ਪੁਲਿਸ ਨੇ ਮੁਲਜ਼ਮਾਂ ਕੋਲੋਂ 1.40 ਲੱਖ ਰੁਪਏ ਨਕਦ ਤੇ ਇਕ ਕਾਰ ਵੀ ਬਰਾਮਦ ਕੀਤੀ

ਪਠਾਨਕੋਟ (ਪਪ) : 6 ਦਿਨ ਦੇ ਬੱਚੇ ਨੂੰ 1.40 ਲੱਖ ਰੁਪਏ ਵਿਚ ਵੇਚਦੇ ਹੋਏ ਪੁਲਿਸ ਨੇ ਪਿਤਾ ਅਤੇ ਖ਼ਰੀਦਦਾਰ ਔਰਤ ਸਣੇ 3 ਲੋਕਾਂ ਨੂੰ ਰੰਗੇ ਹੱਥੀਂ ਕਾਬੂ ਕੀਤਾ। ਪੁਲਿਸ ਨੇ ਬੱਚੇ ਦੇ ਪਿਤਾ ਕਮਲਜੀਤ ਸਿੰਘ ਵਾਸੀ ਮੁਕੇਰੀਆਂ ਤੋਂ ਇਲਾਵਾ ਬੱਚੇ ਨੂੰ ਖ਼ਰੀਦਣ ਪਹੁੰਚੀ ਗੁਰਦਾਸਪੁਰ ਨਿਵਾਸੀ ਸੁਨੰਦਾ ਤੇ ਉਸ ਦੇ ਮਾਸੀ ਦੇ ਪੁੱਤ ਅਤੁੱਲ ਨੂੰ ਕਾਬੂ ਕੀਤਾ। ਪੁਲਿਸ ਨੇ ਮੁਲਜ਼ਮਾਂ ਕੋਲੋਂ 1.40 ਲੱਖ ਰੁਪਏ ਨਕਦ ਤੇ ਇਕ ਕਾਰ ਵੀ ਬਰਾਮਦ ਕੀਤੀ ਹੈ।

Baby

ਜਾਣਕਾਰੀ ਅਨੁਸਾਰ ਐਸ.ਆਈ. ਦੀਪਿਕਾ ਨੂੰ ਜਾਣਕਾਰੀ ਮਿਲੀ ਸੀ ਕਿ ਸਰਨਾ ਛੋਟੀ ਨਹਿਰ ਕੋਲ ਛੋਟੇ ਬੱਚੇ ਦਾ ਸੌਦਾ ਚੱਲ ਰਿਹਾ ਹੈ। ਜੇਕਰ ਹੁਣੇ ਛਾਪੇਮਾਰੀ ਕੀਤੀ ਜਾਵੇ ਤਾਂ ਸਾਰੇ ਮੁਲਜ਼ਮਾਂ ਨੂੰ ਕਾਬੂ ਕੀਤਾ ਜਾ ਸਕਦਾ ਹੈ। ਇਸ ਤੋਂ ਬਾਅਦ ਐਸਆਈ ਮੌਕੇ ’ਤੇ ਪਹੁੰਚੇ ਤਾਂ ਉਥੇ ਸੌਦੇਬਾਜ਼ੀ ਚੱਲ ਰਹੀ ਸੀ।

Arrest

ਇਕ ਲੜਕਾ ਪੈਸੇ ਗਿਣ ਰਿਹਾ ਸੀ ਤੇ ਔਰਤ ਬੱਚੇ ਨੂੰ ਫੜ ਕੇ ਖੜ੍ਹੀ ਸੀ। ਐਸਆਈ ਨੇ ਦਸਿਆ ਕਿ ਮੁਲਜ਼ਮ ਨੇ ਪੁਲਿਸ ਪਾਰਟੀ ਨੂੰ ਵੇਖ ਕੇ ਕਾਰ ਵਿਚ ਭੱਜਣ ਦੀ ਕੋਸ਼ਿਸ਼ ਕੀਤੀ ਪਰ ਪੁਲਿਸ ਪਾਰਟੀ ਨੇ ਮੌਕੇ ’ਤੇ ਸਾਰਿਆਂ ਨੂੰ ਕਾਬੂ ਕਰ ਲਿਆ।

Money

ਐਸ ਆਈ ਨੇ ਦਸਿਆ ਕਿ ਪੁਛਗਿੱਛ ਦੌਰਾਨ ਪਤਾ ਲੱਗਾ ਕਿ ਬੱਚਾ ਕਮਲਜੀਤ ਦਾ ਹੈ ਜਿਸ ਨੂੰ ਸੁਨੰਦਾ ਅਪਣੀ ਮਾਸੀ ਦੇ ਪੁੱਤ ਅਤੁੱਲ ਨਾਲ ਖ਼ਰੀਦਣ ਆਈ ਸੀ। ਬੱਚਾ ਮੁਕੇਰੀਆਂ ਤੋਂ ਲਿਆਂਦਾ ਗਿਆ ਸੀ, ਗੁਰਦਾਸਪੁਰ ਦੀ ਔਰਤ ਇਸ ਨੂੰ ਖ਼ਰੀਦਣ ਆਈ ਸੀ। ਇਹ ਸੌਦਾ ਪਠਾਨਕੋਟ ਵਿਚ ਸਰਨਾ ਛੋਟੀ ਨਹਿਰ ਨੇੜੇ ਕੀਤਾ ਜਾ ਰਿਹਾ ਸੀ। ਔਰਤ ਜੋ ਬੱਚਾ ਖ਼ਰੀਦਣ ਆਈ ਸੀ, ਉਸ ਦੀਆਂ ਦੋ ਧੀਆਂ ਸਨ।