ਕੋਰੋਨਾ ਦੇ ਵਧਦੇ ਮਾਮਲਿਆਂ ਕਾਰਨ ਚੰਡੀਗੜ੍ਹ ਵਿਚ ਮੁੜ ਲੱਗਾ ਹਫ਼ਤਾਵਾਰੀ ਲਾਕਡਾਊਨ

ਪ੍ਰਸ਼ਾਸਕ ਦੀ ਅਗਵਾਈ 'ਚ ਹੋਈ ਬੈਠਕ ਵਿਚ ਪ੍ਰਸ਼ਾਸਨ ਨੇ ਲਿਆ ਫ਼ੈਸਲਾ

ਚੰਡੀਗੜ੍ਹ, 16 ਅਪ੍ਰੈਲ (ਤਰੁਣ ਭਜਨੀ): ਸ਼ਹਿਰ ਵਿਚ ਬਰਤਾਨਵੀ ਕੋਵਿਡ ਸਰੂਪ ਦੀ ਦਸਤਕ ਦੇ ਬਾਅਦ ਚੰਡੀਗੜ੍ਹ ਪ੍ਰਸ਼ਾਸਨ ਨੇ ਹਫ਼ਤਾਵਾਰੀ ਲਾਕਡਾਊਨ ਨੂੰ  ਫਿਰ ਤੋਂ ਲਾਗੂ ਕਰਨ ਦਾ ਐਲਾਨ ਕਰ ਦਿਤਾ ਹੈ | ਪ੍ਰਸ਼ਾਸਨ ਦੇ ਆਦੇਸ਼ਾਂ ਮੁਤਾਬਕ ਸਨਿਚਰਵਾਰ ਅਤੇ ਐਤਵਾਰ ਨੂੰ  ਲੋਕਾਂ ਨੂੰ  ਜਨਤਕ ਥਾਵਾਂ , ਪ੍ਰੋਗਰਾਮਾਂ ਅਤੇ ਹੋਰ ਸਮਾਰੋਹ ਆਦਿ ਵਿਚ ਜਾਣ 'ਤੇ ਰੋਕ ਰਹੇਗੀ | ਇਸ ਨੂੰ  17 ਅਪ੍ਰੈਲ ਤੋਂ ਲਾਗੂ ਕੀਤਾ ਜਾ ਰਿਹਾ ਹੈ | ਪੰਜਾਬ ਰਾਜ-ਭਵਨ ਵਿਚ ਕੋਵਿਡ-19 ਵਾਰ ਰੂਮ ਮੀਟਿੰਗ ਦੌਰਾਨ ਪ੍ਰਸ਼ਾਸਕ ਵੀ ਪੀ ਸਿੰਘ ਬਦਨੌਰ ਨੇ ਅਧਿਕਾਰੀਆਂ ਨਾਲ ਚਰਚਾ ਕਰਨ ਦੇ ਬਾਅਦ ਇਹ ਫ਼ੈਸਲਾ ਲਿਆ ਹੈ | ਚੰਡੀਗੜ੍ਹ ਵਿਚ ਹਫ਼ਤਾਵਾਰੀ ਲਾਕਡਾਊਨ ਸ਼ੁਕਰਵਾਰ ਰਾਤ 10 ਵਜੇ ਤੋਂ ਸੋਮਵਾਰ ਸਵੇਰੇ 5 ਵਜੇ ਤਕ ਜਾਰੀ ਰਹੇਗਾ | ਇਸ ਦੌਰਾਨ ਜ਼ਰੂਰੀ ਸੇਵਾਵਾਂ ਨੂੰ  ਛੱਡ ਕੇ ਬਾਕੀ ਸਾਰੀਆਂ ਚੀਜ਼ਾਂ ਬੰਦ ਰਹਿਣਗੀਆਂ | 
ਲਾਕਡਾਊਨ ਦੌਰਾਨ ਸਾਰੇ ਸ਼ਰਾਬ ਦੇ ਠੇਕੇ ਬੰਦ ਰਹਿਣਗੇ | ਦੁੱਧ ਦੀ ਸਪਲਾਈ ਡੋਰ ਟੂ ਡੋਰ ਕਰਨੀ ਹੋਵੇਗੀ | ਪ੍ਰਾਈਵੇਟ ਦਫ਼ਤਰ ਅਤੇ ਇੰਡਸਟਰੀ ਖੁਲ੍ਹੀ ਰਹੇਗੀ, ਸਰਕਾਰੀ ਦਫ਼ਤਰ ਬੰਦ ਰਹਿਣਗੇ | ਆਰਐਲਏ ਵੀ ਬੰਦ ਰਹੇਗਾ | 
ਹਾਲਾਂਕਿ ਜਨਤਕ ਟਰਾਂਸਪੋਰਟ 'ਤੇ ਕੋਈ ਪਾਬੰਦੀ ਨਹੀਂ ਹੈ |  ਮਾਰਕੀਟ,  ਸ਼ਾਪਿੰਗ ਮਾਲ ਅਤੇ ਜਿੰਮ ਬੰਦ ਰਹਿਣਗੇ | ਰਾਕ ਗਾਰਡਨ,  ਸੁਖਨਾ ਝੀਲ ਜਿਵੇਂ ਸੈਰ ਸਪਾਟਾ ਵਾਲੀਆਂ ਥਾਵਾਂ ਨੂੰ  ਬੰਦ ਕਰਨ ਦਾ ਪਹਿਲਾਂ ਹੀ ਫ਼ੈਸਲਾ ਲਿਆ ਜਾ ਚੁੱਕਾ ਹੈ | ਪੁਲਿਸ ਹਫ਼ਤਾਵਾਰੀ ਲਾਕਡਾਊਨ ਨੂੰ  ਸਫ਼ਲ ਬਣਾਉਣ ਲਈ ਨਾਕਾਬੰਦੀ ਕਰੇਗੀ | 
ਪੀਜੀਆਈ ਦੇ ਡਾਇਰੈਕਟਰ ਪ੍ਰੋ . ਜਗਤਰਾਮ ਨੇ ਲੋਕਾਂ ਲਈ ਚਿਤਾਵਨੀ ਜਾਰੀ ਕਰਦੇ ਹੋਏ ਕਿਹਾ ਕਿ ਉਹ ਲਾਜ਼ਮੀ ਰੂਪ ਨਾਲ ਮੂੰਹ ਉਤੇ ਮਾਸਕ ਲਗਾਉਣ ਅਤੇ ਸਰੀਰਕ ਦੂਰੀ ਬਣਾਏ ਰੱਖਣ | ਸ਼ਹਿਰ ਦੇ ਲੋਕਾਂ ਨੂੰ  ਭੀੜ- ਭਾੜ ਵਾਲੇ ਇਲਾਕਿਆਂ ਵਿਚ ਜਾਣ ਤੋਂ ਬਚਣ ਲਈ ਕਿਹਾ ਗਿਆ ਹੈ | ਉਨ੍ਹਾਂ ਕਿਹਾ ਕਿ ਜੇਕਰ ਇਵੇਂ ਹੀ ਕੋਰੋਨਾ ਦੇ ਮਾਮਲੇ ਵਧਦੇ ਰਹੇ ਤਾਂ ਸ਼ਹਿਰ ਵਿਚ ਇਕ ਵਾਰ ਫਿਰ ਤੋਂ ਲਾਕਡਾਊਨ ਲਗਾਉਣਾ ਪੈ ਸਕਦਾ ਹੈ | 
ਚੰਡੀਗੜ੍ਹ ਵਿਚ ਬਣਾਏ ਗਏ 12 ਨਵੇਂ ਕੰਟੇਨਮੇਂਟ ਜ਼ੋਨ

