ਦ੍ਰੌਪਦੀ ਮੁਰਮੂ ਹੋਣਗੇ ਦੇਸ਼ ਦੀ 15ਵੇਂ ਰਾਸ਼ਟਰਪਤੀ 5.77 ਲੱਖ ਵੋਟਾਂ ਨਾਲ ਰਹੇ ਜੇਤੂ, ਯਸ਼ਵੰਤ ਸਿਨਹਾ ਨੂੰ ਮਿਲੀਆਂ 2.61 ਲੱਖ ਵੋਟਾਂ
ਨਵੀਂ ਦਿੱਲੀ, 21 ਜੁਲਾਈ : ਐਨ.ਡੀ.ਏ. ਦੀ ਉਮੀਦਵਾਰ ਦ੍ਰੌਪਦੀ ਮੁਰਮੂ ਦੇਸ਼ ਦੀ 15ਵੀਂ ਰਾਸ਼ਟਰਪਤੀ ਹੋਣਗੇ | ਉਹ ਦੇਸ਼ ਦੀ ਪਹਿਲੀ ਆਦਿਵਾਸੀ ਅਤੇ ਦੂਜੀ ਮਹਿਲਾ ਰਾਸ਼ਟਰਪਤੀ ਹੋਣਗੇ | ਵੀਰਵਾਰ ਨੂੰ ਸਵੇਰੇ 11 ਵਜੇ ਤੋਂ ਸ਼ੁਰੂ ਹੋਈ ਗਿਣਤੀ ਵਿਚ ਮੁਰਮੂ ਨੇ ਵਿਰੋਧੀ ਉਮੀਦਵਾਰ ਯਸ਼ਵੰਤ ਸਿਨਹਾ ਨੂੰ ਤੀਜੇ ਗੇੜ ਵਿਚ ਹੀ ਹਰਾ ਦਿਤਾ | ਮੁਰਮੂ ਨੂੰ ਜ਼ਰੂਰੀ ਇਲੈਕਟ੍ਰੋਲ ਵੋਟ ਦੀਆਂ 50 ਫ਼ੀ ਸਦੀ ਵੋਟਾਂ ਤੀਜੇ ਗੜੇ ਵਿਚ ਮਿਲ ਗਈਆਂ ਸਨ |
ਰਾਜ ਸਭਾ ਦੇ ਸਕੱਤਰ ਜਨਰਲ ਪੀ.ਸੀ. ਮੋਦੀ ਮੁਤਾਬਕ ਦੁਪਹਿਰ 2 ਵਜੇ ਸਾਂਸਦਾਂ ਦੀਆਂ ਵੋਟਾਂ ਦੀ ਗਿਣਤੀ ਪੂਰੀ ਹੋਈ | ਇਸ ਵਿਚ ਦ੍ਰੌਪਦੀ ਮੁਰਮੂ ਨੂੰ 540 ਵੋਟਾਂ ਮਿਲੀਆਂ | ਇਨ੍ਹਾਂ ਦੀ ਕੁਲ ਅਹਿਮੀਅਤ 3 ਲੱਖ 78 ਹਜ਼ਾਰ ਹੈ | ਯਸ਼ਵੰਤ ਸਿਨਹਾ ਨੂੰ 208 ਸਾਂਸਦਾਂ ਦੀਆਂ ਵੋਟਾਂ ਮਿਲੀਆਂ, ਜਿਨ੍ਹਾਂ ਦੀਆਂ ਵੋਟ ਅਹਿਮੀਅਤ 1 ਲੱਖ 45 ਹਜ਼ਾਰ 600 ਹੈ | ਸਾਂਸਦਾਂ ਦੀਆਂ ਕੁਲ 15 ਵੋਟਾਂ ਰੱਦ ਹੋ ਗਈਆਂ | ਉਥੇ ਸੂਤਰਾਂ ਮੁਤਾਬਕ 17 ਸਾਂਸਦਾਂ ਨੇ ਕ੍ਰਾਸ ਵੋਟਿੰਗ ਕੀਤੀ ਹੈ |
