ਸੁਪਰੀਮ ਕੋਰਟ ਬਾਰ ਐਸੋਸੀਏਸ਼ਨ ਦੀ ਚੋਣ ਕਮੇਟੀ ਦੇ ਸਾਰੇ ਮੈਂਬਰਾਂ ਨੇ ਦਿਤਾ ਅਸਤੀਫ਼ਾ

ਨਵੀਂ ਦਿੱਲੀ, 16 ਜਨਵਰੀ : ਸੁਪਰੀਮ ਕੋਰਟ ਬਾਰ ਐਸੋਸੀਏਸ਼ਨ (ਐੱਸ.ਸੀ.ਬੀ.ਏ.) ਦੀ ਇਸ ਸਾਲ ਚੋਣ ਕਰਵਾਉਣ ਲਈ ਗਠਿਤ ਚੋਣ ਕਮੇਟੀ ਦੇ ਸਾਰੇ ਤਿੰਨ ਮੈਂਬਰਾਂ ਨੇ ਅਸਤੀਫ਼ੇ ਦੇ ਦਿਤੇ। ਐੱਸ.ਸੀ.ਬੀ.ਏ. ਚੋਣਾਂ 2020-2021 ਲਈ ਚੋਣ ਕਮੇਟੀ ਦਾ ਪ੍ਰਧਾਨ ਸੀਨੀਅਰ ਐਡਵੋਕੇਟ ਜੈਦੀਪ ਗੁਪਤਾ ਨੂੰ ਬਣਾਇਆ ਗਿਆ ਸੀ। ਕਮੇਟੀ ’ਚ ਹਰੇਨ ਪੀ ਰਾਵਲ ਅਤੇ ਨਕੁਲ ਦੀਵਾਨ ਵੀ ਸ਼ਾਮਲ ਸਨ। ਐੱਸ.ਸੀ.ਬੀ.ਏ. ਦੇ ਕਾਰਜਕਾਰੀ ਸਕੱਤਰ ਰੋਹਿਤ ਪਾਂਡੇ ਨੂੰ ਭੇਜੀ ਸਾਂਝੀ ਚਿੱਠੀ ’ਚ ਕਮੇਟੀ ਦੇ ਮੈਂਬਰਾਂ ਨੇ ਕਿਹਾ ਕਿ ਉਨ੍ਹਾਂ ਨੇ ਡਿਜੀਟਲ ਮਾਧਿਅਮ ਨਾਲ ਚੋਣ ਕਰਵਾਉਣਾ ਦਾ ਫ਼ੈਸਲਾ ਕੀਤਾ ਸੀ ਅਤੇ ਇਸ ਲਈ ਡਿਜੀਟਲ ਕੰਪਨੀ ਐੱਨ.ਐੱਸ.ਡੀ.ਐੱਲ. ਨਾਲ ਗੱਲ ਕੀਤੀ ਸੀ। 
ਚਿੱਠੀ ’ਚ ਕਿਹਾ ਗਿਆ ਹੈ ਕਿ ਐੱਨ.ਐੱਸ.ਡੀ.ਐੱਲ. ਨਾਲ ਮਸੌਦਾ ਸਮਝੌਤਾ ਅਤੇ ਡਿਜੀਟਲ ਤਰੀਕੇ ਨਾਲ ਚੋਣ ਕਰਵਾਉਣ ’ਚ ਆਉਣ ਵਾਲੇ ਅਨੁਮਾਨਤ ਖਰਚ ਦੀ ਜਾਣਕਾਰੀ 14 ਜਨਵਰੀ ਨੂੰ ਐੱਸ.ਸੀ.ਬੀ.ਏ. ਦੀ ਕਾਰਜਕਾਰੀ ਕਮੇਟੀ ਨੂੰ ਭੇਜ ਦਿਤੀ ਸੀ। ਚਿੱਠੀ ’ਚ ਕਮੇਟੀ ਦੇ ਮੈਂਬਰਾਂ ਨੇ ਕਿਹਾ,‘‘ਸਾਨੂੰ ਕਾਰਜਕਾਰੀ ਕਮੇਟੀ ਤੋਂ 14 ਜਨਵਰੀ ਨੂੰ ਪਾਸ ਪ੍ਰਸਤਾਵ ਮਿਲਿਆ। ਇਸ ’ਚ ਕੁਝ ਫ਼ੈਸਲੇ ਲਏ ਗਏ ਸਨ। ਇਸ ਘਟਨਾਕ੍ਰ੍ਰਮ ਨੂੰ ਅਸੀਂ ਐੱਸ.ਸੀ.ਬੀ.ਏ. ਦੀ ਕਾਰਜਕਾਰੀ ਕਮੇਟੀ ਵਲੋਂ ਸਾਡੇ ਨਿਰਦੇਸ਼ਾਂ ਨੂੰ ਮੰਨਣ ਤੋਂ ‘ਇਨਕਾਰ’ ਦੇ ਰੂਪ ’ਚ ਦੇਖਦੇ ਹਾਂ।’’
ਕਮੇਟੀ ਦੇ ਮੈਂਬਰਾਂ ਨੇ ਚਿੱਠੀ ’ਚ ਕਿਹਾ ਕਿ ਕਮੇਟੀ ਦੇ ਮੈਂਬਰਾਂ ਦੇ ਤੌਰ ’ਤੇ ਚੋਣ ਕਰਵਾਉਣ ਲਈ ਅਪਣੇ ਕਰਤਵਾਂ ਦਾ ਪਾਲਣ ਕਰਨਾ ਉਨ੍ਹਾਂ ਲਈ ਸੰਭਵ ਨਹੀਂ ਹੈ। ਬਾਰ ਐਸੋਸੀਏਸ਼ਨ ਦੇ ਕੁੱਝ ਨੇਤਾ ਡਿਜੀਟਲ ਮਾਧਿਅਮ ਨਾਲ ਚੋਣਾਂ ਕਰਵਾਉਣ ਦੇ ਵਿਰੁਧ ਹਨ ਅਤੇ ਇਸ ਤਰ੍ਹਾਂ ਦੀ ਵਿਵਸਥਾ ਚਾਹੁੰਦੇ ਹਨ, ਜਿਸ ’ਚ ਵਕੀਲਾਂ ਨੂੰ ਖੁਦ ਜਾ ਕੇ ਵੋਟ ਦੇਣ ਦੇ ਨਾਲ ਹੀ ਆਨਲਾਈਨ ਵੋਟ ਦੇਣ ਦੀ ਵੀ ਸਹੂਲਤ ਹੋਵੇ। ਇਸ ਤੋਂ ਪਹਿਲਾਂ, ਵੀਰਵਾਰ ਨੂੰ ਐੱਸ.ਸੀ.ਬੀ.ਏ. ਦੇ ਪ੍ਰਧਾਨ ਦੁਸ਼ਯੰਤ ਦਵੇ ਨੇ ਅਸਤੀਫ਼ਾ ਦੇ ਦਿਤਾ ਸੀ।    (ਪੀਟੀਆਈ)