ਫ਼ੈਡਰਲ ਬੈਂਕ ਦਾ ਪਹਿਲੀ ਤਿਮਾਹੀ ਦਾ ਮੁਨਾਫ਼ਾ 64 ਫ਼ੀ ਸਦੀ ਵਧ ਕੇ 600.66 ਕਰੋੜ ਰੁਪਏ ਹੋਇਆ

ਨਵੀਂ ਦਿੱਲੀ, 15 ਜੁਲਾਈ : ਵਿੱਤੀ ਸਾਲ 2022-23 ਦੀ ਅਪ੍ਰੈਲ-ਜੂਨ ਤਿਮਾਹੀ ਵਿਚ ਫ਼ੈਡਰਲ ਬੈਂਕ ਦਾ ਸ਼ੁੱਧ ਲਾਭ 64 ਫ਼ੀ ਸਦੀ ਵਧ ਕੇ 600.66 ਕਰੋੜ ਰੁਪਏ ਹੋ ਗਿਆ ਹੈ। ਬੈਂਕ ਨੇ ਸ਼ੁੱਕਰਵਾਰ ਨੂੰ ਇਹ ਜਾਣਕਾਰੀ ਦਿਤੀ। ਨਿੱਜੀ ਖੇਤਰ ਦੇ ਰਿਣਦਾਤਾ ਬੈਂਕ ਨੇ ਵਿੱਤੀ ਸਾਲ 2021-22 ਦੀ ਜੂਨ ਤਿਮਾਹੀ ਵਿਚ 367.29 ਕਰੋੜ ਰੁਪਏ ਦਾ ਸ਼ੁੱਧ ਲਾਭ ਕਮਾਇਆ ਸੀ। ਪਿਛਲੀ ਤਿਮਾਹੀ (ਜਨਵਰੀ-ਮਾਰਚ) ’ਚ ਬੈਂਕ ਦਾ ਸ਼ੁੱਧ ਲਾਭ 540.54 ਕਰੋੜ ਰੁਪਏ ਸੀ। ਫ਼ੈਡਰਲ ਬੈਂਕ ਨੇ ਸਟਾਕ ਐਕਸਚੇਂਜ ਨੂੰ ਇਕ ਨੋਟੀਫ਼ਿਕੇਸ਼ਨ ਵਿਚ ਕਿਹਾ ਕਿ ਵਿੱਤੀ ਸਾਲ 2022-23 ਦੀ ਅਪ੍ਰੈਲ-ਜੂਨ ਤਿਮਾਹੀ ਦੌਰਾਨ ਉਸ ਦੀ ਕੁੱਲ ਆਮਦਨ ਵਧ ਕੇ 4,081.48 ਕਰੋੜ ਰੁਪਏ ਹੋ ਗਈ। ਪਿਛਲੇ ਵਿੱਤੀ ਸਾਲ ਦੀ ਇਸੇ ਤਿਮਾਹੀ ’ਚ ਇਹ 4,003.97 ਕਰੋੜ ਰੁਪਏ ਸੀ। 30 ਜੂਨ, 2022 ਤਕ ਬੈਂਕ ਦੀ ਕੁੱਲ ਗ਼ੈਰ-ਕਾਰਗੁਜ਼ਾਰੀ ਸੰਪਤੀ ਕੁੱਲ ਪੇਸ਼ਗੀ ਦੇ 2.69 ਫ਼ੀ ਸਦੀ ਤਕ ਘਟ ਗਈ ਹੈ। ਜੂਨ, 2021 ਦੇ ਅੰਤ ਤਕ ਇਹ 3.50 ਫ਼ੀ ਸਦੀ ਸੀ। ਮੁੱਲ ਦੇ ਲਿਹਾਜ਼ ਨਾਲ ਕੁੱਲ ਐਨ.ਪੀ.ਏ. ਜਾਂ ਖ਼ਰਾਬ ਕਰਜ਼ੇ 4,155.33 ਕਰੋੜ ਰੁਪਏ ’ਤੇ ਆ ਗਏ। ਵਿੱਤੀ ਸਾਲ 2021-22 ਦੀ ਜੂਨ ਤਿਮਾਹੀ ਦੇ ਅੰਤ ਵਿਚ 4,649.33 ਕਰੋੜ ਰੁਪਏ ਸੀ। ਸਮੀਖਿਆ ਅਧੀਨ ਤਿਮਾਹੀ ’ਚ ਖ਼ਰਾਬ ਕਰਜ਼ਿਆਂ ਅਤੇ ਸੰਕਟਕਾਲਾਂ ਲਈ ਬੈਂਕ ਦੀ ਵਿਵਸਥਾ ਘਟ ਕੇ 166.68 ਕਰੋੜ ਰੁਪਏ ਰਹਿ ਗਈ, ਜੋ ਇਕ ਸਾਲ ਪਹਿਲਾਂ ਦੀ ਮਿਆਦ ’ਚ 639.94 ਕਰੋੜ ਰੁਪਏ ਸੀ। (ਏਜੰਸੀ)