ਲੁਧਿਆਣਾ ਸੰਸਦੀ ਸੀਟ ਤੋਂ ਚੋਣ ਲੜ ਰਹੇ 43 ’ਚੋਂ 8 ਉਮੀਦਵਾਰ ਅਜਿਹੇ ਹਨ, ਜਿਹੜੇ ਆਪਣੀ ਵੋਟ ਆਪਣੇ ਚੋਣ ਨਿਸ਼ਾਨ ’ਤੇ ਨਹੀਂ ਪਾ ਸਕਦੇ
Lok Sabha Elections 2024: ਆਮ ਤੌਰ ’ਤੇ ਚੋਣ ਲੜ ਰਿਹਾ ਉਮੀਦਵਾਰ ਸਭ ਤੋਂ ਪਹਿਲਾਂ ਅਪਣੀ ਤੇ ਆਪਣੇ ਪਰਿਵਾਰ ਦੀ ਵੋਟ ਆਪਣੇ ਚੋਣ ਨਿਸ਼ਾਨ ’ਤੇ ਪਾਉਂਦਾ ਅਤੇ ਪਵਾਉਂਦਾ ਹੈ। ਪਰ ਲੁਧਿਆਣਾ ਸੰਸਦੀ ਸੀਟ ਤੋਂ ਚੋਣ ਲੜ ਰਹੇ 43 ’ਚੋਂ 8 ਉਮੀਦਵਾਰ ਅਜਿਹੇ ਹਨ, ਜਿਹੜੇ ਆਪਣੀ ਵੋਟ ਆਪਣੇ ਚੋਣ ਨਿਸ਼ਾਨ ’ਤੇ ਨਹੀਂ ਪਾ ਸਕਦੇ, ਕਿਉਂਕਿ ਉਨ੍ਹਾਂ ਦੀ ਵੋਟ ਲੁਧਿਆਣਾ ਲੋਕਸਭਾ ਹਲਕੇ ਵਿਚ ਹੈ ਹੀ ਨਹੀਂ। ਇਨ੍ਹਾਂ 8 ’ਚੋਂ ਦੋ ਉਮੀਦਵਾਰ ਵਡੀਆਂ ਪਾਰਟੀਆਂ ਭਾਜਪਾ ਦੇ ਰਵਨੀਤ ਸਿੰਘ ਬਿੱਟੂ ਅਤੇ ਕਾਂਗਰਸ ਦੇ ਅਮਰਿੰਦਰ ਸਿੰਘ ਰਾਜਾ ਵੜਿੰਗ ਵੀ ਸ਼ਾਮਲ ਹਨ।
ਦਰਅਸਲ, ਲੁਧਿਆਣਾ ਲੋਕ ਸਭਾ ਸੀਟ ਤੋਂ ਚੋਣ ਲੜ ਰਹੇ ਕਾਂਗਰਸ ਦੇ ਅਮਰਿੰਦਰ ਸਿੰਘ ਰਾਜਾ ਵੜਿੰਗ ਦੀ ਵੋਟ ਸ੍ਰੀ ਮੁਕਤਸਰ ਸਾਹਿਬ ਹਲਕੇ ਵਿੱਚ ਹੈ। ਜਦਕਿ ਭਾਰਤੀ ਜਨਤਾ ਪਾਰਟੀ ਦੇ ਉਮੀਦਵਾਰ ਰਵਨੀਤ ਸਿੰਘ ਬਿੱਟੂ ਦੀ ਵੋਟ ਪਾਇਲ ਹਲਕੇ ਵਿੱਚ ਹੈ, ਜੋ ਸੰਸਦੀ ਖੇਤਰ ਫਤਿਹਗੜ ਸਾਹਿਬ ’ਚ ਪੈਂਦਾ ਹੈ। ਇਸ ਕਰ ਕੇ ਇਹ ਦੋਵੇਂ ਲੁਧਿਆਣਾ ਸੰਸਦੀ ਹਲਕੇ ’ਚ ਅਪਣੇ-ਆਪ ਨੂੰ ਵੋਟ ਨਹੀਂ ਪਾ ਸਕਣਗੇ।
ਇਸੇ ਤਰ੍ਹਾਂ ਸ਼੍ਰੋਮਣੀ ਅਕਾਲੀ ਦਲ ਅੰਮ੍ਰਿਤਸਰ ਦੀ ਟਿਕਟ ’ਤੇ ਚੋਣ ਲੜ ਰਹੇ ਅੰਮ੍ਰਿਤਪਾਲ ਸਿੰਘ ਛੰਦੜਾ ਦੀ ਵੋਟ ਵੀ ਪਟਿਆਲਾ ਹਲਕੇ ’ਚ ਹੈ। ਆਜ਼ਾਦ ਤੌਰ ’ਤੇ ਚੋਣ ਲੜ ਰਹੇ ਕੰਵਲਜੀਤ ਸਿੰਘ ਬਰਾੜ ਦੀ ਵੋਟ ਫ਼ਰੀਦਕੋਟ ਹਲਕੇ ਵਿੱਚ ਹੈ। ਗਲੋਬਲ ਰਿਪਬਲਿਕਨ ਪਾਰਟੀ ਦੇ ਸ਼ਿਵਮ ਯਾਦਵ ਦੀ ਵੋਟ ਜਲੰਧਰ ਹਲਕੇ ’ਚ ਹੈ। ਆਜਾਦ ਉਮੀਦਵਾਰ ਗੁਰਮੀਤ ਸਿੰਘ ਖਰੇ ਦੀ ਵੋਟ ਫਤਿਹਗੜ੍ਹ ਸਾਹਿਬ ਹਲਕੇ ’ਚ ਹੈ।
ਸਮਾਜਕ ਸੰਘਰਸ਼ ਪਾਰਟੀ ਦੀ ਟਿਕਟ ’ਤੇ ਚੋਣ ਲੜ ਰਹੀ ਹਰਵਿੰਦਰ ਕੌਰ ਦੀ ਵੋਟ ਮੋਹਾਲੀ ’ਚ ਹੈ ਤੇ ਬਹੁਜਨ ਦ੍ਰਾਵਿੜ ਪਾਰਟੀ ਦੇ ਉਮੀਦਵਾਰ ਪ੍ਰਿਤਪਾਲ ਸਿੰਘ ਦੀ ਵੋਟ ਜਲੰਧਰ ਹਲਕੇ ’ਚ ਹੈ। ਇਹ ਸਾਰੇ 8 ਉਮੀਦਵਾਰ ਲੁਧਿਆਣਾ ਸੰਸਦੀ ਖੇਤਰ ’ਚੋਂ ਚੋਣ ਲੜ ਰਹੇ ਹਨ, ਪਰ ਇਹ ਆਪਣੀ ਵੋਟ ਆਪਣੇ-ਆਪ ਨੂੰ ਨਹੀਂ ਪਾ ਸਕਣਗੇ।
(For more Punjabi news apart from 8 candidates of Ludhiana including Bittu and Raja Warring will not be able to vote for themselves, stay tuned to Rozana Spokesman)
