'ਆਪ' ਵਲੋਂ ਜਾਰੀ ਨੰਬਰ 'ਤੇ ਲਗਭਗ 22 ਲੱਖ ਲੋਕਾਂ ਨੇ ਦਿਤੀ ਮੁੱਖ ਮੰਤਰੀ ਦੇ ਚਿਹਰੇ 'ਤੇ ਰਾਇ

ਚੰਡੀਗੜ੍ਹ, 17 ਜਨਵਰੀ (ਨਰਿੰਦਰ ਸਿੰਘ ਝਾਮਪੁਰ) : ਮੁੱਖ ਮੰਤਰੀ ਦੇ ਚਿਹਰੇ ਦੀ ਚੋਣ ਲਈ 'ਆਪ' ਵਲੋਂ ਜਾਰੀ ਕੀਤੇ ਗਏ ਨੰਬਰਾਂ 'ਤੇ ਲੋਕਾਂ ਵੱਲੋਂ ਭਰਵਾਂ ਹੁੰਗਾਰਾ ਮਿਲਿਆ ਹੈ |  
'ਆਪ' ਦੇ ਸੀਨੀਅਰ ਨੇਤਾ ਅਤੇ ਵਿਧਾਨ ਸਭਾ 'ਚ ਵਿਰੋਧੀ ਧਿਰ ਦੇ ਨੇਤਾ ਹਰਪਾਲ ਸਿੰਘ ਚੀਮਾ ਨੇ ਮੀਡੀਆ ਨੂੰ  ਦਸਿਆ ਕਿ ਸੋਮਵਾਰ ਸਾਮ 5 ਵਜੇ ਤਕ ਕਰੀਬ 22 ਲੱਖ ਲੋਕਾਂ ਨੇ ਅਪਣੀ ਰਾਏ ਦਿਤੀ ਅਤੇ ਪਾਰਟੀ ਵਲੋਂ ਜਾਰੀ ਕੀਤੇ ਗਏ ਨੰਬਰ 'ਤੇ ਅਪਣੇ ਪਸੰਦੀਦਾ ਮੁੱਖ ਮੰਤਰੀ ਦਾ ਨਾਂ ਦਿੱਤਾ |  ਉਨ੍ਹਾਂ ਕਿਹਾ ਕਿ ਲੋਕਾਂ ਤੋਂ ਮਿਲੀ ਰਾਇ ਅਨੁਸਾਰ 'ਆਪ' ਸੁਪਰੀਮੋ ਅਰਵਿੰਦ ਕੇਜਰੀਵਾਲ ਮੰਗਲਵਾਰ ਨੂੰ  ਮੁੱਖ ਮੰਤਰੀ ਦੇ ਨਾਂ ਦਾ ਐਲਾਨ ਕਰਨਗੇ |
 ਚੀਮਾ ਨੇ ਕਿਹਾ ਕਿ ਭਾਰਤ ਦੇ ਇਤਿਹਾਸ ਵਿਚ ਪਹਿਲੀ ਵਾਰ ਆਮ ਆਦਮੀ ਪਾਰਟੀ ਨੇ ਮੁੱਖ ਮੰਤਰੀ ਬਣਾਉਣ ਲਈ ਲੋਕਾਂ ਦੀ ਰਾਏ ਲਈ ਹੈ | ਦੇਸ ਵਿੱਚ ਪਹਿਲੀ ਵਾਰ ਪੰਜਾਬ ਵਿੱਚ ਲੋਕਾਂ ਦੀ ਪਸੰਦ ਦਾ ਮੁੱਖ ਮੰਤਰੀ ਬਣੇਗਾ | ਆਮ ਆਦਮੀ ਪਾਰਟੀ ਨੇ ਪ੍ਰਵਾਰਵਾਦ ਅਤੇ ਵਿਰਸੇ ਦੀ ਰਾਜਨੀਤੀ ਨੂੰ  ਖ਼ਤਮ ਕਰਨ ਲਈ ਮੁੱਖ ਮੰਤਰੀ ਨੂੰ  ਬੰਦ ਕਮਰੇ ਵਿਚ ਚੁਣਨ ਦੀ ਰਵਾਇਤ ਨੂੰ  ਖ਼ਤਮ ਕਰ ਦਿੱਤਾ ਹੈ | ਇਹ ਕੰਮ ਭਾਜਪਾ-ਕਾਂਗਰਸ ਅਤੇ ਅਕਾਲੀ ਦਲ ਦੇ ਵੱਸ ਵਿਚ ਨਹੀਂ ਹੈ |
 'ਆਪ' ਉਮੀਦਵਾਰ ਆਸੂ ਬਾਂਗੜ ਦੇ ਕਾਂਗਰਸ 'ਚ ਸਾਮਲ ਹੋਣ 'ਤੇ ਚੀਮਾ ਨੇ ਕਿਹਾ ਕਿ ਕਾਂਗਰਸ ਪਾਰਟੀ 'ਆਪ' ਉਮੀਦਵਾਰਾਂ ਨਾਲ ਤੋੜ ਕੇ ਬਹੁਤ ਹੀ ਕਾਇਰਤਾ ਵਾਲਾ ਕੰਮ ਕਰ ਰਹੀ ਹੈ |  ਸਾਜ਼ਿਸ ਤਹਿਤ ਸਾਡੇ ਉਮੀਦਵਾਰਾਂ ਨੂੰ  ਤੋੜਿਆ ਜਾ ਰਿਹਾ ਹੈ |  ਕਾਂਗਰਸ ਨੇ ਸਾਡੇ ਕਈ ਉਮੀਦਵਾਰਾਂ ਤੱਕ ਪਹੁੰਚ ਕੀਤੀ ਹੈ ਅਤੇ ਉਨ੍ਹਾਂ ਨੂੰ  ਕਾਂਗਰਸ ਵਿਚ ਸ਼ਾਮਲ ਹੋਣ ਲਈ ਹਰ ਤਰ੍ਹਾਂ ਦੇ ਲਾਲਚ ਦੇ ਰਹੇ ਹਨ |  ਉਨ੍ਹਾਂ ਕਾਂਗਰਸ 'ਤੇ 'ਆਪ' ਉਮੀਦਵਾਰਾਂ ਨੂੰ  ਡਰਾਉਣ ਦਾ ਵੀ ਦੋਸ਼ ਲਾਇਆ |  ਉਨ੍ਹਾਂ ਦਸਿਆ ਕਿ ਆਸੂ ਬਾਂਗੜ ਦਾ ਮੋਗਾ ਵਿਖੇ ਹਸਪਤਾਲ ਹੈ, ਜਿਸ ਖ਼ਿਲਾਫ਼ ਗੰਭੀਰ ਮਾਮਲਾ ਦਰਜ ਹੈ |  ਜੇਲ ਜਾਣ ਦੇ ਡਰ ਕਾਰਨ ਉਹ ਕਾਂਗਰਸ ਵਿਚ ਸ਼ਾਮਲ ਹੋ ਗਏ | ਆਮ ਆਦਮੀ ਪਾਰਟੀ ਨੂੰ  ਅਜਿਹੇ ਡਰਪੋਕ ਉਮੀਦਵਾਰਾਂ ਦੀ ਕੋਈ ਲੋੜ ਨਹੀਂ ਹੈ |