ਸਰਦਾਰ ਮਿਲਖਾ ਸਿੰਘ ਨੂੰ ਚਿੱਤਰਦੇ ਹੋਏ
ਇਹ ਜੋ ਪੋਟਰੇਟ ਚਿੱਤਰ ਤੇਲ ਰੰਗਾਂ ਵਾਲਾ ਤੁਸੀ ਦੇਖ ਰਹੇ ਹੋ, ਮੈਂ 12 ਸਾਲ ਪਹਿਲਾਂ ਬਣਾਇਆ ਸੀ | ਕੈਲੇਫੋਰਨੀਆਂ ਤੋਂ ਇਕ ਕੈਲੰਡਰ 'ਸਿੱਖ ਸਪੋਰਟਸ ਪਰਸਨਜ਼' ਕਢਣਾ ਸੀ | ਇਕ ਆਰਟਿਸਟ ਵਜੋਂ ਮੇਰੀ ਡਿਊਟੀ ਸਰਦਾਰ ਮਿਲਖਾ ਸਿੰਘ ਤੇ ਹੋਰ 12 ਸਿੱਖ ਖਿਡਾਰੀਆਂ ਨੂੰ ਪੇਂਟ ਕਰਨ ਦੀ ਲੱਗੀ |
ਮੈਂ ਜਦ ਮਿਲਖਾ ਸਿੰਘ ਜੀ ਦੇ ਘਰੇ ਚੰਡੀਗੜ੍ਹ ਗਿਆ ਤਾਂ ਉਨ੍ਹਾਂ ਦੀ ਧਰਮ ਪਤਨੀ ਨੇ ਕਿਹਾ ਕਿ ਉਹ ਤਾਂ ਦਿੱਲੀ ਗਏ ਹੋਏ ਹਨ | ਮੈਂ ਉਨ੍ਹਾਂ ਤੋਂ ਇਹ ਵਾਅਦਾ ਲਿਆ ਕਿ ਅਗਲੇ ਹਫ਼ਤੇ ਆਵਾਂਗਾ, ਤੁਸੀ ਮੈਨੂੰ ਜ਼ਰੂਰ ਮਿਲਾਉਣਾ ਹੈ | ਅਗਲੇ ਹਫ਼ਤੇ ਗਿਆ ਤਾਂ ਉਨ੍ਹਾਂ ਦੀ ਪਤਨੀ ਨੇ ਕਿਹਾ ਕਿ ਉਹ ਗੋਲਫ਼ ਖੇਡਣ ਗਏ ਹਨ, 2 ਘੰਟੇ ਬੈਠਣਾ ਪਵੇਗਾ | ਮੈਂ ਉਨ੍ਹਾਂ ਦੇ ਲਾਅਨ ਵਿਚ ਬੈਠ ਗਿਆ ਅਤੇ ਜੀਵ ਮਿਲਖਾ ਸਿੰਘ ਤੇ ਉਹਨਾਂ ਦੀ ਬੇਟੀ ਨੂੰ ਵੀ ਮਿਲਿਆ | ਜਦ ਉਹ ਆਏ ਤਾਂ ਸਿੱਧਾ ਅੰਦਰ ਚਲੇ ਗਏ | ਉਨ੍ਹਾਂ ਦੀ ਧਰਮ ਪਤਨੀ ਨੇ ਮੇਰੇ ੇਆਉਣ ਬਾਰੇ ਕਿਹਾ ਕਿ ਇਹ ਮੁੰਡਾ ਫੋਟੋ ਲੈਣ ਆਇਆ ਹੈ, ਪਿਛਲੇ ਹਫਤੇ ਵੀ ਆਇਆ ਸੀ | ਉਹ ਆਖਣ ਲਗੇ, ''ਮੈਂ ਗੋਲਫ਼ ਖੇਡ ਕੇ ਆਇਆਂ, ਨਹਾਉਣਾ ਵੀ ਹੈ | ਇਕ ਚੰਗੀ ਜਿਹੀ ਫ਼ੋਟੋ ਐਲਬਮ ਚੋਂ ਕੱਢ ਕੇ ਦੇ ਦੇ |''
ਪਰ ਮੇਰੇ ਜ਼ਿੱਦ ਕਰਨ ਤੇ ਕਿ ਮੈਂ ਆਪ ਅਪਣੀ ਮਰਜ਼ੀ ਦੀ ਫੋਟੋ ਖਿਚਣੀ ਹੈ, ਉਹ ਜਲਦੀ ਨਾਲ ਆਏ | ਜਦ ਮੈਂ ਕਿਹਾ ਕਿ, ''ਸਰ ਜੀ, ਅਸੀ ਡਾਕਟਰ ਕਪਾਨੀ ਨਾਲ ਇਕ ਖਾਸ ਸਪੋਰਟਸ ਕੈਲੰਡਰ ਬਣਾਉਣਾ ਹੈ ਜਿਸ ਦੀ ਸ਼ੁਰੂਆਤ ਤੁਹਾਡੇ ਤੋਂ ਹੀ ਹੋਣੀ ਹੈ | ਬੱਚਿਆਂ ਨੂੰ ਪਹਿਲੇ ਮਸ਼ਹੂਰ 12 ਖਿਡਾਰੀ ਦਸਣੇ ਹਨ ਤਾਂ ਜੋ ਉਹ ਉਨ੍ਹਾਂ ਨੂੰ ਆਈਡੀਅਲ ਮੰਨ ਕੇ ਤਰੱਕੀ ਕਰ ਸਕਣ | ਉਹ ਮਸਲਾ ਸਮਝ ਗਏ ਤੇ ਕਹਿਣ ਲਗੇ, ''ਨਹਾ ਕੇ ਅਤੇ ਤਿਆਰ ਹੋ ਕੇ ਆਉਂਦਾ ਹਾਂ |''
ਕੋਟ ਪਾ ਕੇ ਟਾਈ-ਪੱਗ ਬੰਨ੍ਹ ਕੇ ਬੈਠ ਗਏ | ਮੈਂ ਕਿਹਾ, ''ਸਰ ਜੀ ਰੋਮ ਓਲੰਪਿਕ ਵਾਲੀ ਕਿਤਾਬ ਹੱਥ 'ਚ ਫੜ ਲਉ | ਉਹ ਓਲੰਪਿਕ ਚਿੱਤਰ ਨਾਲ ਜੁੜ ਜਾਏਗੀ | ਉਹ ਆਖਣ ਲਗੇ, ''ਯਾਦ ਆਇਆ ਮੇਰੇ ਕੋਲ ਰੋਮ ਓਲੰਪਿਕ ਵਾਲਾ ਬੂਟਾਂ ਦਾ ਜੋੜਾ ਹੈ | ਇਕ ਹੋਰ ਮੈਂ ਇਟਲੀ ਮਿਊਜ਼ੀਅਮ ਨੂੰ ਦਾਨ ਦੇ ਦਿਤਾ ਸੀ |'' ਉਹ ਜੋੜਾ ਲੈ ਆਏ ਤੇ ਮੈਂ ਕਿਹਾ, ''ਸਰ ਜੀ ਹੁਣ 1960 ਰੋਮ ਓਲੰਪਿਕ ਦੀਆਂ ਸੋਚਾਂ ਵਿਚ ਚਲੇ ਜਾਉ ਤੇ ਮੈਂ ਧੁੱਪ ਪੈਂਦੀ ਵਾਲਾ ਪੋਜ਼ ਫੜ ਲਿਆ | ਉਨ੍ਹਾਂ ਦਾ ਪੋਰਟਰੇਟ ਬਣਾਉਂਦੇ ਹੋਏ ਮੈਨੂੰ ਵੀ ਓਲੰਪਿਕਸ ਵਾਲਾ ਸੁਆਦ ਆਇਆ | ਕੈਲੰਡਰ ਛਪ ਗਿਆ | ਅਮਰੀਕਾ ਵਿਚ ਮੈਨੂੰ ਕੁੱਝ ਕਾਪੀਆਂ ਪ੍ਰੋ. ਨਰਿੰਦਰ ਸਿੰਘ ਕਪਾਨੀ ਹੋਰਾਂ ਨੇ ਭੇਜੀਆਂ | ਮੈਂ ਜਦੋਂ ਕਾਪੀਆਂ ਉਨ੍ਹਾਂ ਨੂੰ ਘਰੇ ਦੇਣ ਗਿਆ, ਉਨ੍ਹਾਂ ਦਾ ਸਾਰਾ ਪ੍ਰਵਾਰ ਬਹੁਤ ਖ਼ੁਸ਼ ਹੋਇਆ | ਉਥੇ ਮੈਂ ਕੌਫ਼ੀ ਪੀਤੀ ਜੋ ਇਕ ਯਾਦ ਬਣ ਗਈ | ਮੇਰੇ ਵਲੋਂ ਅੱਜ ਉਸ ਉੱਡ ਚੁੱਕੇ ਸਿੱਖ ਅਤੇ ਉਨ੍ਹਾਂ ਦੀ ਮਦਦਗਾਰ ਪਤਨੀ ਨੂੰ ਰੰਗਾਂ ਦੀ ਸ਼ਰਧਾਂਜਲੀ ਹੈ | ਰੱਬ ਦੇ ਰੰਗ ਉਹੀ ਜਾਣੇ |
- ਸੁਖਪ੍ਰੀਤ ਸਿੰਘ ਆਰਟਿਸਟ, ਲੁਧਿਆਣਾ
sukhart0gmail.com,
ਫੋਨ : 0161-2774789
