‘ਡਡਲੀ’ ਤੋਂ ਬਾਅਦ ‘ਯੂਨਿਸ’ ਮਚਾ ਸਕਦੈ ਭਿਆਨਕ ਤਬਾਹੀ, ਚਿਤਾਵਨੀ ਜਾਰੀ
ਲੰਡਨ, 17 ਫ਼ਰਵਰੀ : ਦਖਣੀ ਸਕਾਟਲੈਂਡ ਅਤੇ ਬ੍ਰਿਟੇਨ ਵਿਚ ਪਹਿਲੇ ਤੂਫ਼ਾਨ ‘ਡਡਲੀ’ ਤੋਂ ਬਾਅਦ ਹੁਣ ਦੂਸਰਾ ਤੂਫ਼ਾਨ ‘ਯੂਨਿਸ’ ਸ਼ੁੱਕਰਵਾਰ ਨੂੰ ਇਸ ਖੇਤਰ ਵਿਚ ਟਕਰਾਏਗਾ, ਜਿਸ ਕਾਰਨ ਇਨ੍ਹਾਂ ਸ਼ਹਿਰਾਂ ਵਿਚ ਭਾਰੀ ਤਬਾਹੀ ਹੋਣ ਦੀ ਸੰਭਾਵਨਾ ਹੈ। ਮੌਸਮ ਵਿਭਾਗ ਨੇ ਵੀਰਵਾਰ ਨੂੰ ਇਹ ਜਾਣਕਾਰੀ ਦਿਤੀ। ਵਿਭਾਗ ਨੇ ਲੋਕਾਂ ਨੂੰ ਸੁਚੇਤ ਰਹਿਣ ਦੀ ਚਿਤਾਵਨੀ ਵੀ ਜਾਰੀ ਕੀਤੀ ਹੈ। ਬੀਬੀਸੀ ਮੁਤਾਬਕ ਸਕਾਟਲੈਂਡ ਸਮੇਤ ਉਤਰੀ ਇੰਗਲੈਂਡ ਅਤੇ ਉਤਰੀ ਆਇਰਲੈਂਡ ਦੇ ਹੋਰ ਹਿੱਸਿਆਂ ਵਿਚ ਭਾਰੀ ਮੀਂਹ ਅਤੇ ਤੇਜ਼ ਹਵਾਵਾਂ ਜਾਰੀ ਹਨ।
ਹਾਲ ਹੀ ਵਿਚ ਆਏ ਤੂਫ਼ਾਨ ਡਡਲੀ ਨਾਲ ਇਹ ਇਲਾਕਾ ਬਹੁਤ ਜ਼ਿਆਦਾ ਪ੍ਰਭਾਵਿਤ ਹੋਇਆ ਹੈ, ਇਸ ਲਈ ਇਥੇ ਦਰੱਖ਼ਤਾਂ, ਰੇਲਵੇ ਲਾਈਨਾਂ ਅਤੇ ਬਿਜਲੀ ਦੀਆਂ ਲਾਈਨਾਂ ਨੂੰ ਬੰਦ ਕਰਕੇ ਤੂਫ਼ਾਨ ਤੋਂ ਬਚਣ ਦੀ ਹਰ ਸੰਭਵ ਕੋਸ਼ਿਸ਼ ਕੀਤੀ ਗਈ ਹੈ। ਮੌਸਮ ਵਿਭਾਗ ਵਲੋਂ ਤੂਫ਼ਾਨ ਯੂਨਿਸ ਦੀ ਚਿਤਾਵਨੀ ਤੋਂ ਬਾਅਦ ਉਤਰੀ ਪੂਰਬੀ ਇੰਗਲੈਂਡ, ਕੁੰਬਰੀਆ, ਉਤਰੀ ਯੌਰਕਸ਼ਾਇਰ ਅਤੇ ਲੰਕਾਸ਼ਾਇਰ ਵਿਚ ਬਿਜਲੀ ਸਪਲਾਈ ਕੱਟ ਦਿਤੀ ਗਈ ਅਤੇ ਨਾਲ ਹੀ ਸਕਾਟਲੈਂਡ ਵਿਚ ਸਾਰੀਆਂ ਰੇਲ ਗੱਡੀਆਂ ਨੂੰ ਰੱਦ ਕਰ ਦਿਤਾ ਗਿਆ। ਬੀਬੀਸੀ ਨੇ ਦਸਿਆ ਕਿ ਤੂਫ਼ਾਨ ਯੂਨਿਸ 70 ਮੀਲ ਪ੍ਰਤੀ ਘੰਟਾ ਦੀ ਰਫ਼ਤਾਰ ਨਾਲ ਚੱਲੇਗਾ ਅਤੇ ਇੰਗਲੈਂਡ ਅਤੇ ਵੇਲਜ਼ ਵਿਚ 100 ਮੀਲ ਪ੍ਰਤੀ ਘੰਟਾ ਦੀ ਰਫ਼ਤਾਰ ਤਕ ਪਹੁੰਚ ਜਾਵੇਗਾ।
ਮੌਸਮ ਵਿਭਾਗ ਨੇ ਖ਼ਦਸ਼ਾ ਪ੍ਰਗਟਾਇਆ ਹੈ ਕਿ ਸ਼ੁੱਕਰਵਾਰ ਨੂੰ ਆਉਣ ਵਾਲਾ ਤੂਫ਼ਾਨ ਡਡਲੀ ਤੋਂ ਵੀ ਜ਼ਿਆਦਾ ਤਬਾਹੀ ਮਚਾਏਗਾ। ਬੀਬੀਸੀ ਦੀ ਰਿਪੋਰਟ ਮੁਤਾਬਕ ਵੀਰਵਾਰ ਨੂੰ ਤੂਫ਼ਾਨ ਡਡਲੀ ਸ਼ਾਂਤ ਹੋ ਜਾਵੇਗਾ ਅਤੇ ਫਿਰ ਤੂਫ਼ਾਨ ਯੂਨਿਸ ਸ਼ੁੱਕਰਵਾਰ ਨੂੰ ਯੂਕੇ ਦੇ ਦਖਣੀ ਸਕਾਟਲੈਂਡ ਅਤੇ ਯੂਕੇ ਦੇ ਹੋਰ ਖੇਤਰਾਂ ਵਿਚ ਤੇਜ਼ ਹਵਾਵਾਂ ਅਤੇ ਭਾਰੀ ਮੀਂਹ ਨਾਲ ਇਕ ਗੰਭੀਰ ਰੂਪ ਧਾਰਨ ਕਰੇਗਾ। (ਏਜੰਸੀ)
ਮੌਸਮ ਵਿਭਾਗ ਦੀ ਜਾਰੀ ਚਿਤਾਵਨੀ ਅਨੁਸਾਰ ਇੰਗਲੈਂਡ ਵਿਚ ਵਾਤਾਵਰਣ ਏਜੰਸੀ ਦੁਆਰਾ ਕੇਸਵਿਕ ਕੈਂਪਸਾਇਟ ਅਤੇ ਸੇਂਟ ਬੀਸ ਹੈੱਡ ਤੋਂ ਮਿਲੋਮ, ਕੁੰਬਰੀਅਨ ਬੀਚ, ਨੌਰਥ ਹੈੱਡ ਤੋਂ ਹੈਵੇਰਿਗ ਤਕ ਤੱਟ ਦੇ ਨਾਲ ਟਕਰਾਉਣ ਤੋਂ ਬਾਅਦ ਗੰਭੀਰ ਹੜ੍ਹ ਦੇ ਹਾਲਾਤ ਪੈਦਾ ਹੋ ਸਕਦੇ ਹਨ।