱਤਰ ਪ੍ਰੋ. ਅਮਰੀਕ ਸਿੰਘ ਆਹਲੂਵਾਲਆ ਇਕ ਉਮੀਦਵਾਰ ਹਨ, ਜੋ ਅੰਮ੍ਰਿਤਧਾਰੀ ਸਿੱਖ ਅਤੇ ਚੰਗੇ ਵਿਦਵਾਨ ਹਨ। ਉਹ ਡੀਨ ਵਿਦਿਆਰਥੀ ਭਲਾਈ ਦੇ ਅਹੁਦੇ 'ਤੇ ਵੀ ਕੰਮ ਕਰ ਚੁਕੇ ਹਨ।
ਪੰਜਾਬ ਯੂਨੀਵਰਸਟੀ ਦੇ ਪਹਿਲੇ ਵੀ.ਸੀ. ਜਸਟਿਸ ਐਸ.ਬੀ.ਐਸ. ਤੇਜਾ ਸਿੰਘ ਸਿੱਖ ਪਰ ਆਰਜ਼ੀ ਵੀ.ਸੀ. ਰਹੇ : ਪੰਜਾਬ ਯੂਨੀਵਰਸਟੀ ਦੇ ਪਹਿਲੇ ਵੀ.ਸੀ. ਹੋਣ ਦਾ ਮਾਣ ਇਕ ਸਿੱਖ ਜੱਜ ਜਸਟਿਸ ਐਸ.ਬੀ.ਐਸ. ਤੇਜਾ ਸਿੰਘ ਨੂੰ ਹੈ ਪਰ ਜਦੋਂ ਇਸ ਬਾਰੇ ਤਰਲੋਚਨ ਸਿੰਘ ਨਾਲ ਗੱਲ ਕੀਤੀ ਗਈ ਤਾਂ ਉਨ੍ਹਾਂ ਦਾ ਕਹਿਣਾ ਸੀ ਕਿ ਉਹ ਕੁਲ-ਵਕਤੀ ਵੀ.ਸੀ. ਨਹੀਂ ਸਨ, ਉਨ੍ਹਾਂ ਕੋਲ ਆਰਜ਼ੀ ਤੌਰ 'ਤੇ ਅਹੁਦੇ ਦਾ ਚਾਰਜ ਸੀ, ਇਸ ਲਈ ਉਨ੍ਹਾਂ ਦੀ ਸਿੱਖ ਵਿਦਵਾਨ ਦੀ ਮੰਗ ਢੁੱਕਵੀਂ ਹੈ।