ਵਰਲਪੂਲ ਦੇ ਗੁਦਾਮ ਨੂੰ ਲੱਗੀ ਅੱਗ, ਜਾਨੀ ਨੁਕਸਾਨ ਤੋਂ ਬਚਾਅ

ਬਨੂੜ, 18 ਅਕਤੂਬਰ (ਅਵਤਾਰ ਸਿੰਘ): ਬਨੂੜ ਵਿਖੇ ਸਥਿਤ ਵਰਲਪੂਲ ਇੰਡੀਆ ਲਿਮਿਟਡ ਨਾਮੀ ਕੰਪਨੀ ਦੇ ਗੋਦਾਮ ਵਿਚ ਅੱਗ ਲੱਗ ਗਈ ਜਿਸ ਕਾਰਨ ਕੰਪਨੀ ਦੇ ਸ਼ੈੱਡ ਸਮੇਤ ਏਸੀ, ਫਰਿੱਜ, ਓਵਨ ਆਦਿ ਬਿਜਲੀ ਦੇ ਅਨੇਕਾਂ ਤਰ੍ਹਾਂ ਦੇ ਯੰਤਰ ਤੇ ਸਪੇਅਰਪਾਰਟ ਸੜ ਕੇ ਸੁਆਹ ਹੋ ਗਿਆ, ਪਰ ਜਾਨੀ ਨੁਕਸਾਨ ਤੋਂ ਬਚਾਅ ਹੋ ਗਿਆ। ਵੱਖ-ਵੱਖ ਸ਼ਹਿਰਾਂ ਤੋਂ ਪੁੱਜੀ ਫ਼ਾਇਰ ਬ੍ਰਿਗੇਡ ਦੀਆਂ ਦਰਜਨਾਂ ਗੱਡੀਆਂ ਨੇ ਅੱਗ ਬੁਝਾਉਣ ਦੀ ਅਸਫ਼ਲ ਕੋਸ਼ਿਸ ਕੀਤੀ।
ਪ੍ਰਾਪਤ ਜਾਣਕਾਰੀ ਅਨੁਸਾਰ ਅੱਗ ਦੇਰ ਰਾਤ ਕਰੀਬ ਦਸ ਵਜੇ ਸ਼ਾਰਟ ਸਰਕਟ ਨਾਲ ਲੱਗੀ ਦਸੀ ਜਾ ਰਹੀ ਹੈ। ਗੁਦਾਮ ਵਿਚੋਂ ਅਚਾਨਕ ਅੱਗ ਦੀ ਲਾਟਾਂ ਨਿਕਲੀਆਂ ਤੇ ਸਕਿਉਰਿਟੀ ਮੁਲਾਜ਼ਮਾਂ ਨੇ ਤੁਰਤ ਪੁਲਿਸ ਤੇ ਪ੍ਰਬੰਧਕਾਂ ਨੂੰ ਸੂਚਨਾ ਦਿਤੀ। ਪੁਲਿਸ ਨੇ ਫ਼ਾਇਰ ਬ੍ਰਿਗੇਡ ਦੀ ਗੱਡੀਆਂ ਦਾ ਪ੍ਰਬੰਧ ਕੀਤਾ। ਵੱਖ-ਵੱਖ ਸ਼ਹਿਰਾਂ ਤੋਂ ਪੁੱਜੇ ਡੇਢ ਦਰਜਨ ਅੱਗ ਬੁਝਾਉ ਦਸਤਿਆਂ ਨੇ ਸਵੇਰੇ ਛੇ ਵਜੇ ਅੱਗ 'ਤੇ ਕਾਬੂ ਪਾਇਆ। ਉਦੋਂ ਤਕ ਗੁਦਾਮਾਂ ਵਿਚ ਪਿਆ ਸਮਾਨ ਸੜ ਕੇ ਸੁਆਹ ਹੋ ਗਿਆ। ਅੱਗ ਨਾਲ ਗੁਦਾਮ ਵਿਚ ਜ਼ੋਰਦਾਰ ਧਮਾਕੇ ਹੋਏ। ਜਿਨ੍ਹਾਂ ਨਾਲ ਸ਼ਹਿਰ ਵਾਸੀਆਂ ਤੇ ਆਸ-ਪਾਸ ਪਿੰਡਾਂ ਦੇ ਲੋਕ ਦਹਿਲ ਗਏ। ਵੱਡੀ ਗਿਣਤੀ ਵਿਚ ਲੋਕ ਘਟਨਾ ਸਥਾਨ 'ਤੇ ਇੱਕਠੇ ਹੋ ਗਏ, ਭਾਵੇਂ ਪ੍ਰਬੰਧਕਾਂ ਵਲੋਂ ਗੁਦਾਮ ਵਿਚ ਪਏ ਸਿਲੰਡਰਾਂ ਕਾਰਨ ਲੋਕ ਨੂੰ ਨੇੜੇ ਜਾਣ ਤੋਂ ਰੋਕ ਦਿਤਾ, ਪਰ ਮੌਕੇ ਤੇ ਹਾਜ਼ਰ ਲੋਕਾਂ ਨੇ ਅਪਣੀ ਜਾਨ ਜ਼ੋਖ਼ਮ ਵਿਚ ਪਾ ਕੇ ਗੁਦਾਮ ਅੰਦਰ ਖੜੀਆਂ ਗੱਡੀਆਂ ਤੇ ਹੋਰ ਸਮਾਨ ਨੂੰ ਬਾਹਰ ਕੱਢ ਕੇ ਬਚਾਇਆ।
ਕੰਪਨੀ ਦੇ ਮਾਲਕ ਜਤਿੰਦਰ ਸਿੰਘ ਔਲਖ ਨੇ ਦਸਿਆ ਕਿ ਤਿਉਹਾਰਾਂ ਦੇ ਸ਼ੀਜਨ ਕਾਰਨ ਗੁਦਾਮ ਵਿਚ ਵੱਡਾ ਸਟਾਕ ਸੀ। ਭਾਵੇਂ ਨੁਕਸਾਨ ਦਾ ਕੋਈ ਅਜੇ ਅੰਦਾਜ਼ਾ ਨਹੀਂ ਲਗਾਇਆ ਜਾ ਸਕਦਾ, ਪਰ ਇਥੋਂ ਕਈ ਸੂਬਿਆਂ ਦੇ ਸ਼ਹਿਰਾਂ ਨੂੰ ਮਾਲ ਸਪਲਾਈ ਹੁੰਦਾ ਹੈ। ਮੌਕੇ 'ਤੇ ਹਾਜ਼ਰ ਐਸਡੀਐਮ ਜਗਦੀਪ ਸਿੰਘ ਸਹਿਗਲ ਨੇ ਦਸਿਆ ਕਿ ਅੱਗ ਬੁਝਾਉਣ ਲਈ ਗੁਦਾਮ ਵਿਚ ਕੋਈ ਢੁਕਵਾਂ ਪ੍ਰਬੰਧ ਵਿਖਾਈ ਨਹੀਂ ਦੇ ਰਿਹਾ ਜਿਸ ਦੀ ਜਾਂਚ ਕੀਤੀ ਜਾਵੇਗੀ। ਥਾਣਾ ਮੁਖੀ ਨੇ ਪੁਲਿਸ ਦੀ ਪਾਇਲਟ ਮੂਹਰੇ ਲਾ ਕੇ ਪਾਣੀ ਦੀ ਗੱਡੀਆਂ ਨੂੰ ਪਾਣੀ ਭਰਾ ਕੇ ਘਟਨਾ ਵਾਲੀ ਥਾਂ ਉਤੇ ਪਹੁੰਚਾਉਦੇ ਰਹੇ।
ਫੋਟੋ ਕੈਪਸ਼ਨ-ਵਰਲਪੂਲ ਕੰਪਨੀ ਦੇ ਗੋਦਾਮ ਨੂੰ ਲੱਗੀ ਭਿਆਨਕ ਅੱਗ ਦਾ ਦ੍ਰਿਸ਼।
image

ਇਲੈਕਟ੍ਰੋਨਿਕ ਸਮਾਨ ਸੜ ਕੇ ਸੁਆਹ, ਗੁਦਾਮ ਦੇ ਸ਼ੈੱਡ ਵੀ ਅੱਗ ਦੀ ਭੇਂਟ ਚੜ੍ਹੇ