ਕੋਰੋਨਾ ਦੇ ਕੇਸ ਜਿਨ੍ਹਾਂ ਏਰੀਆ ਵਿਚ ਜਿਆਦਾ ਆ ਰਹੇ ਹਨ ਉੱਥੇ ਏਰੀਆ ਦੀ ਚੋਣ ਕਰ ਕੇ ਕੰਟੇਨਮੈਂਟ ੋਨ ਬਣਾਏ ਜਾ ਰਹੇ ਹਨ | ਵੀਰਵਾਰ ਨੂੰ  16 ਨਵੇਂ ਮਾਈਕਰੋ ਕੰਟੇਨਮੈਂਟ ਜ਼ੋਨ ਬਣਾਏ ਗਏ | ਡਿਸਟਰਿਕਟ ਡਿਜ਼ਾਸਟਰ ਮੈਨੇਜਮੈਂਟ ਅਥਾਰਟੀ ਦੇ ਚੇਅਰਪਰਸਨ ਸਲਾਹਕਾਰ ਮਨੋਜ ਪਰੀਦਾ ਨੇ ਇਹ ਐਲਾਨ ਕੀਤਾ | ਹੁਣ ਸ਼ਹਿਰ ਵਿਚ ਕਰੀਬ 100 ਕੰਟੇਨਮੈਂਟ ਜ਼ੋਨ ਹੋ ਗਏ ਹਨ |