ਚੋਰਾਂ ਨੇ ਰਾਤ ਕਰੀਬ 2.30 ਵਜੇ ਵਾਰਦਾਤ ਨੂੰ ਅੰਜਾਮ ਦੇਣ ਦੀ ਕੀਤੀ ਕੋਸ਼ਿਸ਼

ਲੁਧਿਆਣਾ: ਪੰਜਾਬ ਵਿਚ ਲੁੱਟ-ਖੋਹ ਦੀਆਂ ਵਾਰਦਾਤਾਂ ਦਿਨ-ਬ-ਦਿਨ ਵੱਧਦੀਆਂ ਜਾ ਰਹੀਆਂ ਹਨ। ਅਜਿਹਾ ਹੀ ਮਾਮਲਾ ਲੁਧਿਆਣਾ ਤੋਂ ਸਾਹਮਣੇ ਆਇਆ ਹੈ। ਲੁਧਿਆਣਾ ਦੇ ਰਾਹੋਂ ਰੋਡ 'ਤੇ ਨੇਪਾਲੀ ਗੈਂਗ ਸਰਗਰਮ ਹੋ ਰਿਹਾ ਹੈ। ਇਸ ਗਰੋਹ ਵਿਚ 3 ਤੋਂ 5 ਵਿਅਕਤੀ ਦੱਸੇ ਜਾ ਰਹੇ ਹਨ। ਗਿਰੋਹ ਦੇ ਮੈਂਬਰ ਪਹਿਲਾਂ ਪੀੜਤ ਦੀ ਰੇਕੀ ਕਰਦੇ ਹਨ, ਫਿਰ ਮੌਕਾ ਦੇਖ ਕੇ ਵਾਰਦਾਤ ਨੂੰ ਅੰਜਾਮ ਦਿੰਦੇ ਹਨ।

ਨੇਪਾਲੀ ਗੈਂਗ ਨੇ ਰਾਹੋ ਰੋਡ 'ਤੇ ਸੁਭਾਸ਼ ਨਗਰ 'ਚ ਰੌਕ ਸਟਾਰ ਨਾਂ ਦੇ ਕੱਪੜਿਆਂ ਦੇ ਸ਼ੋਅਰੂਮ ਨੂੰ ਨਿਸ਼ਾਨਾ ਬਣਾਉਣ ਦੀ ਕੋਸ਼ਿਸ਼ ਕੀਤੀ ਪਰ ਛੱਤ 'ਤੇ ਸੌਂ ਰਹੇ ਗੁਆਂਢੀ ਨੇ ਜਾਗ ਕੇ ਰੌਲਾ ਪਾਇਆ। ਇਸ ਤੋਂ ਬਾਅਦ ਚੋਰ ਮੌਕੇ ਤੋਂ ਫਰਾਰ ਹੋ ਗਏ। ਇਸ ਘਟਨਾ ਦੀ ਵੀਡੀਓ ਸਾਹਮਣੇ ਆਈ ਹੈ। ਚੋਰਾਂ ਨੇ ਰਾਤ ਕਰੀਬ 2.30 ਵਜੇ ਚੋਰੀ ਕਰਨ ਦੀ ਕੋਸ਼ਿਸ਼ ਕੀਤੀ। 

ਜਾਣਕਾਰੀ ਦਿੰਦਿਆਂ ਦੁਕਾਨ ਮਾਲਕ ਨੇ ਦੱਸਿਆ ਕਿ ਉਹ ਰੋਜ਼ਾਨਾ ਦੀ ਤਰ੍ਹਾਂ ਸ਼ੋਅਰੂਮ ਬੰਦ ਕਰ ਕੇ ਘਰ ਚਲਾ ਗਿਆ। ਉਸ ਦਾ ਘਰ ਸ਼ੋਅਰੂਮ ਦੇ ਨੇੜੇ ਹੈ। ਅਕਸਰ ਉਹ ਮੋਬਾਈਲ 'ਤੇ ਸੀਸੀਟੀਵੀ ਦੇਖਦਾ ਰਹਿੰਦਾ ਹੈ ਕਿ ਸ਼ੋਅਰੂਮ 'ਚ ਕੀ ਹੋ ਰਿਹਾ ਹੈ। ਰਾਤ ਦੇ ਕਰੀਬ 1.30 ਵਜੇ ਉਹ ਸੌਂ ਗਿਆ। ਕੁਝ ਦੇਰ ਬਾਅਦ ਤਿੰਨ ਨੌਜਵਾਨ ਆਏ ਅਤੇ  ਦੁਕਾਨ ਦਾ ਸ਼ਟਰ ਤੋੜਨ ਦੀ ਕੋਸ਼ਿਸ਼ ਕਰਨ ਲੱਗੇ। ਇਸ ਦੌਰਾਨ ਆਵਾਜ਼ ਸੁਣ ਸ਼ੋਅਰੂਮ ਦੇ ਸਾਹਮਣੇ ਛੱਤ 'ਤੇ ਸੌਂ ਰਿਹਾ ਗੁਆਂਢੀ ਜਾਗ ਜਾਂਦਾ ਹੈ ਅਤੇ ਰੌਲਾ ਪਾਉਂਦਾ ਹੈ।

ਗੁਆਂਢੀ ਨੂੰ ਜਾਗਦਾ ਦੇਖ ਕੇ ਚੋਰ ਮੌਕੇ ਤੋਂ ਫਰਾਰ ਹੋ ਗਏ। ਇਹ ਘਟਨਾ ਸ਼ੋਅਰੂਮ ਦੇ ਆਲੇ-ਦੁਆਲੇ ਲੱਗੇ ਸੀਸੀਟੀਵੀ ਕੈਮਰਿਆਂ ਵਿਚ ਕੈਦ ਹੋ ਗਈ। ਇਹੀ ਤਿੰਨ ਨੌਜਵਾਨ 6 ਸਤੰਬਰ ਨੂੰ ਵੀ ਉਸ ਦੇ ਸ਼ੋਅਰੂਮ ਵਿਚ ਘੁੰਮ ਰਹੇ ਸਨ। ਇਹ ਗੱਲ ਸੀਸੀਟੀਵੀ ਦੀ ਜਾਂਚ ਤੋਂ ਬਾਅਦ ਸਾਹਮਣੇ ਆਈ। ਉਸ ਨੇ ਇਸ ਦੀ ਸ਼ਿਕਾਇਤ ਚੌਕੀ ਸੁਭਾਸ਼ ਨਗਰ ਦੀ ਪੁਲਿਸ ਨੂੰ ਦਿੱਤੀ ਹੈ। ਜਾਂਚ ਅਧਿਕਾਰੀ ਬਲਵਿੰਦਰ ਸਿੰਘ ਨੇ ਦੱਸਿਆ ਕਿ ਸੀਸੀਟੀਵੀ ਫੁਟੇਜ ਦੇ ਆਧਾਰ ’ਤੇ ਚੋਰਾਂ ਦੀ ਪਛਾਣ ਕੀਤੀ ਜਾ ਰਹੀ ਹੈ।