ਟਾਇਰ ਤੇ ਪਟਰੌਲ ਨਾਲ ਲਾਸ਼ ਦਾ ਅੰਤਮ ਸਸਕਾਰ, ਵੀਡੀਉ ਵਾਇਰਲ ਹੋਣ ਤੋਂ ਬਾਅਦ 5 ਪੁਲਿਸ ਮੁਲਾਜ਼ਮ ਮੁਅੱਤਲ

ਬਲੀਆ, 18 ਮਈ : ਉੱਤਰ ਪ੍ਰਦੇਸ਼ ਦੇ ਬਲੀਆ ਜ਼ਿਲ੍ਹੇ ਦੇ ਫੇਫਨਾ ਥਾਣਾ ਖੇਤਰ ਦੇ ਮਾਲਦੇਪੁਰ ਪਿੰਡ ’ਚ ਗੰਗਾ ਨਦੀ ਕਿਨਾਰੇ ਪੁਲਿਸ ਮੁਲਾਜਮਾਂ ਦੀ ਮੌਜੂਦਗੀ ’ਚ ਟਾਇਰ ਅਤੇ ਪਟਰੌਲ ਦਾ ਸਹਾਰਾ ਲੈ ਕੇ ਨਦੀ ’ਚੋਂ ਮਿਲੀ ਇਕ ਲਾਸ਼ ਦਾ ਅੰਤਮ ਸਸਕਾਰ ਕਰਨ ਦਾ ਵੀਡੀਉ ਸੋਸ਼ਲ ਮੀਡੀਆ ’ਤੇ ਵਾਇਰਲ ਹੋ ਗਿਆ। ਇਸ ਤੋਂ ਬਾਅਦ ਪੁਲਿਸ ਸੁਪਰਡੈਂਟ ਨੇ ਸੰਵੇਦਨਹੀਣਤਾ ਵਰਤਣ ਦੇ ਦੋਸ਼ੀ 5 ਮੁਲਾਜ਼ਮਾਂ ਨੂੰ ਮੁਅੱਤਲ ਕਰ ਕੇ ਮਾਮਲੇ ਦੀ ਜਾਂਚ ਦੇ ਆਦੇਸ਼ ਦਿਤੇ ਹਨ।
ਪੁਲਿਸ ਸੁਪਰਡੈਂਟ ਡਾ. ਵਿਪਿਨ ਤਾਡਾ ਨੇ ਮੰਗਲਵਾਰ ਨੂੰ ਦਸਿਆ ਕਿ ਸੋਮਵਾਰ ਨੂੰ ਸੋਸ਼ਲ ਮੀਡੀਆ ’ਤੇ ਇਕ ਵੀਡੀਉ ਆਇਆ ਸੀ, ਜਿਸ ’ਚ ਪÇੁਲਸ ਮੁਲਾਜ਼ਮ ਇਕ ਲਾਸ਼ ਦਾ ਅੰਤਮ ਸਸਕਾਰ ਕਰਵਾ ਰਹੇ ਹਨ। ਉਨ੍ਹਾਂ ਕਿਹਾ ਕਿ ਪੁਲਿਸ ਮੁਲਾਜਮਾਂ ਨੇ ਅੰਤਮ ਸਸਕਾਰ ’ਚ ਸੰਵੇਦਨਹੀਣਤਾ ਵਰਤੀ ਹੈ, ਇਸ ਮਾਮਲੇ ’ਚ ਦੋਸ਼ੀ 5 ਪੁਲਿਸ ਮੁਲਾਜਮਾਂ ਨੂੰ ਮੁਅੱਤਲ ਕਰ ਦਿਤਾ ਗਿਆ ਹੈ ਅਤੇ ਮਾਮਲੇ ਦੀ ਜਾਂਚ ਦੇ ਆਦੇਸ਼ ਦਿਤੇ ਗਏ ਹਨ। ਉਨ੍ਹਾਂ ਦਸਿਆ ਕਿ ਐਡੀਸ਼ਨਲ ਪੁਲਸ ਸੁਪਰਡੈਂਟ ਸੰਜੇ ਯਾਦਵ ਇਸ ਮਾਮਲੇ ਦੀ ਪੂਰੀ ਜਾਂਚ ਕਰ ਕੇ ਅਪਣੀ ਰਿਪੋਰਟ ਦੇਣਗੇ। ਫੇਫਨਾ ਥਾਣਾ ਦੇ ਇੰਚਾਰਜ ਸੰਜੇ ਤਿ੍ਰਪਾਠੀ ਨੇ ਦਸਿਆ ਕਿ ਫੇਫਨਾ ਥਾਣਾ ਖੇਤਰ ਦੇ ਮਾਲਦੇਪੁਰ ਪਿੰਡ ’ਚ ਗੰਗਾ ਨਦੀ ’ਚੋਂ ਇਕ ਲਾਸ਼ ਦਾ 15 ਮਈ ਨੂੰ ਅੰਤਮ ਸਸਕਾਰ ਕੀਤਾ ਗਿਆ ਸੀ। ਅੰਤਿਮ ਸੰਸਕਾਰ ਕਰਦੇ ਸਮੇਂ ਡੋਮ (ਅੰਤਮ ਸਸਕਾਰ ਕਰਨ ਵਾਲੇ ਵਿਅਕਤੀ) ਨੇ ਲਾਸ਼ ’ਤੇ ਟਾਇਰ ਰੱਖ ਦਿਤਾ ਅਤੇ ਪਟਰੌਲ ਸੁੱਟ ਦਿਤਾ। ਸੋਸ਼ਲ ਮੀਡੀਆ ’ਤੇ ਸੋਮਵਾਰ ਨੂੰ ਆਏ ਵੀਡੀਉ ’ਚ ਪੁਲਿਸ ਮੁਲਾਜ਼ਮਾਂ ਦੀ ਮੌਜੂਦਗੀ ’ਚ ਟਾਇਰ ਅਤੇ ਪਟਰੌਲ ਦਾ ਸਹਾਰਾ ਲੈ ਕੇ ਲਾਸ਼ ਦਾ ਅੰਤਮ ਸਸਕਾਰ ਕੀਤਾ ਜਾਂਦਾ ਦਿਖਾਈ ਦੇ ਰਿਹਾ ਹੈ।        (ਏਜੰਸੀ)