ਵੋਟਾਂ ਦੀ ਗਿਣਤੀ ਖ਼ਤਮ ਹੋਣ ਤੋਂ ਬਾਅਦ ਦੇਸ਼ ਵਿਚ ਨਵੇਂ ਰਾਸ਼ਟਰਪਤੀ ਦੇ ਐਲਾਨ ਕਰ ਦਿਤਾ ਜਾਵੇਗਾ | ਰਾਸ਼ਟਰਪਤੀ ਰਾਮਨਾਥ ਕੋਵਿੰਦ ਦਾ ਕਾਰਜਕਾਲ 24 ਜੁਲਾਈ ਦੀ ਅੱਧੀ ਰਾਤ ਨੂੰ ਖ਼ਤਮ ਹੋ ਰਿਹਾ ਹੈ | 25 ਜੁਲਾਈ ਨੂੰ ਨਵੇਂ ਰਾਸ਼ਟਰਪਤੀ ਵਲੋਂ ਸਹੁੰ ਚੁੁੱਕੀ ਜਾਵੇਗੀ |
ਜ਼ਿਕਰਯੋਗ ਹੈ ਕਿ ਭਾਜਪਾ ਨੇ 21 ਜੂਨ ਨੂੰ ਮੁਰਮੂ ਨੂੰ ਉਮੀਦਵਾਰ ਬਣਾਇਆ ਸੀ, ਉਦੋਂ ਐਨਡੀਏ ਦੇ ਖਾਤੇ ਵਿਚ 5 ਲੱਖ 63 ਹਜ਼ਾਰ 825, ਯਾਨੀ 52 ਫ਼ੀ ਸਦੀ ਵੋਟਾਂ ਸਨ | 24 ਵਿਰੋਧੀ ਦਲਾਂ ਦੇ ਨਾਲ ਹੋਣ 'ਤੇ ਸਿਨਹਾ ਦੇ ਨਾਲ 4 ਲੱਖ 80 ਹਜ਼ਾਰ 748 ਯਾਨੀ 44 ਫ਼ੀ ਸਦੀ ਵੋਟਾਂ ਮੰਨੀਆਂ ਜਾ ਰਹੀਆਂ ਸਨ | ਬੀਤੇ 27 ਦਿਨਾਂ ਵਿਚ ਕਈ ਗ਼ੈਰ ਐਨਡੀਏ ਦਲਾਂ ਦੇ ਸਮਰਥਨ ਵਿਚ ਆਉਣ ਨਾਲ ਮੁਰਮੂ ਨੂੰ ਫ਼ੈਸਲਾਕੁਨ ਵਾਧਾ ਮਿਲ ਗਿਆ | (ਏਜੰਸੀ)
ਕੌਣ ਹੈ ਦ੍ਰੋਪਦੀ ਮੁਰਮੂ?
20 ਜੂਨ, 1958 ਨੂੰ ਉੜੀਸਾ ਦੇ ਰਾਏਰੰਗਪੁਰ ਵਿਚ ਜਨਮੀ ਦ੍ਰੌਪਦੀ ਮੁਰਮੂ ਨੂੰ ਝਾਰਖੰਡ ਦੀ ਪਹਿਲੀ ਮਹਿਲਾ ਰਾਜਪਾਲ ਬਣਨ ਦਾ ਮਾਣ ਵੀ ਹਾਸਲ ਹੈ | ਮੁਰਮੂ ਆਜ਼ਾਦੀ ਤੋਂ ਬਾਅਦ ਪੈਦਾ ਹੋਣ ਵਾਲੇ ਪਹਿਲੇ ਰਾਸ਼ਟਰਪਤੀ ਵੀ ਹਨ | ਦੇਸ਼ ਦੇ ਸੱਭ ਤੋਂ ਦੂਰ-ਦੁਰਾਡੇ ਅਤੇ ਪਛੜੇ ਜ਼ਿਲਿ੍ਹਆਂ ਵਿਚੋਂ ਇਕ ਵਿਚ ਗ਼ਰੀਬੀ ਨਾਲ ਲੜਦੇ ਹੋਏ, ਮੁਰਮੂ ਨੇ ਅਪਣੀ ਸਕੂਲੀ ਪੜ੍ਹਾਈ ਮਯੂਰਭੰਜ ਵਿਚ ਪੂਰੀ ਕੀਤੀ | ਉਸ ਨੇ ਭੁਵਨੇਸ਼ਵਰ ਵਿਚ ਰਮਾਦੇਵੀ ਮਹਿਲਾ ਕਾਲਜ ਤੋਂ ਆਰਟਸ ਵਿਚ ਬੈਚਲਰ ਦੀ ਡਿਗਰੀ ਕੀਤੀ | ਫਿਰ ਉਸ ਨੇ ਉੜੀਸਾ ਸਰਕਾਰ ਵਿਚ ਸਿੰਚਾਈ ਅਤੇ ਬਿਜਲੀ ਵਿਭਾਗ ਵਿਚ ਜੂਨੀਅਰ ਸਹਾਇਕ ਵਜੋਂ ਕੰਮ ਕੀਤਾ | ਉਹ ਰਾਇਰੰਗਪੁਰ ਵਿਚ ਸ੍ਰੀ ਔਰਬਿੰਦੋ ਇੰਟੈਗਰਲ ਐਜੂਕੇਸਨ ਸੈਂਟਰ ਵਿਚ ਇਕ ਆਨਰੇਰੀ ਸਹਾਇਕ ਅਧਿਆਪਕ ਵੀ ਸੀ |
