ਫ਼ਾਇਨਾਂਸ ਕਰਵਾਉਣ ਵਾਲੇ ਗਰੋਹ ਦੇ 5 ਮੈਂਬਰਾਂ ਨੂੰ ਪੁਲਿਸ ਦੀ ਅਪ੍ਰੇਸ਼ਨ ਸੈਲ ਦੀ ਟੀਮ ਨੇ ਗ੍ਰਿਫ਼ਤਾਰ ਕੀਤਾ ਹੈ
ਜਾਅਲੀ ਦਸਤਾਵੇਜ਼ਾਂ ਦੇ ਸਹਾਰੇ ਲੋਕਾਂ ਦੇ ਦੁਪਹਿਆ ਵਾਹਨ ਫ਼ਾਇਨਾਂਸ ਕਰਵਾਉਣ ਵਾਲੇ ਗਰੋਹ ਦੇ 5 ਮੈਂਬਰਾਂ ਨੂੰ ਪੁਲਿਸ ਦੀ ਅਪ੍ਰੇਸ਼ਨ ਸੈਲ ਦੀ ਟੀਮ ਨੇ ਗ੍ਰਿਫ਼ਤਾਰ ਕੀਤਾ ਹੈ। ਗਰੋਹ ਦੇ ਮੈਂਬਰ ਲੋਕਾਂ ਦੇ ਦਸਤਾਵੇਜ਼ ਲੈ ਕੇ ਪਹਿਲਾਂ ਲੋਨ ਕਰਵਾ ਲੈਂਦੇ ਸਨ ਅਤੇ ਬਾਅਦ ਵਿਚ ਉਨ੍ਹਾਂ ਲੋਕਾਂ ਨੂੰ ਲੋਨ ਪਾਸ ਨਾ ਹੋਣ ਦੀ ਗੱਲ ਕਹਿ ਕੇ ਵਾਪਸ ਭੇਜ ਦਿੰਦੇ ਸਨ ਅਤੇ ਆਪ ਵਾਹਨ ਲੈ ਲੈਂਦੇ ਸਨ। ਪੁਲਿਸ ਨੇ ਗਰੋਹ ਦੇ ਕਬਜ਼ੇ ਤੋਂ ਅਜਿਹੇ 24 ਦੁਪਹਿਆ ਵਾਹਨ ਬਰਾਮਦ ਕੀਤੇ ਹਨ। ਗਰੋਹ ਦੇ ਮੈਂਬਰ ਇਨ੍ਹਾਂ ਵਾਹਨਾਂ ਦੇ ਜਾਅਲੀ ਨੰਬਰ ਲਗਾ ਕੇ ਲੋਕਾਂ ਨੂੰ 30-35 ਹਜ਼ਾਰ ਰੁਪਏ ਵਿਚ ਵੇਚ ਦਿੰਦੇ ਸਨ। ਇਸ ਤੋਂ ਇਲਾਵਾ ਉਹ ਇਨ੍ਹਾਂ ਵਾਹਨਾਂ ਨੂੰ ਰੋਜ਼ ਦੇ ਕਿਰਾਏ 'ਤੇ ਵੀ ਦਿੰਦੇ ਸਨ।
ਮੁਲਜ਼ਮਾਂ ਦੀ ਪਛਾਣ ਸੈਕਟਰ 48 ਵਾਸੀ ਸੁਖਦੇਵ ਸਿੰਘ, ਹੱਲੋਮਾਜਰਾ ਵਾਸੀ ਸੁਰਜੀਤ ਸਿੰਘ, ਰਾਮਦਰਬਾਰ ਵਾਸੀ ਸੰਜੇ, ਡੇਰਾਬੱਸੀ ਵਾਸੀ ਸੰਦੀਪ ਅਤੇ ਪ੍ਰਦੀਪ ਗੌਤਮ ਦੇ ਰੂਪ ਵਿਚ ਹੋਈ ਹੈ। ਮੁਲਜ਼ਮ ਸੰਦੀਪ ਬੇਦੀ ਸਜੁਕੀ ਜ਼ੀਰਕਪੁਰ ਦਾ ਮੁਲਾਜ਼ਮ ਹੈ। ਐਸ.ਪੀ. ਆਪ੍ਰੇਸ਼ਨ ਰਵੀ ਕੁਮਾਰ ਨੇ ਦਸਿਆ ਕਿ ਪੁਲਿਸ ਨੇ ਗਰੋਹ ਨੂੰ ਸੈਕਟਰ-26 ਤੋਂ ਕਾਬੂ ਕੀਤਾ ਹੈ। ਇਹ ਗਰੋਹ ਪਿਛਲੇ ਕਾਫ਼ੀ ਸਮੇਂ ਤੋਂ ਲੋਕਾਂ ਦੇ ਨਾਂ 'ਤੇ ਲੋਨ ਲੈ ਕੇ ਵਾਹਨ ਖ਼ਰੀਦ ਲੈਂਦਾ ਸੀ ਅਤੇ ਜਿਸ ਵਿਅਕਤੀ ਦੇ ਨਾਂ ਲੋਨ ਹੁੰਦਾ ਸੀ, ਉਸ ਨੂੰ ਲੋਨ ਨਾ ਪਾਸ ਹੋਣ ਦੀ ਗੱਲ ਕਹਿੰਦਾ ਸੀ। ਕਾਬੂ ਕੀਤੇ ਗਏ ਮੁਲਜ਼ਮ ਪੁਲਿਸ ਰੀਮਾਂਡ 'ਤੇ ਹਨ। ਪੁਲਿਸ ਨੂੰ ਗਰੋਹ ਤੋਂ ਹੋਰ ਵੀ ਪ੍ਰਗਟਾਵਾ ਹੋਣ ਦੀ ਸੰਭਾਵਨਾ ਹੈ।