ਜੰਮੂ-ਕਸ਼ਮੀਰ : ਅਰਨੀਆ ਸੈਕਟਰ ’ਚ ਦਿਸਿਆ ਡਰੋਨ, ਜਵਾਨਾਂ ਦੀ ਗੋਲੀਬਾਰੀ ਤੋਂ ਬਾਅਦ ਹੋਇਆ ਗ਼ਾਇਬ

ਸ਼੍ਰੀਨਗਰ, 14 ਜੁਲਾਈ : ਸੀਮਾ ਸੁਰੱਖਿਆ ਬਲ (ਬੀ.ਐਸ.ਐਫ.) ਦੇ ਜਵਾਨਾਂ ਨੇ ਜੰਮੂ-ਕਸ਼ਮੀਰ ਦੇ ਅਰਨੀਆ ਸੈਕਟਰ ’ਚ ਅੰਤਰਰਾਸ਼ਟਰੀ ਸਰਹੱਦ (ਆਈ.ਬੀ.) ਦੇ ਨੇੜੇ ਇਕ ਵਾਰ ਫਿਰ ਤੋਂ ਡ੍ਰੋਨ ਉਡਦਾ ਵੇਖਿਆ। ਸੁਰੱਖਿਆ ਬਲਾਂ ਨੇ ਉਸ ਨੂੰ ਵੇਖਦੇ ਹੀ ਤੁਰਤ ਫ਼ਾਇਰਿੰਗ ਕਰ ਦਿਤੀ ਜਿਸ ਕਾਰਨ ਉਹ ਵਾਪਸ ਚਲਾ ਗਿਆ। ਅਧਿਕਾਰੀਆਂ ਨੇ ਦਸਿਆ ਕਿ 13 ਅਤੇ 14 ਜੁਲਾਈ ਦੀ ਦਰਮਿਆਨੀ ਰਾਤ ਅਰਨੀਆ ਸੈਕਟਰ ’ਚ ਜਵਾਨਾਂ ਨੇ ਕਰੀਬ 200 ਮੀਟਰ ਦੀ ਉਚਾਈ ’ਤੇ ਜਗਦੀ-ਬੁਜਦੀ ਲਾਲ ਬੱਤੀ ਵੇਖੀ। ਉਨ੍ਹਾਂ ਕਿਹਾ ਕਿ ਜਵਾਨਾਂ ਨੇ ਉਸ ’ਤੇ ਗੋਲੀਆਂ ਚਲਾਈਆਂ, ਜਿਸ ਕਾਰਨ ਲਾਲ ਬੱਤੀ ਵਾਲੀ ਚੀਜ ਉਥੋਂ ਗਾਇਬ ਹੋ ਗਈ। ਇਲਾਕੇ ’ਚ ਤਲਾਸ਼ੀ ਮੁਹਿੰਮ ਜਾਰੀ ਹੈ। ਅਜੇ ਤਕ ਕੁੱਝ ਵੀ ਬਰਾਮਦ ਨਹੀਂ ਹੋਇਆ। 
ਜ਼ਿਕਰਯੌਗ ਹੈ ਕਿ 2 ਜੁਲਾਈ ਨੂੰ ਪਾਕਿਸਤਾਨ ਦੇ ‘ਕਵਾਡਕਾਪਟਰ’ ਨੇ ਅਰਨੀਆ ਸੈਕਟਰ ’ਚ ਅੰਤਰਰਾਸ਼ਟਰੀ ਸਰਹੱਦ ਤੋਂ ਭਾਰਤੀ ਖੇਤਰ ’ਚ ਦਾਖਲ ਹੋਣ ਦੀ ਕੋਸ਼ਿਸ਼ ਕੀਤੀ ਸੀ ਪਰ ਬੀ.ਐਸ.ਐਫ਼. ਦੇ ਜਵਾਨਾਂ ਦੁਆਰਾ ਫਾਇਰਿੰਗ ਤੋਂ ਬਾਅਦ ਉਹ ਪਿੱਛੇ ਹਟ ਗਿਆ ਸੀ। ਪਾਕਿਸਤਾਨ ਸਥਿਤ ਅਤਿਵਾਦੀਆਂ ਦੁਆਰਾ ਭਾਰਤ ਦੀਆਂ ਮਹੱਤਵਪੂਰਨ ਥਾਵਾਂ ’ਤੇ ਹਮਲਾ ਕਰਨ ਲਈ ਡ੍ਰੋਨ ਦਾ ਇਸਤੇਮਾਲ ਕਰਨ ਦਾ ਪਹਿਲਾ ਮਾਮਲਾ 27 ਜੂਨ ਤੜਕੇ ਸਾਹਮਣੇ ਆਇਆ ਸੀ, ਜਦੋਂ ਜੰਮੂ ਸ਼ਹਿਰ ਦੇ ਭਾਰਤੀ ਹਵਾਈ ਫ਼ੌਜ ਅੱਡੇ ’ਤੇ ਦੋ ਬੰਬ ਸੁੱਟੇ ਗਏ ਸਨ। ਇਸ ਵਿਚ ਦੋ ਜਵਾਨ ਮਾਮੂਲੀ ਜ਼ਖ਼ਮੀ ਹੋਏ ਸਨ। ਅਧਿਕਾਰੀਆਂ ਨੇ ਵੱਖ-ਵੱਖ ਜ਼ਿਲ੍ਹਿਆਂ ’ਚ ਜ਼ਿਆਦਾਤਰ ਜੰਮੂ-ਕਸ਼ਮੀਰ ਦੇ ਸਰਹੱਦੀ ਜ਼ਿਲ੍ਹਿਆਂ ’ਚ ਡ੍ਰੋਨ ਅਤੇ ਹੋਰ ਮਨੁੱਖ ਰਹਿਤ ਹਵਾਈ ਯੰਤਰਾਂ ਨੂੰ ਸਟੋਰ ਕਰਨ, ਵਿਕਰੀ ਜਾਂ ਉਸ ਨੂੰ ਕਬਜੇ ’ਚ ਰੱਖਣ ’ਤੇ ਪਾਬੰਦੀ ਲਗਾ ਦਿਤੀ ਹੈ।     (ਏਜੰਸੀ)