ਪ੍ਰਸ਼ਾਸਨ ਵਲੋਂ ਪੰਜਾਬ ਦੀਆਂ ਹੱਦਾਂ ਸੀਲ
ਚੰਡੀਗੜ੍ਹ, 21 ਅਪ੍ਰੈਲ (ਸਰਬਜੀਤ ਢਿੱਲੋਂ) : ਯੂ.ਟੀ. ਪ੍ਰਸ਼ਾਸਨ ਵਲੋਂ ਚੰਡੀਗੜ੍ਹ ਸ਼ਹਿਰ ਨੂੰ ਰੋਗਗ੍ਰਸ਼ਤ ਏਰੀਆ ਐਲਾਨੇ ਜਾਣ ਬਾਅਦ ਫਿਲਹਾਲ ਅਗਲੇ 15 ਦਿਨਾਂ ਤਕ ਹੋਰ ਕਰਫ਼ਿਊ ਆਦਿ 'ਚ ਢਿੱਲ ਦਿਤੇ ਜਾਣ ਦੀ ਉਮੀਤ ਨਹੀਂ।
ਉੱਚ ਪਧਰੀ ਮੀਟਿੰਗ ਤੋਂ ਬਾਅਦ ਪ੍ਰਸ਼ਾਸਕ ਵੀ.ਪੀ. ਸਿੰਘ ਬਦਨੌਰ ਤੇ ਉਨ੍ਹਾਂ ਦੇ ਸਲਾਹਕਾਰ ਮਨੋਜ ਪਰਿੰਦਾ ਵਲੋਂ ਸ਼ਹਿਰ ਦੇ ਗਰੀਬਾਂ ਤੇ ਆਮ ਲੋਕਾਂ ਨੂੰ ਛੋਟੀਆਂ-ਮੋਟੀਆਂ ਰਿਆਇਤਾਂ ਦੇਣ ਬਾਅਦ ਕੰਨਟੇਨਮੈਂਟ ਜ਼ੋਨ 'ਚ 3 ਮਈ ਤਕ ਕੋਈ ਵੱਡੀ ਰਾਹਤ ਦੇਣ ਦੀ ਉਮੀਦ ਨਹੀਂ ਹੈ। ਉਨ੍ਹਾਂ ਵਲੋਂ ਸ਼ਹਿਰ ਵਾਸੀਆਂ ਨੂੰ ਆਪੋ-ਅਪਣੇ ਘਰਾਂ 'ਚ ਹੀ ਰਹਿਣ ਦਾ ਸਾਰਥਿਕ ਸੁਨੇਹਾ ਵਾਰ-ਵਾਰ ਦਿਤਾ ਜਾ ਰਿਹਾ ਹੈ।
ਚੰਡੀਗੜ੍ਹ ਪ੍ਰਸ਼ਾਸਨ ਵਲੋਂ ਧਨਾਸ ਕਾਲੋਨੀ ਵਿਚ ਕੋਰੋਨਾ ਦਾ ਇਕ ਮਰੀਜ਼ ਆਉਣ ਬਾਅਦ ਪੂਰੀ ਤਰ੍ਹਾਂ ਸੀਲ ਕਰ ਦਿਤਾ ਹੈ ਤਾਕਿ ਲੋਕ ਇਧਰ-ਉਧਰ ਨਾ ਜਾ ਸਕਣ। ਪ੍ਰਸ਼ਾਸਨ ਵਲੋਂ ਪੀ.ਜੀ.ਆਈ. ਵਿਚ ਕੋਰੋਨਾ ਦੇ ਮਰੀਜ਼ਾਂ ਨੂੰ ਪੀ.ਜੀ.ਆਈ. ਦੇ ਡਾਇਰੈਕਟਰ ਦੀ ਇਜਾਜ਼ਤ ਤੋਂ ਬਿਨਾਂ ਦਾਖ਼ਲ ਨਾ ਕਰਨ ਦੀਆਂ ਸਖ਼ਤ ਹਦਾਇਤਾਂ ਹਨ। ਪ੍ਰਸ਼ਾਸਨ ਨੂੰ ਜਿਸ ਖੇਤਰ 'ਚੋਂ ਮਰੀਜ਼ ਮਿਲੇਗਾ, ਉਸ ਪੂਰੇ ਖੇਤਰ ਨੂੰ ਸੀਲ ਕੀਤਾ ਜਾਵੇਗਾ।
