ਲਾਂਘੇ ਦੇ ਆਸ-ਪਾਸ ਪਾਣੀ ਖੜ੍ਹਾ ਹੈ ਤੇ ਲਾਂਘੇ ਨੂੰ ਜਾਣ ਵਾਲੀ ਸੜਕ ਪਾਣੀ ਕਰ ਕੇ ਖ਼ਰਾਬ ਹੋ ਗਈ ਹੈ
ਗੁਰਦਾਸਪੁਰ - ਸ੍ਰੀ ਕਰਤਾਰਪੁਰ ਲਾਂਘੇ ਦੀ ਯਾਤਰਾ ਅੱਜ ਤੱਕ ਦੇ ਲਈ ਬੰਦ ਕੀਤੀ ਗਈ ਸੀ ਕਿਉਂਕਿ ਭਾਰੀ ਮੀਂਹ ਦੇ ਕਰ ਕੇ ਲਾਂਘੇ ਵਿਚ ਪਾਣੀ ਬਹੁਤ ਖੜ੍ਹ ਗਿਆ ਸੀ ਜਿਸ ਦੇ ਮੱਦੇਨਜ਼ਰ ਇਹ ਯਾਤਰਾ ਅੱਜ ਤੱਕ ਰੋਕੀ ਗਈ ਸੀ। ਇਸ ਯਾਤਰਾ ਨੂੰ ਚਲਾਉਣ ਬਾਰੇ ਅੱਜ ਖ਼ਬਰ ਇਹ ਸਾਹਮਣੇ ਆਈ ਹੈ ਕਿ ਫਿਲਹਾਲ ਇਹ ਯਾਤਰਾ 2 ਦਿਨ ਹੋਰ ਬੰਦ ਰਹੇਗੀ। ਇਸ ਸਬੰਧੀ ਗੁਰਦਾਸਪੁਰ ਦੇ ਡੀਸੀ ਡਾ. ਹਿਮਾਂਸ਼ੂ ਅਗਰਵਾਲ ਨੇ ਦੱਸਿਆ ਕਿ ਉਹਨਾਂ ਵੱਲੋਂ ਅੱਜ ਫਿਰ ਪੂਰੇ ਇਲਾਕੇ ਦਾ ਦੌਰਾ ਕੀਤਾ ਗਿਆ ਤੇ ਅਜੇ ਵੀ ਲਾਂਘੇ ਦੇ ਆਸ-ਪਾਸ ਪਾਣੀ ਖੜ੍ਹਾ ਹੈ ਤੇ ਲਾਂਘੇ ਨੂੰ ਜਾਣ ਵਾਲੀ ਸੜਕ ਪਾਣੀ ਕਰ ਕੇ ਖ਼ਰਾਬ ਹੋ ਗਈ ਹੈ।
ਹਿਮਾਂਸ਼ੂ ਅਗਰਵਾਲ ਨੇ ਕਿਹਾ ਕਿ ਇਹ ਪਾਣੀ ਰਾਵੀ ਨਦੀ ਨੂੰ ਓਵਰਫਲੋਅ ਕਰ ਕੇ ਇੱਥੇ ਆਇਆ ਸੀ ਜਿਸ ਕਰ ਕੇ ਨੁਕਸਾਨ ਹੋਇਆ ਹੈ। ਉਹਨਾਂ ਨੇ ਕਿਹਾ ਕਿ ਯਾਤਰੀਆਂ ਦੀ ਸੁਰੱਖਿਆ ਲਈ ਹੀ ਇਹ ਯਾਤਰਾ 2 ਦਿਨ ਹੋਰ ਸਥਾਗਿਤ ਕਰਨ ਦਾ ਫ਼ੈਸਲਾ ਕੀਤਾ ਗਿਆ ਹੈ ਤੇ ਹੁਣ ਸੋਮਵਾਰ ਦੀ ਸ਼ਾਮ ਨੂੰ ਫਿਰ ਤੋਂ ਸਥਿਤੀ ਦੇ ਅਨੁਸਾਰ ਫ਼ੈਸਲਾ ਲਿਆ ਜਾਵੇਗਾ। ਉਹਨਾਂ ਨੇ ਕਿਹਾ ਕਿ ਇਲਾਕੇ ਵਿਚ ਅਜੇ ਹੋਰ ਮੀਂਹ ਪੈਣ ਦੀ ਵੀ ਸੰਭਾਵਨਾ ਹੈ।
