ਲੜਕੀ ਦੇ ਪ੍ਰਵਾਰ ਨੇ ਇਨਸਾਫ਼ ਦੀ ਲਗਾਈ ਗੁਹਾਰ
ਹੁਸ਼ਿਆਰਪੁਰ : ਹਾਜੀਪੁਰ ਤੋਂ ਹੈਰਾਨ ਕਰ ਦੇਣ ਵਾਲਾ ਮਾਮਲਾ ਸਾਹਮਣੇ ਆਇਆ ਹੈ। ਹਾਜੀਪੁਰ ਦੇ ਅਧੀਨ ਪੈਂਦੇ ਪਿੰਡ ਬੇਲਾ ਸਾਰਿਆਣਾਂ ਦੀ ਪੱਤੀ ਨਾਮ ਨਗਰ ਵਿਚ ਵਿਆਹ ਦੀਆਂ ਖ਼ੁਸ਼ੀਆਂ ਉਸ ਵੇਲੇ ਮਾਤਮ ਵਿਚ ਬਦਲ ਗਈਆਂ ਜਦੋਂ ਕੁੜੀ ਵਾਲਿਆਂ ਦੇ ਘਰ ਬਰਾਤ ਆਉਣ ਤੋਂ ਐਨ ਮੌਕੇ ’ਤੇ ਮੁੰਡੇ ਸਣੇ ਮੁੰਡੇ ਦੇ ਪ੍ਰਵਾਰ ਵਾਲਿਆਂ ਨੇ ਵਿਆਹ ਕਰਨ ਤੋਂ ਇਨਕਾਰ ਕਰ ਦਿਤਾ। ਹੱਥਾਂ ’ਤੇ ਮਹਿੰਦਾ ਲਗਾ ਤੇ ਬਾਹਾਂ ’ਚ ਲਾਲ ਚੂੜਾ ਪਾ ਕੇ ਦੁਲਹਣ ਬਣ ਬੈਠੀ ਕੁੜੀ ਦੇ ਸਾਰੇ ਸੁਪਨੇ ਚਕਨਾਚੂਰ ਹੋ ਗਏ।
ਘਰ ਵਿਚ ਜਿਥੇ ਰੌਣਕਾਂ ਲੱਗੀਆਂ ਹੋਈਆਂ ਸਨ ਅਤੇ ਪ੍ਰਵਾਰਕ ਮੈਂਬਰ ਬਰਾਤ ਦੇ ਸਵਾਗਤ ਦੀਆਂ ਤਿਆਰੀਆਂ ਵਿਚ ਜੁਟੇ ਸਨ, ਉਥੇ ਇਸ ਮੰਦਭਾਗੀ ਖ਼ਬਰ ਨੇ ਸੱਭ ਨੂੰ ਸਦਮੇ ਵਿਚ ਪਾ ਦਿਤਾ। ਜਦ ਕੁੜੀ ਦੇ ਪਿਤਾ ਸਾਂਈ ਨਾਲ ਗੱਲਬਾਤ ਕੀਤੀ ਤਾਂ ਉਨ੍ਹਾਂ ਦਸਿਆ ਕਿ ਅੱਜ ਸੱਭ ਕੱੁਝ ਤੈਅ ਪ੍ਰੋਗਰਾਮ ਅਨੁਸਾਰ ਚਲ ਰਿਹਾ ਸੀ ਪਰ ਜਦੋਂ ਬਰਾਤ ਦੇ ਆਉਣ ਦੇ ਤੈਅ ਸਮੇਂ ਤੋਂ ਕੁੱਝ ਹੀ ਦੇਰ ਪਹਿਲਾਂ ਮੁੰਡੇ ਵਾਲਿਆਂ ਵਲੋਂ ਵਿਆਹ ਤੋਂ ਨਾਂਹ ਕਰਨ ਦਾ ਫ਼ੈਸਲਾ ਸੁਣਾਇਆ ਗਿਆ ਤਾਂ ਮਾਹੌਲ ਗਮਗੀਨ ਹੋ ਗਿਆ।
ਕੁੜੀ ਦੇ ਪ੍ਰਵਾਰ ਲਈ ਇਹ ਖ਼ਬਰ ਇਕ ਵੱਡਾ ਝਟਕਾ ਸੀ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਵਿਆਹ ਦੀਆਂ ਸਾਰੀਆਂ ਤਿਆਰੀਆਂ ਪੂਰੀਆਂ ਹੋ ਚੁੱਕੀਆਂ ਸਨ ਅਤੇ ਖ਼ਰਚਾ ਵੀ ਕਾਫ਼ੀ ਹੋ ਚੁੱਕਾ ਸੀ। ਉਨ੍ਹਾਂ ਦਸਿਆ ਕਿ ਉਨ੍ਹਾਂ ਦੀ ਧੀ ਦੇ ਵਿਆਹ ਦੀ ਗੱਲਬਾਤ ਪਿੰਡ ਚੋਤਾਂ ਮਿਆਣੀ ਜ਼ਿਲ੍ਹਾ ਲੁਧਿਆਣਾ ਦੇ ਇਕ ਗੁੱਜਰ ਪ੍ਰਵਾਰ ਨਾਲ ਕਰੀਬ ਇਕ ਮਹੀਨਾ ਪਹਿਲਾਂ ਹੋਈ ਸੀ ਅਤੇ 10 ਦਿਨ ਪਹਿਲਾਂ ਵਿਆਹ ਪੱਕਾ ਹੋਇਆ ਸੀ। ਰਿਸ਼ਤਾ ਟੁੱਟਣ ਦੇ ਪਿੱਛੇ ਕੀ ਕਾਰਨ ਰਿਹਾ, ਇਸ ਬਾਰੇ ਅਜੇ ਸਪੱਸ਼ਟ ਜਾਣਕਾਰੀ ਨਹੀਂ ਮਿਲ ਸਕੀ ਹੈ। ਪੀੜਤ ਪ੍ਰਵਾਰ ਨੇ ਮਾਮਲੇ ਸਬੰਧੀ ਮੁੰਡੇ ਵਾਲਿਆਂ ਵਿਰੁਧ ਕਾਨੂੰਨੀ ਕਾਰਵਾਈ ਕਰਨ ਦੀ ਮੰਗ ਕੀਤੀ ਹੈ।
