ਡਾ. ਨਿੱਝਰ ਬਣੇ ਪੰਜਾਬ ਵਿਧਾਨ ਸਭਾ ਦੇ ਪ੍ਰੋਟੇਮ ਸਪੀਕਰ

ਰਾਜਪਾਲ ਨੇ ਮੁੱਖ ਮੰਤਰੀ ਦੀ ਮੌਜੂਦਗੀ 'ਚ ਸਹੁੰ ਚੁਕਾਈ

ਚੰਡੀਗੜ੍ਹ, 16 ਮਾਰਚ (ਗੁਰਉਪਦੇਸ਼ ਭੁੱਲਰ): ਅੰਮਿ੍ਤਸਰ (ਸਾਊਥ) ਹਲਕੇ ਦੇ 'ਆਪ' ਵਿਧਾਇਕ ਡਾ. ਇੰਦਰਜੀਤ ਸਿੰਘ ਨਿੱਝਰ ਪੰਜਾਬ ਵਿਧਾਨ ਸਭਾ ਦੇ ਪ੍ਰੋਟੇਮ (ਆਰਜ਼ੀ) ਸਪੀਕਰ ਬਣਾਏ ਗਏ ਹਨ | ਉਨ੍ਹਾਂ ਨੂੰ  ਅੱਜ ਸ਼ਾਮ ਮੁੱਖ ਮੰਤਰੀ ਭਗਵੰਤ ਮਾਨ ਦੀ ਮੌਜੂਦਗੀ ਵਿਚ ਰਾਜ ਭਵਨ ਵਿਖੇ ਸੰਖੇਪ ਸਮਾਰੋਹ ਦੌਰਾਨ ਰਾਜਪਾਲ ਬਨਵਾਰੀ ਲਾਲ ਪੁਰੋਹਿਤ ਨੇ ਅਹੁਦੇ ਦੀ ਸਹੁੰ ਚੁਕਾਈ |
ਜ਼ਿਕਰਯੋਗ ਹੈ ਕਿ ਕਾਂਗਰਸ ਦੇ ਇੰਦਰਬੀਰ ਬੁਲਾਰੀਆ ਨੂੰ  ਹਰਾ ਕੇ ਜਿੱਤੇ ਨਿੱਝਰ ਬੀਤੇ ਦਿਨੀਂ ਚੀਫ਼ ਖ਼ਾਲਸਾ ਦੀਵਾਨ ਦੇ ਚੇਅਰਮੈਨ ਵੀ ਚੁਣੇ ਗਏ ਹਨ | ਹੁਣ ਨਵੇਂ ਪ੍ਰੋਗਰਾਮ ਮੁਤਾਬਕ ਵਿਧਾਨ ਸਭਾ ਦਾ ਸੈਸ਼ਨ ਵੀ ਤਿੰਨ ਦਿਨ ਚਲੇਗਾ | 17 ਮਾਰਚ ਤੋਂ ਇਲਾਵਾ 21 ਅਤੇ 22 ਨੂੰ  ਵੀ ਸੈਸ਼ਨ ਸੱਦਿਆ ਗਿਆ ਹੈ |
ਵਿਧਾਨ ਸਭਾ ਸਕੱਤਰੇਤ ਵਲੋਂ ਸੈਸ਼ਨ ਦੇ ਜਾਰੀ ਪ੍ਰੋਗਰਾਮ ਮੁਤਾਬਕ ਪ੍ਰੋਟੇਮ ਸਪੀਕਰ ਡਾ. ਨਿੱਝਰ 17 ਮਾਰਚ ਨੂੰ  ਸਵੇਰੇ 11 ਵਜੇ ਨਵੇਂ ਚੁਣੇ 117 ਵਿਧਾਇਕਾਂ ਨੂੰ  ਸਹੁੰ ਚੁਕਾਉਣਗੇ | ਪਹਿਲਾਂ ਔਰਤ ਮੈਂਬਰਾਂ ਨੂੰ  ਸਹੁੰ ਚੁਕਵਾਈ ਜਾਵੇਗੀ ਅਤੇ ਇਸ ਤੋਂ ਬਾਅਦ ਬਾਕੀ ਮੈਂਬਰਾਂ ਜ਼ਿਲ੍ਹਾ ਵਾਰ ਸਹੁੰ ਚੁਕਣਗੇ | 18 ਅਤੇ 19 ਦੀ ਛੁੱਟੀ ਬਾਅਦ 21 ਮਾਰਚ ਸੋਮਵਾਰ ਸਵੇਰੇ ਪਹਿਲਾ ਸਪੀਕਰ ਦੀ ਚੋਣ ਹੋਵੇਗੀ ਜਿਸ ਲਈ ਸਰਬਜੀਤ ਕੌਰ ਮਾਣੂੰਕੇ ਦਾ ਨਾਂ ਹੀ ਅੱਗੇ ਚਲ ਰਿਹਾ ਹੈ | ਇਸੇ ਦਿਨ ਰਾਜਪਾਲ ਦਾ ਭਾਸ਼ਨ ਹੋਵੇਗਾ | 22 ਮਾਰਚ ਨੂੰ  ਵਿਛੜੀਆਂ ਸ਼ਖ਼ਸੀਅਤਾਂ ਨੂੰ  ਸ਼ਰਧਾਂਜਲੀ ਵੀ ਦਿਤੀ ਜਾਵੇਗੀ | ਇਸੇ ਦਿਨ ਰਾਜਪਾਲ ਦੇ ਭਾਸ਼ਨ 'ਤੇ ਬਹਿਸ ਬਾਅਦ ਤਿੰਨ ਮਹੀਨਿਆਂ ਦਾ ਆਰਜ਼ੀ ਬਜਟ ਪੇਸ਼ ਕੀਤਾ ਜਾਵੇਗਾ |
ਇਸੇ ਦਿਨ ਸਪਲੀਮੈਂਟਰੀ ਗਰਾਂਟਾਂ ਸਬੰਧੀ ਮੰਗਾਂ ਉਤੇ ਵੀ ਵਿਚਾਰ ਚਰਚਾ ਕਰ ਕੇ ਖ਼ਰਚਿਆਂ ਨੂੰ  ਪ੍ਰਵਾਨਗੀ ਦਿਤੀ ਜਾਵੇਗੀ ਅਤੇ ਰਾਜਪਾਲ ਦੇ ਭਾਸ਼ਣ 'ਤੇ ਬਹਿਸ ਤੋਂ ਬਾਅਦ ਧਨਵਾਦ ਮਤਾ ਪਾਸ ਕੀਤਾ ਜਾਵੇਗਾ |