ਘੱਟ-ਪ੍ਰੋਫ਼ਾਈਲ ਰੱਖਣ ਲਈ ਜਾਣੀ ਜਾਂਦੀ, ਦ੍ਰੌਪਦੀ ਮੁਰਮੂ ਨੇ ਅਪਣੀ ਜ਼ਿੰਦਗੀ ਵਿਚ ਕਈ ਨਿਜੀ ਦੁਖਾਂਤ ਨੂੰ ਪਾਰ ਕੀਤਾ ਹੈ | ਉੜੀਸਾ ਦੇ ਰਾਇਰੰਗਪੁਰ ਤੋਂ ਨਰਮ ਬੋਲਣ ਵਾਲੀ ਕਬਾਇਲੀ ਨੇਤਾ ਨੇ 2009-2015 ਦੇ ਵਿਚਕਾਰ ਸਿਰਫ ਛੇ ਸਾਲਾਂ ਵਿਚ ਅਪਣੇ ਪਤੀ, ਦੋ ਪੁੱਤਰਾਂ, ਮਾਂ ਅਤੇ ਭਰਾ ਨੂੰ ਗੁਆ ਦਿਤਾ |
ਰਾਜਨੀਤੀ ਵਿਚ ਉਨ੍ਹਾਂ ਦੀ ਸ਼ੁਰੂਆਤ 1997 ਵਿਚ ਹੋਈ ਜਦੋਂ ਉਹ ਰਾਏਰੰਗਪੁਰ ਵਿਚ ਜ਼ਿਲ੍ਹਾ ਬੋਰਡ ਦੀ ਕੌਂਸਲਰ ਚੁਣੀ ਗਈ | ਬਾਅਦ ਵਿਚ ਉਹ ਇਸੇ ਹਲਕੇ ਤੋਂ ਵਿਧਾਇਕ ਬਣੀ | ਉਸ ਨੂੰ ਉੜੀਸਾ ਵਿਧਾਨ ਸਭਾ ਦੁਆਰਾ ਸਰਵੋਤਮ ਵਿਧਾਇਕ ਲਈ ਨੀਲਕੰਠ ਪੁਰਸਕਾਰ ਵੀ ਮਿਲਿਆ |
ਮੁਰਮੂ ਨੇ 18 ਮਈ, 2015 ਨੂੰ ਝਾਰਖੰਡ ਦੇ ਰਾਜਪਾਲ ਵਜੋਂ ਸਹੁੰ ਚੁੱਕਣ ਤੋਂ ਪਹਿਲਾਂ, ਉੜੀਸਾ ਵਿਚ ਬੀਜੇਪੀ-ਭਾਜਪਾ ਗਠਜੋੜ ਸਰਕਾਰ ਵਿਚ ਦੋ ਵਾਰ ਵਿਧਾਇਕ ਅਤੇ ਇਕ ਵਾਰ ਮੰਤਰੀ ਵਜੋਂ ਕੰਮ ਕੀਤਾ | ਮੁਰਮੂ ਅਪਣੇ ਪਿੰਡ ਰਾਇਰੰਗਪੁਰ ਵਿਚ ਜਾਣ ਤੋਂ ਪਹਿਲਾਂ 2021 ਤਕ ਇਸ ਅਹੁਦੇ 'ਤੇ ਰਹੇ | ਉਹ ਰਾਜ ਦੀ ਪਹਿਲੀ ਮਹਿਲਾ ਰਾਜਪਾਲ ਅਤੇ ਕਿਸੇ ਵੀ ਭਾਰਤੀ ਰਾਜ ਵਿਚ ਰਾਜਪਾਲ ਵਜੋਂ ਸੇਵਾ ਕਰਨ ਵਾਲੀ ਪਹਿਲੀ ਮਹਿਲਾ ਕਬਾਇਲੀ ਨੇਤਾ ਸੀ |
