ਲਾਗਲੇ ਪਿੰਡ ਮਲਕਪੁਰ ਜੰਡਾਲੀ ਖੁਰਦ ਨੂੰ ਅਹਿਮਦਗੜ੍ਹ ਵਿਚ ਮਿਲਾਉਣ ਲਈ ਸਥਾਨਕ ਨਗਰ ਕੌਂਸਲ ਵਲੋਂ ਮਤਾ ਪਾਸ ਕੀਤਾ ਗਿਆ.....
ਅਹਿਮਦਗੜ੍ਹ : ਲਾਗਲੇ ਪਿੰਡ ਮਲਕਪੁਰ ਜੰਡਾਲੀ ਖੁਰਦ ਨੂੰ ਅਹਿਮਦਗੜ੍ਹ ਵਿਚ ਮਿਲਾਉਣ ਲਈ ਸਥਾਨਕ ਨਗਰ ਕੌਂਸਲ ਵਲੋਂ ਮਤਾ ਪਾਸ ਕੀਤਾ ਗਿਆ।ਜ਼ਿਕਰਯੋਗ ਹੈ ਕਿ ਪਿੰਡ ਮਲਕਪੁਰ ਜੰਡਾਲੀ ਖੁਰਦ ਦਾ ਕੁੱਝ ਹਿੱਸਾ ਪਹਿਲਾਂ ਹੀ ਵਾਰਡ ਨੰਬਰ ਤਿੰਨ ਵਿਚ ਆਉਂਦਾ ਹੈ ਤੇ ਬਾਕੀ ਪਿੰਡ ਨੂੰ ਵੀ ਅਹਿਮਦਗੜ੍ਹ ਸ਼ਹਿਰ ਵਿਚ ਮਿਲਾਉਣ ਲਈ ਪਿਛਲੇ ਸਾਲ ਤੋਂ ਕਾਰਵਾਈ ਚੱਲ ਰਹੀ ਸੀ ਜੋ ਕਿਸੇ ਕਾਰਨ ਸਿਰੇ ਨਹੀਂ ਸੀ ਚੜ੍ਹ ਰਹੀ।
ਇਸ ਸਬੰਧੀ ਬੀਤੇ ਕਲ ਨਗਰ ਕੌਂਸਲ ਦਫ਼ਤਰ ਵਿਖੇ ਨਗਰ ਕੌਂਸਲ ਪ੍ਰਧਾਨ ਸੁਰਾਜ ਮੁਹੰਮਦ ਦੀ ਅਗਵਾਈ ਹੇਠ ਸਮੂਹ ਕੌਂਸਲਰਾਂ ਦੀ ਮੀਟਿੰਗ ਰੱਖੀ ਗਈ ਸੀ ਜਿਸ ਵਿਚ ਕੁਲ 17 ਕੌਂਸਰਲਾਂ ਵਿਚੋਂ ਅੱਠ ਕੌਂਸਲਰਾਂ ਸਾਬਕਾ ਪ੍ਰਧਾਨ ਰਵਿੰਦਰ ਪੁਰੀ, ਪਰਮਜੀਤ ਕੌਰ ਜੱਸਲ, ਕਮਲਜੀਤ ਸਿੰਘ ਉਭੀ, ਭੋਜ ਰਾਜ ਸ਼ਰਮਾ, ਨਿਰਮਲ ਸਿੰਘ ਫੱਲੇਵਾਲ, ਦਲਜੀਤ ਕੌਰ ਉਭੀ, ਹਰਬੰਸ ਕੌਰ ਸੇਖਾ, ਹਰਦੀਪ ਸਿੰਘ ਨੇ ਮਲਕਪੁਰ ਜੰਡਾਲੀ ਨੂੰ ਅਹਿਮਦਗੜ੍ਹ ਵਿਚ ਮਿਲਾਉਣ ਦੇ ਵਿਰੋਧ ਵਿਚ ਮੀਟਿੰਗ ਦਾ ਬਾਈਕਾਟ ਕਰ ਦਿਤਾ
ਜਦਕਿ ਨਗਰ ਕੌਂਸਲ ਦਫ਼ਤਰ 'ਚ ਹਲਕਾ ਵਿਧਾਇਕ ਸੁਰਜੀਤ ਸਿੰਘ ਧੀਮਾਨ ਦੀ ਹਾਜ਼ਰੀ ਵਿਚ ਉਨ੍ਹਾਂ ਦੇ ਸਮਰਥਨ ਨਾਲ 9 ਕੌਂਸਲਰਾ ਨੇ ਇਸ ਮਤੇ ਦੇ ਹੱਕ ਵਿਚ ਸਮਰਥਨ ਦਿਤਾ ਅਤੇ ਇਹ ਮਤਾ ਬਹੁਮਤ ਨਾਲ ਪਾਸ ਹੋ ਗਿਆ। ਵਿਰੋਧ ਕਰਨ ਵਾਲੇ ਕੌਂਸਲਰਾਂ ਦਾ ਕਹਿਣਾ ਹੈ ਕਿ ਨਹਿਰ ਅਤੇ ਰੇਲਵੇ ਲਾਈਨ ਤੋਂ ਦੂਜੇ ਪਾਸੇ ਪੈਂਦੇ ਇਸ ਪਿੰਡ ਨੂੰ ਸ਼ਹਿਰ 'ਚ ਮਿਲਾਉਣ ਕਾਰਨ ਇਸ ਇਲਾਕੇ ਨੂੰ ਸੀਵਰੇਜ ਅਤੇ ਪਾਣੀ ਦੀ ਸਪਲਾਈ ਆਦਿ ਦੇਣਾ ਔਖਾ ਹੋਵੇਗਾ ਅਤੇ ਇਸ ਨਾਲ ਨਗਰ ਕੌਂਸਲ ਨੂੰ ਵੱਡਾ ਖ਼ਰਚ ਕਰਨਾ ਹੋਵੇਗਾ ਜਿਸ ਦਾ ਅਸਰ ਸ਼ਹਿਰ ਦੇ ਵਿਕਾਸ 'ਤੇ ਪਵੇਗਾ।
ਮੀਟਿੰਗ ਦੌਰਾਨ ਪ੍ਰਧਾਨ ਸੁਰਾਜ ਮਹੰਮਦ, ਸੀਨੀਅਰ ਮੀਤ ਪ੍ਰਧਾਨ ਰਾਗਨੀ ਟੰਡਨ, ਕੌਂਸਲਰ ਸਵੀਟੀ ਕਾਕੜੀਆ, ਕੌਂਸਲਰ ਰੇਨੂ ਸੂਦ, ਕੌਂਸਲਰ ਦੀਪਕ ਸ਼ਰਮਾ, ਕੌਂਸਲਰ ਕਿੱਟੂ ਥਾਪਰ, ਕੌਂਸਲਰ ਈਸਾ ਮੁਹੰਮਦ, ਕੌਂਸਲਰ ਕੇਦਾਰ ਕਪਿਲਾ, ਕੌਂਸਲਰ ਜਗਦੇਵ ਸਿੰਘ ਬੋਪਾਰਾਏ ਤੋਂ ਇਲਾਵਾ ਤੇਜੀ ਕਮਾਲਪੁਰ, ਬਿੱਟਾ ਪੀ.ਏ. ਧੀਮਾਨ, ਈ.À. ਗੁਰਦੀਪ ਸਿੰਘ ਭੋਗਲ, ਨਿੱਝਰ ਆਦਿ ਹਾਜ਼ਰ ਸਨ।
