ਹਲਕਾ ਜ਼ੀਰਾ ਦੇ ਪਿੰਡ ਵਿਖੇ 8 ਸਾਲਾ ਮਾਸੂਮ ਲੜਕੇ ਨਾਲ ਮੁਹੱਲੇ 'ਚੋਂ ਵੱਡੀ ਉਮਰ ਦੇ ਤਿੰਨ ਲੜਕਿਆਂ ਵਲੋਂ ਬਦਫ਼ੈਲੀ ਕਰਨ ਦਾ ਸ਼ਰਮਨਾਕ ਮਾਮਲਾ ਸਾਹਮਣੇ ਆਇਆ ਹੈ।
ਫ਼ਿਰੋਜ਼ਪੁਰ, 13 ਜੁਲਾਈ (ਜਗਵੰਤ ਸਿੰਘ ਮੱਲ੍ਹੀ): ਹਲਕਾ ਜ਼ੀਰਾ ਦੇ ਪਿੰਡ ਮਹੀਆਂ ਵਾਲਾ ਕਲਾਂ ਵਿਖੇ 8 ਸਾਲਾ ਮਾਸੂਮ ਲੜਕੇ ਨਾਲ ਮੁਹੱਲੇ 'ਚੋਂ ਵੱਡੀ ਉਮਰ ਦੇ ਤਿੰਨ ਲੜਕਿਆਂ ਵਲੋਂ ਬਦਫ਼ੈਲੀ ਕਰਨ ਦਾ ਸ਼ਰਮਨਾਕ ਮਾਮਲਾ ਸਾਹਮਣੇ ਆਇਆ ਹੈ। ਪੀੜਤ ਲੜਕਾ ਸਿਵਲ ਹਸਪਤਾਲ ਜ਼ੀਰਾ ਵਿਚ ਇਲਾਜ ਅਧੀਨ ਹੈ। ਜਿੱਥੇ ਪੀੜਤ ਲੜਕੇ ਦੀ ਮਾਤਾ ਅਤੇ ਹੋਰ ਰਿਸ਼ਤੇਦਾਰਾਂ ਨੇ ਪੱਤਰਕਾਰਾਂ ਨੂੰ ਜਾਣਕਾਰੀ ਦਿੰਦਿਆਂ ਦਸਿਆ ਕਿ ਉਸ ਦਾ ਲੜਕਾ ਬੀਤੇ ਸਨਿਚਰਵਾਰ ਗਲੀ ਵਿਚ ਖੇਡ ਰਿਹਾ ਸੀ। ਜਦਕਿ ਮੁਹੱਲੇ ਦੇ ਕੁੱਝ ਮੁੰਡੇ ਉਸ ਨੂੰ ਜਾਮਣਾਂ ਤੋੜਨ ਦੇ ਬਹਾਨੇ ਅਪਣੇ ਨਾਲ ਲੈ ਗਏ।
ਜਿੱਥੋ ਉਸ ਨਾਲ ਕਥਿਤ ਰੂਪ ਵਿਚ ਬਦਫ਼ੈਲੀ ਕੀਤੀ ਗਈ। ਉਨ੍ਹਾਂ ਦਸਿਆ ਕਿ ਜਦੋਂ ਲੜਕਾ ਘਰੋਂ ਬਾਹਰ ਖੇਡਣ ਗਿਆ ਬਾਅਦ ਦੁਪਹਿਰ ਦੋ ਵਜੇ ਤਕ ਘਰ ਵਾਪਸ ਨਾ ਪਰਤਿਆ ਤਾਂ ਫਿਕਰਮੰਦ ਹੁੰਦੀ ਹੋਈ ਮਾਂ ਨੇ ਭਾਲ ਕੀਤੀ। ਪੁੱਛ ਪੜਤਾਲ 'ਚ ਪਿੰਡ ਦੇ ਕੁੱਝ ਲੋਕਾਂ ਦਸਿਆ ਕਿ ਬੱਚਾ ਉਕਤ ਲੜਕੇ ਨਾਲ ਲੈ ਗਏ ਹਨ। ਜਿੱਥੇ ਪਹੁੰਚ ਕੇ ਦੇਖਿਆ ਤਾਂ ਪੀੜਤ ਮਾਸੂਮ ਲੜਕਾ ਰੋ ਰਿਹਾ ਸੀ ਜਿਸ ਨੂੰ ਉਹ ਘਰ ਲੈ ਆਈ ਅਤੇ ਬਾਅਦ ਵਿਚ ਲੜਕੇ ਨੇ ਅਪਣੇ ਨਾਲ ਹੋਈ ਹੱਡਬੀਤੀ ਉਸ ਨੂੰ ਦਸੀ। ਜਿਸ ਤੋਂ ਬਾਅਦ ਪਰਵਾਰ ਨਾਲ ਗੱਲਬਾਤ ਕਰ ਕੇ ਉਸ ਨੂੰ ਅੱਜ ਸਿਵਲ ਹਸਪਤਾਲ ਜ਼ੀਰਾ ਲਿਆਂਦਾ ਗਿਆ ਹੈ।
ਇਸ ਦੌਰਾਨ ਐਮਰਜੈਂਸੀ ਡਿਊਟੀ 'ਤੇ ਤਾਇਨਾਤ ਡਾਕਟਰ ਨਵਜੋਤ ਕੌਰ ਨੇ ਦਸਿਆ ਕਿ ਪੀੜਤ ਨਾਲ ਤਿੰਨ ਦਿਨ ਪਹਿਲਾਂ ਘਟਨਾ ਵਾਪਰੀ ਹੈ ਜਿਸ ਸਬੰਧੀ ਰਿਪੋਰਟ ਤਿਆਰ ਕੀਤੀ ਜਾ ਰਹੀ ਹੈ। ਉਧਰ ਦੂਜੇ ਪਾਸੇ ਪੁਲਿਸ ਥਾਣਾ ਸਦਰ ਜ਼ੀਰਾ ਦੇ ਏਐਸਆਈ ਵਣ ਸਿੰਘ ਨੇ ਆਖਿਆ ਕਿ ਇਤਲਾਹ ਮਿਲਣ 'ਤੇ ਉਹ ਮਾਮਲੇ ਦੀ ਪੜਤਾਲ ਕਰ ਰਹੇ ਹਨ।