ਪਿੰਡ ਉਗਰਾਹਾਂ ਵਿਖੇ ਵਿਆਂਧੜ ਮੁੰਡੇ ਦੀ ਲਾਵਾਂ ਲੈਣ ਤੋਂ ਕੁਝ ਘੰਟੇ ਪਹਿਲਾਂ ਹਾਦਸੇ ਵਿਚ ਮੌਤ ਹੋ ਜਾਣ
ਸੁਨਾਮ ਊਧਮ ਸਿੰਘ ਵਾਲਾ, 14 ਜੂਨ (ਦਰਸ਼ਨ ਸਿੰਘ ਚੌਹਾਨ): ਪਿੰਡ ਉਗਰਾਹਾਂ ਵਿਖੇ ਵਿਆਂਧੜ ਮੁੰਡੇ ਦੀ ਲਾਵਾਂ ਲੈਣ ਤੋਂ ਕੁਝ ਘੰਟੇ ਪਹਿਲਾਂ ਹਾਦਸੇ ਵਿਚ ਮੌਤ ਹੋ ਜਾਣ ਦੀ ਖ਼ਬਰ ਨੇ ਖ਼ੁਸ਼ੀ ਦੇ ਜਸ਼ਨਾਂ ਨੂੰ ਗਮਗੀਨ ਮਾਹੌਲ ਵਿਚ ਬਦਲ ਦਿਤਾ। ਮ੍ਰਿਤਕ ਨੌਜਵਾਨ ਦਾ ਕਲ ਹੀ ਸ਼ਗਨ ਹੋਇਆ ਸੀ ਅਤੇ ਅੱਜ ਬਰਾਤ ਜਾਣੀ ਸੀ। ਇਸ ਸਬੰਧੀ ਜਾਣਕਾਰੀ ਦਿੰਦਿਆਂ ਥਾਣਾ ਛਾਜਲੀ ਵਿਖੇ ਤਾਇਨਾਤ ਸਹਾਇਕ ਥਾਣੇਦਾਰ ਮੇਹਰ ਸਿੰਘ ਨੇ ਦਸਿਆ ਕਿ ਪਿੰਡ ਉਗਰਾਹਾਂ ਦੇ 26 ਕੁ ਵਰ੍ਹਿਆਂ ਦੇ ਨੌਜਵਾਨ ਸੁਖਦੀਪ ਸਿੰਘ ਦਾ ਵਿਆਹ ਰੱਖਿਆ ਹੋਇਆ ਸੀ, ਕਲ ਉਸ ਦਾ ਸ਼ਗਨ ਹੋਇਆ ਅਤੇ ਅੱਜ ਬਰਾਤ ਜਾਣੀ ਸੀ, ਘਰ ਵਿਚ ਖ਼ੁਸ਼ੀ ਦਾ ਮਾਹੌਲ ਸੀ।
File Photo
ਉਨ੍ਹਾਂ ਕਿਹਾ ਕਿ ਵਿਆਂਧੜ ਸੁਖਦੀਪ ਸਿੰਘ ਰਾਤ ਨੂੰ ਕਰੀਬ ਗਿਆਰਾਂ ਕੁ ਵਜੇ ਮੋਟਰਸਾਈਕਲ ਉਤੇ ਪਿੰਡ ਵਿਚ ਹੀ ਅਪਣੇ ਕਿਸੇ ਦੋਸਤ ਦੇ ਘਰ ਜਾ ਰਿਹਾ ਸੀ ਤਾਂ ਅਚਾਨਕ ਮੋਟਰਸਾਈਕਲ ਬੇਕਾਬੂ ਹੋ ਕੇ ਕੰਧ ਵਿਚ ਜਾ ਵੱਜਾ ਜਿਸ ਕਾਰਨ ਵਿਆਹ ਵਾਲੇ ਮੁੰਡੇ ਦੀ ਮੌਕੇ ਉਤੇ ਹੀ ਮੌਤ ਹੋ ਗਈ। ਸਹਾਇਕ ਥਾਣੇਦਾਰ ਮੇਹਰ ਸਿੰਘ ਨੇ ਦਸਿਆ ਕਿ ਪੁਲਿਸ ਨੇ ਮ੍ਰਿਤਕ ਨੌਜਵਾਨ ਦੇ ਪਿਤਾ ਮੇਜਰ ਸਿੰਘ ਦੇ ਬਿਆਨਾਂ ਉਤੇ 174 ਦੀ ਕਾਰਵਾਈ ਅਮਲ ਵਿੱਚ ਲਿਆਕੇ ਪੋਸਟਮਾਰਟਮ ਉਪਰੰਤ ਲਾਸ਼ ਵਾਰਸਾਂ ਨੂੰ ਸੌਂਪ ਦਿਤੀ ਹੈ।
