ਥਾਣਾ ਘੁਮਾਣ ਦੀ ਪੁਲਿਸ ਨੇ ਧਮਕੀਆਂ ਦੇਣ ਵਾਲੇ ਨੌਜਵਾਨ ਵਿਰੁਧ ਪਰਚਾ ਦਰਜ ਕੀਤਾ ਹੈ। ਇਸ ਸਬੰਧੀ ਪੁਲਿਸ ਨੂੰ ਦਿਤੀ ਜਾਣਕਾਰੀ ਵਿਚ ਪੀੜਤ ਲੜਕੀ ਨੇ ਦਸਿਆ
ਬਟਾਲਾ, 20 ਅਪ੍ਰੈਲ (ਮੋਹਨ ਸਿੰਘ ਬਰਿਆਰ): ਥਾਣਾ ਘੁਮਾਣ ਦੀ ਪੁਲਿਸ ਨੇ ਧਮਕੀਆਂ ਦੇਣ ਵਾਲੇ ਨੌਜਵਾਨ ਵਿਰੁਧ ਪਰਚਾ ਦਰਜ ਕੀਤਾ ਹੈ। ਇਸ ਸਬੰਧੀ ਪੁਲਿਸ ਨੂੰ ਦਿਤੀ ਜਾਣਕਾਰੀ ਵਿਚ ਪੀੜਤ ਲੜਕੀ ਨੇ ਦਸਿਆ ਕਿ ਉਹ ਇਕ ਸਰਕਾਰੀ ਸਕੂਲ ਵਿਚ 12ਵੀਂ ਕਲਾਸ ’ਚ ਪੜ੍ਹਦੀ ਹੈ ਅਤੇ ਬੀਤੀ 15 ਅਪ੍ਰੈਲ ਦੀ ਦੁਪਹਿਰ ਨੂੰ ਉਹ ਅਪਣੇ ਘਰੋਂ ਤਾਏ ਦੇ ਘਰ ਵਲ ਜਾ ਰਹੀ ਸੀ ਕਿ ਰਸਤੇ ਵਿਚ ਸੁਖਬੀਰ ਸਿੰਘ ਪੁੱਤਰ ਜਸਬੀਰ ਸਿੰਘ ਵਾਸੀ ਪਿੰਡ ਦਕੋਹਾ ਅਪਣੇ ਗੇਟ ਦੇ ਅੱਗੇ ਖੜਾ ਸੀ, ਨੇ ਉਸ ਨੂੰ ਬੁਰੀ ਨੀਅਤ ਨਾਲ ਬਾਂਹ ਤੋਂ ਫੜ ਕੇ ਅਪਣੇ ਘਰ ਅੰਦਰ ਖਿੱਚਣ ਦੀ ਕੋਸ਼ਿਸ਼ ਕੀਤੀ। ਉਸ ਨੇ ਉਕਤ ਨੌਜਵਾਨ ਦਾ ਵਿਰੋਧ ਕੀਤਾ ਅਤੇ ਘਰ ਵਾਪਸ ਪਰਤ ਆਈ ਜਦਕਿ ਉਕਤ ਨੌਜਵਾਨ ਨੇ ਉਸ ਦੀਆਂ ਫ਼ੋਟੋਆਂ ਵੀ ਅਪਣੇ ਫ਼ੋਨ ’ਤੇ ਖਿੱਚੀਆਂ ਸਨ। ਲੜਕੀ ਨੇ ਘਰ ਆ ਕੇ ਅਪਣੇ ਮਾਪਿਆਂ ਨੂੰ ਸਾਰੀ ਗੱਲ ਦੱਸੀ ਤਾਂ ਉਸ ਦੇ ਮਾਤਾ-ਪਿਤਾ ਉਕਤ ਨੌਜਵਾਨ ਦੇ ਘਰ ਉਲਾਂਭਾ ਦੇਣ ਗਏ ਜਿਥੇ ਨੌਜਵਾਨ ਨੇ ਉਸ ਦੇ ਮਾਪਿਆਂ ਨੂੰ ਜਾਨੋਂ ਮਾਰ ਦੇਣ ਦੀਆਂ ਧਮਕੀਆਂ ਦਿਤੀਆਂ। ਤਫ਼ਤੀਸ਼ੀ ਅਫਸਰ ਇੰਸਪੈਕਟਰ ਨਰਿੰਦਰ ਕੌਰ ਨੇ ਕਾਰਵਾਈ ਕਰਦਿਆਂ ਪੀੜਤ ਲੜਕੀ ਦੇ ਬਿਆਨਾਂ ’ਤੇ ਉਕਤ ਨੌਜਵਾਨ ਵਿਰੁਧ ਥਾਣਾ ਘੁਮਾਣ ’ਚ ਮਾਮਲਾ ਦਰਜ ਕਰਨ ਤੋਂ ਬਾਅਦ ਬਣਦੀ ਅਗਲੇਰੀ ਕਾਨੂੰਨੀ ਕਾਰਵਾਈ ਸ਼ੁਰੂ ਕਰ ਦਿਤੀ ਹੈ।
