ਸੀ.ਬੀ.ਐਸ.ਈ. ਵਲੋਂ 10ਵੀਂ ਦੀਆਂ ਪ੍ਰੀਖਿਆਵਾਂ ਰੱਦ, 12ਵੀਂ ਦੀਆਂ ਮੁਲਤਵੀ
ਚੰਡੀਗੜ੍ਹ, 14 ਅਪ੍ਰੈਲ (ਸੁਰਜੀਤ ਸਿੰਘ ਸੱਤੀ): ਸੈਂਟਰਲ ਬੋਰਡ ਆਫ਼ ਸੈਕੰਡਰੀ ਐਜੂਕੇਸ਼ਨ (ਸੀ.ਬੀ.ਐਸ.ਈ.) ਨੇ ਅੱਜ ਇਕ ਹੁਕਮ ਜਾਰੀ ਕਰ ਕੇ ਕੋਰੋਨਾ ਦੇ ਮੱਦੇਨਜ਼ਰ ਇਸ ਸਾਲ ਹੋਣ ਵਾਲੀਆਂ ਸੀ.ਬੀ.ਐਸ.ਈ. ਬੋਰਡ ਦੀਆਂ ਚਾਰ ਮਈ ਤੋਂ ਹੋਣ ਵਾਲੀਆਂ 10ਵੀਂ ਦੀਆਂ ਪ੍ਰੀਖਿਆਵਾਂ ਰੱਦ ਕਰ ਦਿਤੀਆਂ ਹਨ | ਬੋਰਡ ਦੇ ਹੁਕਮ ਮੁਤਾਬਕ ਆਂਤਰਿਕ ਮੁੱਲਅੰਕਣ ਮੁਤਾਬਕ ਨਤੀਜਾ ਬਣਾਇਆ ਜਾਵੇਗਾ ਪਰ ਫੇਰ ਵੀ ਜੇਕਰ ਕੋਈ ਵਿਦਿਆਰਥੀ ਅੰਕਾਂ ਤੋਂ ਸੰਤੁਸ਼ਟ ਨਹੀਂ ਹੁੰਦਾ ਤਾਂ ਉਸ ਨੂੰ ਜਦੋਂ ਵੀ ਸਥਿਤੀ ਆਮ ਵਰਗੀ ਹੁੰਦੀ ਹੈ ਅਤੇ ਪ੍ਰੀਖਿਆ ਲਈ ਢੁੱਕਵਾਂ ਸਮਾਂ ਆਉਂਦਾ ਹੈ, ਉਦੋਂ ਪ੍ਰੀਖਿਆ ਦੇਣ ਦੀ ਇਜਾਜ਼ਤ ਦਿਤੀ ਜਾਵੇਗੀ | ਸੀ.ਬੀ.ਐਸ.ਈ. ਦੇ ਪ੍ਰੀਖਿਆ ਕੰਟਰੋਲਰ ਸਤਿਅਮ ਭਾਰਦਵਾਜ ਵਲੋਂ ਜਾਰੀ ਹੁਕਮ ਵਿਚ ਉਪਰੋਕਤ ਤੋਂ ਇਲਾਵਾ ਇਹ ਫ਼ੈਸਲਾ ਵੀ ਦਿਤਾ ਗਿਆ ਹੈ ਕਿ 4 ਮਈ ਤੋਂ 14 ਜੂਨ ਤਕ ਹੋਣ ਵਾਲੀਆਂ 12ਵੀਂ ਦੀਆਂ ਪ੍ਰੀਖਿਆਵਾਂ ਮੁਲਤਵੀ ਕਰ ਦਿਤੀਆਂ ਗਈਆਂ ਹਨ ਅਤੇ ਬੋਰਡ ਇਕ ਜੂਨ ਨੂੰ ਹਾਲਾਤ 'ਤੇ ਮੁੜ ਵਿਚਾਰ ਕਰੇਗਾ ਤੇ ਨਵੀਂ ਸਮਾਂ ਸਾਰਣੀ ਬਾਰੇ ਉਸੇ ਮੁਤਾਬਕ ਜਾਣਕਾਰੀ ਜਨਤਕ ਕੀਤੀ ਜਾਵੇਗੀ | ਪ੍ਰੀਖਿਆ ਸ਼ੁਰੂ ਹੋਣ ਤੋਂ 15 ਦਿਨ ਪਹਿਲਾਂ ਸੂਚਨਾ ਦੇ ਦਿਤੀ ਜਾਵੇਗੀ |
