ਦਿੱਲੀ ਸਰਕਾਰ 5,000 ਨੌਜਵਾਨਾਂ ਨੂੰ ਸਿਹਤ ਸਹਾਇਕਾਂ ਦੇ ਤੌਰ 'ਤੇ ਦੇਵੇਗੀ ਸਿਖਲਾਈ
ਨਵੀਂ ਦਿੱਲੀ, 16 ਜੂਨ : ਦਿੱਲੀ ਦੇ ਮੁੱਖ ਮੰਤਰੀ ਅਰਵਿੰਦ ਕੇਜਰੀਵਾਲ ਨੇ ਬੁਧਵਾਰ ਨੂੰ ਕਿਹਾ ਕਿ ਉਨ੍ਹਾਂ ਦੀ ਸਰਕਾਰ ਕੋਵਿਡ-19 ਦੀ ਤੀਜੀ ਸੰਭਾਵਤ ਲਹਿਰ ਨਾਲ ਨਜਿੱਠਣ ਲਈ ਦਿੱਲੀ ਵਿਚ 5000 ਨੌਜਵਾਨਾਂ ਨੂੰ (ਹੈਲਥ ਅਸਿਸਟੈਂਟ) ਸਿਹਤ ਸਹਾਇਕਾਂ ਦੇ ਤੌਰ 'ਤੇ ਸਿਖਲਾਈ ਦੇਵੇਗੀ | ਕੇਜਰੀਵਾਲ ਨੇ ਕਿਹਾ ਕਿ ਸਿਹਤ ਸਹਾਇਕਾਂ ਜਾਂ ਕਮਿਊਨਿਟੀ ਨਰਸਿੰਗ ਸਹਾਇਕਾਂ ਨੂੰ 'ਨਰਸਿੰਗ' ਅਤੇ ਸਿਹਤ ਰਖਿਆ ਵਿਚ ਦੋ ਹਫ਼ਤੇ ਦੀ ਸਿਖਲਾਈ ਦਿਤੀ ਜਾਵੇਗੀ | ਇਹ ਐਲਾਨ ਮੁੱਖ ਮੰਤਰੀ ਅਰਵਿੰਦ ਕੇਜਰੀਵਾਲ ਨੇ ਬੁਧਵਾਰ ਨੂੰ ਪ੍ਰੈੱਸ ਕਾਨਫ਼ਰੰਸ ਕਰ ਕੇ ਕੀਤਾ | ਮੁੱਖ ਮੰਤਰੀ ਨੇ ਦਸਿਆ ਕਿ ਸਿਖਲਾਈ ਲਈ ਅਪਲਾਈ ਕਰਨ ਵਾਲਿਆਂ ਨੂੰ 12ਵੀਂ ਪਾਸ ਹੋਣਾ ਚਾਹੀਦਾ ਹੈ ਅਤੇ ਉਨ੍ਹਾਂ ਦੀ ਉਮਰ ਘੱਟੋ-ਘੱਟ 18 ਸਾਲ ਹੋਣੀ ਚਾਹੀਦੀ ਹੈ | ਸਿਖਲਾਈ ਲਈ ਅਰਜ਼ੀਆਂ 17 ਜੂਨ ਤੋਂ 'ਪਹਿਲੇ ਆਉ, ਪਹਿਲੇ ਪਾਉ' ਦੇ ਆਧਾਰ 'ਤੇ ਮਨਜ਼ੂਰ ਕੀਤੀਆਂ ਜਾਣਗੀਆਂ | ਕੇਜੀਵਾਲ ਨੇ ਕਿਹਾ ਕਿ ਦੇਸ਼ ਵਿਚ ਤੀਜੀ ਲਹਿਰ ਆਉਣ ਦਾ ਖ਼ਦਸ਼ਾ ਹੈ, ਇਸ ਲਈ ਆਕਸੀਜਨ ਸਟੋਰ ਦੀ ਸਮਰਥਾ ਵੀ ਵਧਾਈ ਜਾ ਰਹੀ ਹੈ | ਦੂਜੀ ਲਹਿਰ ਵਿਚ ਆਕਸੀਜਨ ਦੀ ਕਮੀ ਮਹਿਸੂਸ ਹੋਈ, ਇਸ ਲਈ ਅਸੀਂ ਤੀਜੀ ਲਹਿਰ ਲਈ ਤਿਆਰੀ ਕਰ ਰਹੇ ਹਾਂ | (ਪੀਟੀਆਈ)
image
