ਦੋ ਬਸਾਂ ਦੀ ਹੋਈ ਟੱਕਰ, 9 ਜ਼ਖ਼ਮੀ, ਦੋ ਜਣਿਆਂ ਦੀ ਹਾਲਤ ਗੰਭੀਰ

ਤਲਵੰਡੀ ਸਾਬੋ, 14 ਅਗੱਸਤ (ਪਪ) : ਬਾਅਦ ਦੁਪਹਿਰ ਤਲਵੰਡੀ ਸਾਬੋ ਦੇ ਰੋੜੀ ਰੋਡ ’ਤੇ ਇਕ ਵਾਹਨ ਨੂੰ ਬਚਾਉਣ ਦੀ ਕੋਸ਼ਿਸ ਵਿਚ ਦੋ ਬਸਾਂ ਦੀ ਹੋਈ ਟੱਕਰ ਦੌਰਾਨ 9 ਸਵਾਰੀਆਂ ਦੇ ਜ਼ਖ਼ਮੀ ਹੋਣ ਦੀ ਸੂਚਨਾ ਮਿਲੀ ਹੈ। ਜ਼ਖ਼ਮੀਆਂ ਨੂੰ ਇਲਾਜ ਲਈ ਤਲਵੰਡੀ ਸਾਬੋ ਦੇ ਸਿਵਲ ਹਸਪਤਾਲ ਵਿਚ ਦਾਖ਼ਲ ਕਰਵਾਇਆ ਗਿਆ ਹੈ ਜਦਕਿ ਦੋ ਜ਼ਖ਼ਮੀਆਂ ਦੀ ਹਾਲਤ ਗੰਭੀਰ ਹੋਣ ਕਾਰਨ ਉਨ੍ਹਾਂ ਨੂੰ ਬਠਿੰਡਾ ਰੈਫ਼ਰ ਕਰ ਦਿਤਾ ਗਿਆ ਹੈ। ਮਿਲੀ ਜਾਣਕਾਰੀ ਅਨੁਸਾਰ ਇਕ ਪ੍ਰਾਈਵੇਟ ਕੰਪਨੀ ਐਮਐਸ ਬੱਸ ਸਰਵਿਸ ਭਾਗੀਵਾਂਦਰ ਦੀ ਬੱਸ ਸਰਦੂਲਗੜ੍ਹ ਵਲ ਨੂੰ ਜਾ ਰਹੀ ਸੀ ਕਿ ਉਸ ਦੇ ਅੱਗੇ ਚੱਲ ਰਹੇ ਇਕ ਟ੍ਰੈਕਟਰ ਵਾਲੇ ਵੱਲੋਂ ਬਰੇਕ ਮਾਰਨ ’ਤੇ ਪ੍ਰਾਈਵੇਟ ਬੱਸ ਚਾਲਕ ਨੇ ਉਸ ਨੂੰ ਬਚਾਉਣ ਲਈ ਜਦੋਂ ਬੱਸ ਦੂਜੇ ਪਾਸੇ ਵਲ ਲਿਜਾਣ ਦੀ ਕੋਸ਼ਿਸ਼ ਕੀਤੀ ਤਾਂ ਸਾਹਮਣਿਉਂ ਆ ਰਹੀ ਪੀਆਰਟੀਸੀ ਬਠਿੰਡਾ ਡਿੱਪੂ ਦੀ ਬੱਸ ਨਾਲ ਉਸਦੀ ਟੱਕਰ ਹੋ ਗਈ। ਟੱਕਰ ਉਪਰੰਤ ਪੀਆਰਟੀਸੀ ਦੀ ਬੱਸ ਇਕ ਦਰੱਖ਼ਤ ਨਾਲ ਵੀ ਟਕਰਾ ਗਈ। ਟੱਕਰ ’ਚ ਦੋਹਾਂ ਬਸਾਂ ਦੇ ਡਰਾਈਵਰਾਂ, ਸਕੂਲੀ ਵਿਦਿਆਰਥੀ ਤੇ ਇਕ ਬੱਚੇ ਸਮੇਤ ਕੁੱਲ 9 ਸਵਾਰੀਆਂ ਜ਼ਖ਼ਮੀ ਹੋਈਆਂ, ਜਿਨ੍ਹਾਂ ਨੂੰ ਸਹਾਰਾ ਕਲੱਬ ਤਲਵੰਡੀ ਸਾਬੋ ਦੇ ਹੈਪੀ ਸਿੰਘ ਵਲੋਂ ਕਲੱਬ ਤੇ ਪ੍ਰਾਈਵੇਟ ਐਂਬੂਲੈਂਸਾਂ ਦੇ ਸਹਿਯੋਗ ਨਾਲ ਸ਼ਹੀਦ ਬਾਬਾ ਦੀਪ ਸਿੰਘ ਸਿਵਲ ਹਸਪਤਾਲ ਤਲਵੰਡੀ ਸਾਬੋ ਲਿਆਂਦਾ ਗਿਆ। ਜ਼ਖ਼ਮੀਆਂ ’ਚ ਹਰਵਿੰਦਰ ਸਿੰਘ ਭਾਗੀਵਾਂਦਰ, ਜਸਵੰਤ ਕੌਰ ਤਲਵੰਡੀ ਸਾਬੋ, ਹਰਨੀਤ ਕੌਰ ਬੰਗੀ ਰੁਘੂ, ਹਰਪ੍ਰਰੀਤ ਸਿੰਘ ਲਹਿਰੀ, ਕ੍ਰਿਸ਼ਨਾ ਰਾਣੀ ਤੇ ਵੀਰਪਾਲ ਦੋਵੇਂ ਬਠਿੰਡਾ, ਅਮਰਜੀਤ ਕੌਰ ਰਾਏਕੇ ਕਲਾਂ, ਇਕਬਾਲ ਸਿੰਘ ਮਿਰਜ਼ੇਆਣਾ ਅਤੇ ਸੁਖਬੀਰ ਕੌਰ ਸੂਰਤੀਆ ਦੇ ਨਾਂ ਸ਼ਾਮਲ ਹਨ। ਮਿਲੀ ਜਾਣਕਾਰੀ ਅਨੁਸਾਰ ਸਿਵਲ ਹਸਪਤਾਲ ’ਚ ਮੁੱਢਲੇ ਇਲਾਜ ਉਪਰੰਤ ਦੋ ਗੰਭੀਰ ਜ਼ਖ਼ਮੀਆਂ ਨੂੰ ਬਠਿੰਡਾ ਰੈਫ਼ਰ ਕੀਤਾ ਗਿਆ ਹੈ ਜਦਕਿ ਬਾਕੀ ਸਿਵਲ ਹਸਪਤਾਲ ਤਲਵੰਡੀ ਸਾਬੋ ਵਿਖੇ ਡਾ. ਹੈਰੀ ਗਰਗ, ਸੰਦੀਪ ਸਿੰਘ ਫ਼ਾਰਮੇਸੀ ਅਫ਼ਸਰ, ਕੁਲਵਿੰਦਰ ਸਿੰਘ ਅਤੇ ਕਾਲੀ ਚਰਨ ਕਿੰਦੂ ਦੀ ਨਿਗਰਾਨੀ ਹੇਠ ਜ਼ੇਰੇ ਇਲਾਜ ਹਨ।