ਸੌਦਾ ਸਾਦ ਨੇ ਮਾਤਾ ਨੂੰ ਲਿਖੀ ਚਿੱਠੀ
ਸਿਰਸਾ (ਸੁਰਿੰਦਰ ਪਾਲ ਸਿੰਘ) : ਸਾਧਵੀ ਬਲਾਤਕਾਰ ਅਤੇ ਪੱਤਰਕਾਰ ਰਾਮ ਚੰਦਰ ਛੱਤਰਪਤੀ ਮਾਮਲੇ ਅਧੀਨ ਰੋਹਤਕ ਦੀ ਸੁਨਾਰੀਆ ਜੇਲ੍ਹ ਵਿਚ 20 ਸਾਲ ਦੀ ਸਜ਼ਾ ਕੱਟ ਰਹੇ ਡੇਰਾ ਪ੍ਰਮੁੱਖ ਗੁਰਮੀਤ ਸਿੰਘ ਨੇ ਅਪਣੀ ਮਾਤਾ ਨਸੀਬ ਕੌਰ ਦੇ ਨਾਂ ਜੇਲ੍ਹ ਵਿਚੋਂ ਜੋ ਚਿੱਠੀ ਲਿਖੀ ਹੈ ਉਹ ਸੋਸ਼ਲ ਮੀਡੀਆ 'ਤੇ ਹੁਣ ਵਾਇਰਲ ਹੋ ਰਹੀ ਹੈ।
ਡੇਰਾ ਮੁਖੀ ਦੀ ਸੁਨਾਰੀਆ ਜੇਲ੍ਹ ਵਿਚੋਂ ਅਪਣੇ ਪਰਵਾਰ ਦੇ ਨਾਮ ਇਹ ਪਹਿਲੀ ਚਿੱਠੀ ਹੈ। ਗੁਰਮੀਤ ਸਿੰਘ ਦੇ ਜੇਲ ਜਾਣ ਤੋਂ ਬਾਅਦ ਸੋਸ਼ਲ ਮੀਡੀਆ ਉਤੇ ਵਾਇਰਲ ਹੋਈ ਇਹ ਚਿੱਠੀ ਨੂੰ ਉਸ ਦੇ ਪ੍ਰੇਮੀਆਂ ਨੇ ਸੋਸ਼ਲ ਮੀਡੀਆ ਉੱਤੇ ਸ਼ੇਅਰ ਕੀਤਾ ਹੈ ਅਤੇ ਇਸ ਚਿੱਠੀ ਨੂੰ ਡੇਰੇ ਦੀ ਚੇਅਰਪਰਸਨ ਸ਼ੋਭਾ ਅਤੇ ਹਨੀਪ੍ਰੀਤ ਨੇ ਵੀ ਟਵੀਟ ਕੀਤਾ ਹੈ।
ਇਸ ਚਿੱਠੀ ਮੁਤਾਬਕ ਗੁਰਮੀਤ ਸਿੰਘ ਨੇ ਅਪਣੀ ਮਾਂ ਨਸੀਬ ਕੌਰ ਨੂੰ ਲਿਖਿਆ ਹੈ ਕਿ ਉਹ ਜਲਦੀ ਹੀ ਜੇਲ ਵਿਚੋਂ ਬਾਹਰ ਆਵੇਗਾ ਅਤੇ ਬਾਹਰ ਆਉਂਦਿਆਂ ਹੀ ਮਾਹਰ ਡਾਕਟਰਾਂ ਤੋਂ ਅਪਣੀ ਮਾਂ ਦਾ ਪੂਰਾ ਇਲਾਜ ਕਰਵਾਏਗਾ। ਮਾਂ ਨੂੰ ਲਿਖੀ ਇਸ ਚਿੱਠੀ ਵਿਚ ਹੀ ਉਸ ਨੇ ਡੇਰੇ ਦੇ ਪ੍ਰੇਮੀਆਂ ਨੂੰ ਕੋਰੋਨਾ ਤੋਂ ਬਚਣ ਦੇ ਤਰੀਕੇ ਵੀ ਦੱਸੇ ਹਨ ਅਤੇ ਪੂਰੀ ਅਹਿਤਿਆਤ ਵਰਤਣ ਲਈ ਕਿਹਾ ਹੈ।
ਚਿੱਠੀ ਵਿਚ ਗੁਰਮੀਤ ਸਿੰਘ ਨੇ ਅਪਣੀ ਮਾਂ ਨੂੰ ਸਮੇਂ 'ਤੇ ਦਵਾਈ ਲੈਣ ਅਤੇ ਬੀਮਾਰੀਆਂ ਤੋਂ ਬਚਣ ਲਈ ਸੁਭਾ ਸ਼ਾਮ 15-15 ਮਿੰਟ ਲਈ ਯੋਗਾ ਕਰਨਾ ਅਤੇ ਭਗਵਾਨ ਦਾ ਨਾਮ ਜਪਣ ਦੀ ਨਸੀਅਤ ਕੀਤੀ ਹੈ। ਉਸ ਨੇ ਅਪਣੀ ਮਾਂ ਨੂੰ ਲਿਖਿਆ ਹੈ ਕਿ ਸਰਕਾਰੀ ਹਦਾਇਤਾਂ ਦਾ ਪੂਰੀ ਤਰ੍ਹਾਂ ਪਾਲਣ ਕੀਤਾ ਜਾਵੇ ਅਤੇ ਮਾਸਕ ਅਤੇ ਸੈਨੇਟਾਈਜ਼ਰ ਦੇ ਨਾਲ-ਨਾਲ ਪੌਸ਼ਟਿਕ ਭੋਜਨ ਪ੍ਰਯੋਗ ਕੀਤਾ ਜਾਵੇ।
ਨਾਲ ਹੀ ਉਸ ਨੇ ਮਾਂ ਨੂੰ ਤੁਲਸੀ, ਨਿੰਮ ਗਿਲੋਅ ਸਮੇਤ ਬਹੁਤ ਸਾਰੀਆਂ ਦੇਸੀ ਚੀਜ਼ਾਂ ਦਾ ਸੇਵਨ ਕਰਨ ਲਈ ਵੀ ਲਿਖਿਆ ਹੈ। ਉਸ ਨੇ ਇਹ ਵੀ ਲਿਖਿਆ ਹੈ ਕਿ ਡੇਰਾ ਅਨਿਆਈ ਕਿਸੇ ਨੂੰ ਦੁੱਖ-ਤਕਲੀਫ਼ ਨਾਂ ਦੇਣ ਸੇਵਾ ਅਤੇ ਸਿਮਰਨ ਕਰਨ ਅਤੇ ਰਕਤਦਾਨ ਕਰਨ ਅਤੇ ਲੋੜਵੰਦਾਂ ਦੀ ਸਹਾਇਤਾ ਕਰਨ। ਇਹ ਚਿੱਠੀ ਗੁਰਮੀਤ ਸਿੰਘ ਵਲੋਂ ਸੁਨਾਰੀਆ ਜੇਲ ਵਿਚੋਂ 7 ਮਈ ਨੂੰ ਲਿਖੀ ਗਈ ਸੀ, ਜਿਸ ਨੂੰ ਉਸ ਦੇ ਨੇੜੇ ਦੇ ਪ੍ਰੇਮੀਆਂ ਨੇ ਹੁਣ ਸੋਸ਼ਲ ਮੀਡੀਆ ਉੱਤੇ ਵਾਇਰਲ ਕੀਤਾ ਹੈ।